އާއިލާ: އަތުން ބީވިޔަނުދީ ހިފަހައްޓަންވީ ހަޔާތުގެ އެންމެ އަގުބޮޑު ޚަޒާނާ

ކޮންމެ އަހަރެއްގެ މޭ މަހުގެ 15 ވަނަ ދުވަހަކީ ބައިނަލްއަޤުވާމީ ގޮތުން ފާހަގަކުރާ އާއިލާތަކުގެ ދުވަހެވެ. މިއީ ހަމައެކަނި ކަލަންޑަރުގައި ޖަހާލެވިފައިވާ ރަމްޒީ ތާރީޚެއް ނޫނެވެ. މިއީ އިންސާނީ ހަޔާތުގެ އެންމެ މުހިންމު އެއް ބިންގާ ކަމުގައިވާ "އާއިލާ" ގެ މަތިން ހަނދާންކޮށްދޭ ދުވަހެކެވެ. ހަލުވިކަމާއެކު ބަދަލުވަމުންދާ މި ދުނިޔޭގައި، ޓެކްނޮލޮޖީއަށް ބަރޯސާވެ، އަމިއްލަ ޒިންމާތައް އިތުރުވަމުންދާއިރު، އާއިލީ ގުޅުންތަކަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. އާއިލާގެ މެންބަރުން އެކުގައި ހޭދަކުރާ ވަގުތު މަދުވެ، މުއާމަލާތް ކުރުމާއި އެކަކު އަނެކަކަށް ފަހުމްވުން ވަނީ ކުޑަވެފައެވެ. ނަމަވެސް، އިޖުތިމާއީ އަދި ޓެކްނޮލޮޖީއަށް ކިތަންމެ ބޮޑު ބަދަލެއް އައި ކަމުގައިވިޔަސް، އާއިލާއަކީ ދިރިއުޅުމުގެ ފުރަތަމަ މަދަރުސާއެވެ. އެއީ ލޯތްބާއި، އަޚުލާޤާއި، އިންސާނީ ކަރާމާތް ދަސްކޮށްދޭ ފުރަތަމަ މަރުކަޒެވެ.

އދ. އިން 1993 ވަނަ އަހަރު މި ދުވަސް ކަނޑައެޅީ އާއިލާގެ މުހިންމުކަން ހާމަކުރުމަށާއި، ދުނިޔޭގެ އެކި ކަންކޮޅުތަކުގައި އާއިލާތަކަށް ކުރިމަތިވާ އިޖުތިމާއީ، އިޤުތިޞާދީ އަދި ސަގާފީ ގޮންޖެހުންތަކަށް ހޭލުންތެރިކަން އިތުރުކުރުމަށެވެ. މި ދުވަހުން ދޭ މުހިންމު މެސެޖަކީ ބަދަހި އާއިލާތަކަކީ ވަރުގަދަ މުޖުތަމައެއްގެ ފެށުން ކަމެވެ.

އާއިލާއަކީ ހަމައެކަނި އެއް ފުރާޅެއްގެ ދަށުގައި ދިރިއުޅޭ ބައެއް ނޫނެވެ. އެއީ ލޯތްބާއި، ގުރުބާނީއާއި، އިތުބާރާއި، ކެތްތެރިކަމުގެ މައްޗަށް ބިނާވެފައިވާ މުޤައްދަސް ގުޅުމެކެވެ. ދުޅަހެޔޮ އާއިލާއެއްގެ ތެރެއިން ކޮންމެ މީހަކަށްވެސް ނަފްސާނީ ހަމަޖެހުމާއި، ހިތްވަރާއި، އިރުޝާދު ލިބެއެވެ. މައިންބަފައިންނަކީ އަޚުލާޤާއި، އޯގާތެރިކަމާއި، އަދަބުވެރިކަން ދަސްކޮށްދޭ ފުރަތަމަ މުދައްރިސުންނެވެ. ކުއްޖަކު ބޮޑުވެގެން އަންނައިރު އޭނާގެ ޝަޚުޞިއްޔަތު ބައްޓަންވަނީ ގޭތެރެއިން ލިބޭ ތަރުބިއްޔަތުގެ މައްޗަށެވެ.

