ޒުވާނުންނަށް ހާޓް އެޓޭކް ޖެހުން އިތުރުވަނީ ޒަމާނީ ދިރިއުޅުމުގެ އާދަތަކުގެ ސަބަބުން: މާހިރުން

މެޑިކާނާ ޒިންސިރްލިކުޔޫ ހޮސްޕިޓަލުގެ ކާޑިއޮލޮޖީ ސްޕެޝަލިސްޓް ޑރ. މެހްމެތު މުސްތަފާ ކޭން ވަނީ، ފަހަކަށް އައިސް ޒުވާން އުމުރުފުރާގެ މީހުންނަށް ހާޓް އެޓޭކް ޖެހޭ މިންވަރު އިތުރުވަމުންދާކަން ފާހަގަކުރައްވާފައެވެ.

ޚާއްޞަކޮށް އުމުރުން 30 ގެ އަހަރުތަކުގައި އުޅޭ މީހުންގެ މެދުގައި މި ބަލި އިތުރުވަނީ ދިރިއުޅުމުގެ އާދަކާދަތަކާ ސީދާ ގުޅުންހުރި ކަންކަމާ ހުރެކަން ފާހަގަކުރައްވައި، މިއީ އާންމު ސިއްހަތަށް އޮތް ސީރިއަސް ނުރައްކަލެއްގެ ގޮތުގައި އޭނާ ސިފަކުރެއްވިއެވެ. ޒުވާނުންނަށް ގިނަ ފަހަރަށް މޭގައި ރިއްސުމާއި، ނޭވާ ކުރުވުމާއި، ހިތް ތަޅުވާ ފަދަ އަލާމާތްތަކަށް ފަރުވާކުޑަކުރެވޭކަން ފާހަގަކުރައްވައި، ބަލި އަވަހަށް ދެނެގަނެވިއްޖެނަމަ ފުރާނަ ސަލާމަތްކުރެވޭނެކަން ޑރ. ކޭން ހަނދާންކޮށްދެއްވިއެވެ.

އަދި ސިއްހަތަށް ފައިދާހުރި ކާނާ ކެއުމާއި، ގަވާއިދުން ކަސްރަތުކުރުމާއި، ސްޓްރެސް މެނޭޖްކުރުމުގެ ސަބަބުން ހާޓް އެޓޭކުން ބޮޑުތަނުން ރައްކާތެރިވެވޭނެ ކަމަށާއި، ގަވާއިދުން މެޑިކަލް ޗެކަޕް ހެދުމަށް އިހުމާލުވެގެން ނުވާނެ ކަމަށް އޭނާ ވިދާޅުވިއެވެ.

30 ގެ އަހަރުތަކުގައި ކަންބޮޑުވާންޖެހޭ ހާލަތެއް ޑރ. ކޭން ވިދާޅުވި ގޮތުގައި ފަހަކަށް އައިސް ހާޓް އެޓޭކް ފެންނަނީ ހަމައެކަނި އުމުރުން ދުވަސްވީ މީހުންގެ ކިބަޔަކުން ނޫނެވެ. އުމުރުން 30 އަދި 20 ގެ އަހަރުތަކުގައި އުޅޭ މީހުންގެ ކިބައިން ވެސް މިކަން ދަނީ ފެންނަމުންނެވެ.

މި ބަދަލު އައުމުގެ މައިގަނޑު ސަބަބަކީ ޒަމާނީ ދިރިއުޅުމުގެ އާދަތައް ކަމަށާއި، ޒުވާން އުމުރުގައި ހާޓް އެޓޭކް ޖެހުމުގެ ނުރައްކާ މިހާރު އޮތީ އަޅާނުލާ ދޫކޮށްލެވޭ ވަރަށް ވުރެ މަތީ މިންވަރެއްގައި ކަމަށް އޭނާ ވިދާޅުވިއެވެ.

ހަރަކާތްތެރިކަން ކުޑަވުމާއި، ފާސްޓް ފުޑަށް ބަރޯސާވުމާއި، ބުރަ މަސައްކަތުގެ ތާވަލުތަކާއި، ދާއިމީކޮށް ސްޓްރެސްވުމަކީ ހިތުގެ ސިއްހަތަށް އޮތް ބޮޑު ނުރައްކަލެއްކަން ފާހަގަކުރައްވަމުން، ޑެސްކް ޖޮބް އަދާކުރާ ޒުވާނުންގެ މެދުގައި މި ނުރައްކާ މާ ބޮޑު ކަމަށް އޭނާ ވިދާޅުވިއެވެ.

އޭނާ ވިދާޅުވީ: "ދުވާލު ގަޑީގައި ހަރަކާތްތެރިކަން ކުޑަ، ކެއުމުގެ އާދަތައް ނުބައި، އަދި މާ ބޮޑަށް ސްޓްރެސްވާ މީހުންނަށް މާ ކުރީ އުމުރެއްގައި ހިތުގެ ބަލިތައް ޖެހުމުގެ ފުރުސަތު ބޮޑެވެ."

