އީރާނުގެ ބޫޝެހްރު ނިއުކްލިއަރ ޕްލާންޓް ކައިރިއަށް ހަމަލާއެއް އަމާޒުވެއްޖެ

އީރާނުގެ ހުޅަނގު ދެކުނުގައި ހުންނަ ބޫޝެހްރު ނިއުކްލިއަރ ޕަވަރ ޕްލާންޓުގެ ބޭރު އިންފާރާ ކައިރިއަށް ހޮނިހިރު ދުވަހު އަމާޒުވި ހަމަލާއެއްގައި މީހަކު މަރުވެއްޖެ ކަމަށް އީރާނުގެ މީޑިއާތަކުން ރިޕޯޓްކޮށްފިއެވެ.

މި ހަމަލާއާ ގުޅިގެން ކަމާބެހޭ ފަރާތްތަކުން ބުނެފައިވަނީ، ނިއުކްލިއަރ ޕްލާންޓުގެ މައިގަނޑު ވަސީލަތްތަކަށް އެއްވެސް ގެއްލުމެއް ލިބިފައި ނުވާ ކަމަށާއި، ޕްލާންޓުގެ މަސައްކަތްތައް އާދައިގެ މަތިން ކުރިއަށްދާ ކަމަށެވެ. ނަމަވެސް، މި ހަމަލާއާއެކު ސަރަހައްދުގެ މުހިންމު ބިނާތަކުގެ ސަލާމަތީ ނުރައްކާ މިހާރު ވަނީ ބޮޑުވެފައެވެ.

އިސްރާއީލުން ބުނަމުންދަނީ އީރާނުގެ އަސްކަރީ މަރުކަޒުތަކަށާއި، ވައިގެ ދިފާއީ ނިޒާމުތަކުގެ އިތުރުން ހަތިޔާރު އުފައްދާ ކާރުޚާނާތަކަށް ހަމަލާދީފައިވާނެ ކަމަށެވެ. މީގެ އިތުރުން، އީރާނުގެ ޚޫޒިސްތާން ޕްރޮވިންސްގެ މަހްޝަހްރު ޕެޓްރޯކެމިކަލް ޒޯނުގައިވެސް ގޮވުންތަކެއް ގޮވާފައިވާ ކަމަށާއި، އެ ސަރަހައްދުން ބައެއް މީހުން މަރުވެފައިވާ ކަމަށް ބެލެވޭ ކަމަށް ރިޕޯޓްތައް ބުނެއެވެ.

މި ހާދިސާ ހިނގާފައިވަނީ އީރާނާއި، އެމެރިކާ އަދި އިސްރާއީލާ ދެމެދު އޮތް ނުތަނަވަސްކަން އިންތިހާއަށް އިތުރުވެފައިވާ ދަނޑިވަޅެއްގައެވެ. މިގޮތުން، އެމެރިކާގެ ދެ ހަނގުރާމަމަތީ ބޯޓެއް ވައްޓާލުމާ ގުޅިގެން، ގެއްލިފައިވާ ޕައިލެޓަކު ހޯދުމުގެ މަސައްކަތްވެސް އީރާނުން ދަނީ ކުރަމުންނެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުގެ އިންފްރާސްޓްރަކްޗަރ، އޭގެ ތެރޭގައި ފާލަންތަކާއި ކަރަންޓު އުފައްދާ މަރުކަޒުތައް ހިމެނޭހެން އިތުރު ހަމަލާތަކެއް ދީފާނެ ކަމުގެ އިންޒާރު ދެއްވާފައެވެ. ޓްރަމްޕްގެ މި ބަޔާނާއެކު ކުރިއަށް އޮތް ދުވަސްތަކުގައި އަސްކަރީ ކުރިމަތިލުންތައް އިތުރުވެގެންދާނެ ކަމަށް ބެލެވެއެވެ.

މި ހަނގުރާމައިގެ އަސަރު އަވަށްޓެރި ގައުމުތަކަށްވެސް ދަނީ ކުރަމުންނެވެ. އެގޮތުން ލުުބުނާނުގެ ދެކުނަށާއި އިރުމަތީ ސަރަހައްދުތަކަށް އިސްރާއީލުން ދެމުންދާ ހަމަލާތަކުގައި ގިނަ ބަޔަކު މަރުވެ، ބޮޑެތި ގެއްލުންތަކެއް ވަނީ ލިބިފައެވެ. އަދި ކުވެއިތު ފަދަ ގައުމުތަކުގެ ތެޔޮ ސާފުކުރާ ތަންތަނަށްވެސް ޑްރޯން ހަމަލާތައް އަމާޒުވަމުންދާތީ، މުޅި ސަރަހައްދުގެ އިގްތިސާދަށް މިކަމުގެ ނުރައްކާ ވަނީ ކުރިމަތިވެފައެވެ.

މައްސަލަ ހައްލުކުރުމަށް ކުރެވޭ ޑިޕްލޮމެޓިކް މަސައްކަތްތަކުގައި ބައިވެރިވުމަށް އީރާނުން ވަނީ އިންކާރުކޮށްފައެވެ. މީގެ ސަބަބުން ސަރަހައްދީ ހަމަޖެހުމަށް އޮތް ބިރުވެރިކަން ވަނީ އިތުރަށް ބޮޑުވެފައެވެ.