މި މުހިންމު މަސައްކަތުގައި މަންމަ އާއި ބައްޕަގެ ދައުރަކީ އެހެން އެއްވެސް ފަރާތަކަށް އަދާނުކުރެވޭނެ ވަރުގަދަ ދައުރެކެވެ. މަންމަގެ ލޯތްބަކީ އާއިލާއަށް ލިބޭ ހިތްހަމަޖެހުމާއި ކުލުނުގެ ބިންގަލެވެ. މަންމަގެ ގުރުބާނީތަކަކީ އާއިލާ އެކަތިގަނޑެއްގެ ގޮތުގައި ހިފަހައްޓައިދޭ ހިމޭން ބާރެވެ. ހަމައެފަދައިން، ބައްޕައަކީ އާއިލާގެ ރައްކާތެރިކަމާއި، އިރުޝާދާއި، އަދަބުވެރިކަން ދަސްކޮށްދިނުމުގައި އެންމެ މުހިންމު ތަނބެވެ. ދެމަފިރިންގެ ލޯތްބާއި އަޅާލުން ލިބިގެން ބޮޑުވާ ކުއްޖަކީ އަމިއްލަ ނަފްސަށް އިތުބާރު އޮތް، ނަފްސާނީ ގޮތުން ދުޅަހެޔޮ ކުއްޖަކަށް ވާނެއެވެ.

ނަމަވެސް، އާއިލާއެއްގެ ތެރޭގައި މައްސަލަތައް ޖެހި، އަޅާލުން ކުޑަވެ، ނުވަތަ ނަފްސާނީ ގޮތުން ދުރުކަމެއް އަތުވެއްޖެނަމަ، އޭގެ އެންމެ ބޮޑު އަސަރެއް ކުރަނީ ކުޑަކުދިންނަށެވެ. އެކުދިން އެމީހުންގެ ހިތާމަ ބޭރަށް ފާޅުނުކުރި ކަމުގައިވިޔަސް، އޭގެ ސަބަބުން ނަފްސާނީ ގޮތުން ދިގުމުއްދަތުގެ އަސަރުތަކެއް ކުރެއެވެ. ގޭތެރޭގައި އަބަދު ޒުވާބުކުރުމާއި، މައިންބަފައިން ވަކިވުމާއި، މުއާމަލާތް ކުރުން މަދުވުމަކީ ކުދިން ބިރުގަނެ، އެކަހެރިވާން މެދުވެރިވާ ކަންކަމެވެ.

އާއިލީ ހަމަނުޖެހުމުގެ ތެރޭގައި ބޮޑުވާ ކުދިން ތައުލީމީ ގޮތުންނާއި އިޖުތިމާއީ ގޮތުން ފަހަތަށް ދިއުމަކީ އެކަށީގެންވާ ކަމެކެވެ. އެހެންކަމުން، އާއިލާއެއްގެ ތެރޭގައި އަމާންކަމާއި ލޯތްބާއި އެހީތެރިކަން ޤާއިމުކުރުމަކީ ހަމައެކަނި މިއަދަށް މުހިންމު ކަމެއް ނޫނެވެ. އެއީ މުސްތަޤުބަލުގެ ޖީލު ބިނާކުރުމަށްޓަކައި ކުރަންޖެހޭ ކަމެކެވެ.

މީގެ އިތުރުން، އާއިލާގެ ތެރޭގައި ހިމެނޭ ދޮށީ އުމުރުގެ މައިންބަފައިންގެ މަތިން ހަނދާން ނައްތާލައިގެން ނުވާނެއެވެ. މިއަދުގެ ބައެއް އާއިލާތަކުގައި މުސްކުޅި މައިންބަފައިން ގޭގައި ތިބި ނަމަވެސް، އެމީހުންނަށް ދޭންޖެހޭ ލޯތްބާއި ސަމާލުކަން ނުދެވޭތަން ފެނެއެވެ. ދަރިން ބޮޑުކުރުމަށްޓަކައި މުޅި އުމުރު ގުރުބާންކުރި މައިންބަފައިންނަށް އިޙުތިރާމްކޮށް، އާއިލީ ކަންކަމުގައި އެމީހުން ބައިވެރިކުރުވަން ޖެހެއެވެ. އެމީހުންގެ ތަޖުރިބާއާއި އިރުޝާދަކީ ކޮންމެ އުމުރެއްގައިވެސް އަގުހުރި އެއްޗެކެވެ.

