ސްޓެލްކޯގެ އެމްޑީގެ މަޤާމަށް ވަޤުތީގޮތުން އެ ކުންފުނި ހިންގުމާ ހަވާލުވެ ހުންނެވި އަޒްވަރު ޢައްޔަނުކުރައްވައިފި

ސްޓެލްކޯގެ އެމްޑީގެ މަޤާމަށް ވަޤުތީގޮތުން އެ ކުންފުނި ހިންގުމާ ހަވާލުވެ ހުންނެވި އަޒްވަރު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު، (ޕީސީބީ) އިން ޢައްޔަނުކުރައްވައިފިއެވެ.

ޕީސީބީ އިން އެކްސް ގައި ހިއްސާކުރެއްވި ޕޯސްޓެއްގައި ބުނެފައިވަނީ، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިންގ ޑިރެކްޓަރުގެ މަޤާމަށް ބޭފުޅަކު ޢައްޔަނުކޮށްފައިވާ ކަމަށެވެ. އެގޮތުން، އެ މަޤާމަށް ޢައްޔަނުކޮށްފައި ވަނީ،  ސ. ފޭދޫ / ނެސްޕްރޯވިލާ، ޑރ. އަލީ އަޒްވަރު ކަމަށް ޕީސީބީ އިން ވަނީ ބުނެފައެވެ.

ސްޓޭޓް އިލެކްޓްރިކް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރުގެ މަޤާމަށް، ސ. ފޭދޫ / ނެސްޕްރޯވިލާ، ޑރ. އަލީ އަޒްވަރު، 28 އެޕްރިލް 2026 ވަނަ ދުވަހުން ފެށިގެން ވަނީ އައްޔަނުކޮށްފައެވެ. pic.twitter.com/mnRHo6Ou2W

— Privatization & Corporatization Board (@pcb_gov) April 28, 2026

ސްޓެލްކޯގެ ހިންގުން ވަގުތީ ގޮތުން އެންމެ ފުރަތަމަ އޭރުގެ ޑެޕިއުޓީ މެނޭޖިން ޑިރެކްޓަރު ޑރ. އަލީ އަޒުވަރާ ހަވާލުކޮށްފައިވަނީ، އޭރު އެ ކުންފުނީގެ މެނޭޖިން ޑިރެކްޓަރުގެ މަޤާމުގައި ހުންނެވި އަހުމަދު ޝަމާހު ރަޝީދު އެ މަޤާމުން ވަކިކުރުމާ ގުޅިގެންނެވެ. ޝަމާހު މަޤާމުން ވަކިކޮށްފައި ވަނީ، އޭނާގެ އަޑު ކަމަށް ބެލެވޭ މީހަކު ސްޓެލްކޯ މެދުވެރުކޮށް ނާޖާއިޒު ފައިދާ ނަގާކަމަށް ބުނެ ވާހަކަ ދައްކާ އޯޑިއޯއެއް ލީކުވެފައިވާ ދަނޑިވަޅެއްގައެވެ.

މި ސަރުކާރުގައި، ފުރަތަމަ ސްޓެލްކޯ އެމްޑީގެ މަޤާމު ފުރުއްވި ހުސެއިން ފަހުމީ މިހާރު ހުންނަވަނީ އެމް.ޑަބްލިޔު.އެސް.ސީ ގެ މެނޭޖިންގ ޑިރެކްޓަރުގެ މަޤާމުގައެވެ.