ދުންފަތުގެ އިސްތިއުމާލުކުރުމާއި އެނާޖީ ޑްރިންކްސްގެ ސަބަބުން ނުރައްކާ އެތައް ގުނައެއް އިތުރުވޭ ޒުވާނުންގެ މެދުގައި އާންމުވަމުންދާ ދުންފަތުގެ އިސްތިއުމާލުކުރުން، ޚާއްޞަކޮށް އިލެކްޓްރޯނިކް ސިނގިރޭޓާއި، އެނާޖީ ޑްރިންކްސްގެ ސަބަބުން ހިތުގެ ރިދަމަށް ނޭދެވޭ އަސަރުކުރާ ކަމަށް ޑރ. ކޭން ވިދާޅުވިއެވެ.

މީގެ އިތުރުން، މާ ގިނައިން ކެފެއިން ބޭނުންކުރުމަކީ ހިތަށް ކުއްލި އަދި ސީރިއަސް އަސަރުތަކެއް ކޮށްފާނެ ކަމެއްކަން އޭނާ ފާހަގަކުރެއްވިއެވެ. 'ގަވާއިދުން ޗެކަޕް ހެދުމަކީ ފުރާނަ ސަލާމަތްކޮށްދޭ ކަމެއް' ހާޓް އެޓޭކް ޖެހުމުން އަބަދުވެސް މޭގައި ވަރަށް ބޮޑަށް ރިއްސާނެ ކަމަށް ހީކުރުމަކީ ކުށްހީއެއް ކަމަށާއި، ޒުވާނުންގެ ކިބައިން ފެންނަ އަލާމާތްތައް މާ ކުޑަވެދާނެ ކަމަށް ޑރ. ކޭން ވިދާޅުވިއެވެ.

މެއަށް ބަރުވުމާއި، ނޭވާ ކުރުވުމާއި، ހިތް ތަޅުވުމާއި، ކުއްލިއަކަށް ވަރުބަލިވުމާއި، ފިނި ދާހިއްލުން ފަދަ ކަންކަމަކީ ސީރިއަސްކޮށް ވިސްނަންޖެހޭ ކަންކަމެވެ.

 އޭނާ ވިދާޅުވީ: "ޒުވާނުން ގިނަ ފަހަރަށް މި އަލާމާތްތަކަކީ ވަރުބަލިވުން ނުވަތަ ސްޓްރެސް ކަމަށް ބަލައި ޑޮކްޓަރަށް ނުދައްކާ ތިބެއެވެ. ނަމަވެސް، އަވަހަށް ފަރުވާ ހޯދުމަކީ ފުރާނަ ސަލާމަތްކޮށްދޭ ކަމެކެވެ."

 އާއިލާގައި ހިތުގެ ބަލި ހުންނަ މީހުން މިއަށްވުރެ ބޮޑަށް ސަމާލުވާންޖެހޭނެ ކަމަށާއި، ދޭތެރެ ދޭތެރެއިން ހިތުގެ ޗެކަޕް ހެދުމުން ކުރިއަށް އޮތް ނުރައްކާތައް ދެނެގަނެވޭނެ ކަމަށް ވެސް އޭނާ ވިދާޅުވިއެވެ.

'ހިތް ރައްކާތެރިކުރުން އޮތީ ތިބާގެ އަތްމަތީގައި'

 ހާޓް އެޓޭކުން ރައްކާތެރިވުމަކީ ކުރެވިދާނެ ކަމެއްކަން ފާހަގަކުރައްވައި، ޑރ. ކޭން ދެއްވި އިރުޝާދުތަކަކީ: "ގަވާއިދުން ކަސްރަތުކުރުން، ހަމަހަމަ ކާނާއެއް ކެއުން، ދުންފަތުގެ އިސްތިއުމާލުކުރުމާ ދުރުހެލިވުން، ވީހާވެސް ބޮޑަށް ސްޓްރެސް ކުޑަކުރުން އަދި އެކަށީގެންވާ ވަރަށް ނިދި ހޯދުމެވެ."

އޭނާ ވާހަކަ ނިންމާލަމުން ވިދާޅުވީ: "ތިބާގެ ހިތް ރައްކާތެރިކުރުމަށްޓަކައި ކުދި ނަމަވެސް ފައިދާހުރި ފިޔަވަޅުތަކެއް އެޅިދާނެއެވެ."ހަނދާން ބަހައްޓަންޖެހޭ ކަމަކީ، ހިތުގެ ދުޅަހެޔޮކަމަކީ ދިރިއުޅުމުގެ ފެންވަރު ރަނގަޅުވުމުގެ އަސާސް ކަމެވެ.