އާއިލީ ގުޅުން ބަދަހިކުރުމަކީ އުނދަގޫ ކަމެއް ނޫނެވެ. އެކުގައި ކެއުމާއި، ކަންކަމުގައި މަޝްވަރާކުރުމާއި، އެކަކު އަނެކަކަށް ކަނުލައި އަޑުއެހުމާއި، ފޯނާއި ޓެކްނޮލޮޖީއާ ދުރުވެ ވަގުތުކޮޅެއް ހޭދަކޮށްލުމަކީ ގުޅުން ވަރުގަދަވާނެ ކަންކަމެވެ. އާއިލާއެއް ވަރުގަދަވަނީ އަމިއްލައަކަށް ނޫނެވެ. އެއީ އެކަކު އަނެކަކަށް މަޢާފުކުރުމާއި، ދެނެގަތުމާއި، އަޅާލުމުގެ ތެރެއިންނެވެ.

މިއަދުގެ މުޖުތަމައު ކާމިޔާބީ މިނަނީ މުއްސަނދިކަމާއި، ވަޒީފާގެ ކުރިއެރުމުންނެވެ. ނަމަވެސް، އާއިލީ ގުޅުންތައް ރަނގަޅު ނޫންނަމަ، ހަޤީޤީ ކާމިޔާބީއެއް ނުލިބޭނެއެވެ. މީހަކު ބޭރު ދުނިޔޭގައި ކިތަންމެ މޮޅުވިޔަސް، ގޭތެރޭގައި ލޯތްބާއި ހަމަޖެހުން ނެތްނަމަ އެމީހެއްގެ ހިތް އޮންނާނީ ހުސްކަމެއްގެ ތެރޭގައެވެ. އިންސާނަކަށް ލިބޭނެ އެންމެ ވަރުގަދަ އެހީތެރިޔަކީ އޭނާގެ އާއިލާއެވެ.

ބައިނަލްއަޤުވާމީ އާއިލާތަކުގެ ދުވަހު އަޅުގަނޑުމެން އަޒުމް ކަނޑައަޅަންވީ، އަޅުގަނޑުމެންނާ އެންމެ ގާތް މީހުންގެ އަގު ވަޒަންކުރުމަށެވެ. ހަނދާން ބަހައްޓަންވީ ކަމަކީ، ކުޑަކުދިންނަށް މާ

މާއްދީ ތަކެއްޗަށްވުރެ ބޮޑަށް ބޭނުންވަނީ ލޯތްބާއި އަޅާލުން ކަމެވެ. މައިންބަފައިންނަށް ބޭނުންވަނީ ހަމައެކަނި ބަސްތަކަކުން އިޙުތިރާމް ކުރުމުގެ ބަދަލުގައި އަމަލީ ގޮތުން އެކަން ދެއްކުމެވެ. އަދި އާއިލާއަކަށް ޓެކްނޮލޮޖީއަށްވުރެ ބޮޑަށް ބޭނުންވަނީ އެކަކު އަނެކަކަށް ހުސްކޮށްލާ ވަގުތެވެ. މިއަދު އަޅުގަނޑުމެން ބަދަހި އާއިލާތަކެއް ބިނާކުރުމަކީ، މާދަމާގެ ޖީލަކީ ދުޅަހެޔޮ، އޯގާތެރި އަދި ހަމަޖެހޭ ޖީލަކަށް ހެދުމަށް އެޅޭ އެންމެ މުހިންމު ފިޔަވަޅެވެ.

މި ދުވަސް އަޅުގަނޑުމެންނަށް ހަނދާންކޮށްދެނީ އަޅުގަނޑުމެންގެ އާއިލާތަކުގެ އަގުވަޒަންކުރުމަށެވެ. ގުޅުންތައް ބަދަހިކޮށް، އޯގާތެރިކަމާއި، ކުލުނާއި، އެއްބައިވަންތަކަމުން ފުރިގެންވާ ގެދޮރުތަކެއް ބިނާކުރުމަށެވެ. ސަބަބަކީ އާއިލާތައް ބަދަހިވި ވަރަކަށް، މުޅި މުޖުތަމައުވެސް އެކަމުގެ ސަބަބުން ވަރުގަދަވެގެންދާނެތީއެވެ. އާއިލާއަކީ މުޅި އިންސާނިއްޔަތުގެ ހިތެވެ. އެ ހިތް ދުޅަހެޔޮކޮށް ބޭއްވުމަކީ އަޅުގަނޑުމެން ކޮންމެ މީހެއްގެވެސް ފަރުދީ ޒިންމާއެކެވެ.