އުކުޅަހުގައި ތަރައްޤީކުރާ ފުލުހުންގެ މަރުކަޒުގެ %75 މަސައްކަތް ނިންމާލައިފި

އއ. އުކުޅަހުގައި ތަރައްޤީކުރާ ފުލުހުންގެ މަރުކަޒުގެ %75 މަސައްކަތް އެއްކޮށް ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ވިދާޅުވެއްޖެއެވެ.

އެމްޓީސީސީން ވިދާޅުވީ، އުކުޅަސް ފުލުހުންގެ މަރުކަޒު ތަރައްޤީކުރުމުގެ މަޝްރޫޢުގެ ދަށުން ރޭނުމުގެ މަސައްކަތްތައް ނިމިފައިވާއިރު، މިހާރު ކުރިއަށް ދަނީ ފުރާޅު އަޅައި ހިޔާ ކުރުމުގެ މަސައްކަތް ކަމަށެވެ.

މި ދެއަހަރު ދުވަހުގެ ތެރޭގައި ރާއްޖޭގެ ހުރިހާ ރަށެއްގައި ފުލުހުންގެ މަރުކަޒުތައް ޤާއިމުކޮށް ދިވެހި ފުލުހުންގެ ޚިދުމަތް ޤާއިމުކުރުމަކީ ސަރުކާރުގެ އަމާޒެކެވެ. އެގޮތުން، މިހާރު 63 ރަށުގައި ފުލުހުންގެ އަމިއްލަ އިމާރާތެއް އެޅުމުގެ މަސައްކަތް އަންނަނީ ކުރަމުންނެވެ. އަދި އިމާރާތް އެޅުމަށް ބަޔަކާ ހަވާލުކޮށް މަސައްކަތް ފެށުމަށް ތައްޔާރުވެފައިވާ 36 ރަށް މިވަގުތު އެބައޮތެވެ. އެހެންކަމުން ޖުމްލަ 99 ރަށުގައި ފުލުހުންގެ އަމިއްލަ އިމާރާތެއް އެޅުމުގެ މަސައްކަތް މިހާރު ވެސް ދަނީ ކުރެވެމުންނެވެ. 

Project Update: Development of Police Station in Aa. Ukulhas

We have completed masonry works of the police building. Roof truss and rafter installation works are ongoing with 75% completion.

Follow more updates at: https://t.co/SfVAzkW2pp #MTCCProjects #TeamMTCC… pic.twitter.com/L3wa2BcoMo

— MTCC Plc (@MTCCPlc) May 17, 2026

މީގެ އިތުރުން، މިދިޔަ އޮކްޓޫބަރު މަހުގެ ތެރޭގައި އިތުރު 39 ރަށެއްގައި ފުލުހުންގެ އަމިއްލަ އިމާރާތް އެޅުމުގެ މަސައްކަތް ކޮންޓްރެކްޓަރުންނާ ހަވާލުކުރައްވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިޢުލާން ކުރައްވާފައެވެ. މިއާއެކު ޖުމްލަ 138 ރަށުގައި ފުލުހުންގެ އަމިއްލަ އިމާރާތް އެޅުމުގެ މަޝްރޫޢުތައް ދަނީ ހިނގަމުންނެވެ.

ރާއްޖޭގެ މީހުން ދިރިއުޅޭ ހުރިހައި ރަށެއްގައި ފުލުހުންގެ ޚިދުމަތް ޤާއިމުކުރުމަކީ މުޖުތަމަޢުގެ ރައްކާތެރިކަމާއި އަމާންކަން ކަށަވަރުކުރުމަށް މުހިންމު ފިޔަވަޅެކެވެ. ވީމާ، ސަރުކާރުން މިކަމަށް ޚާއްޞަ އިސްކަމެއް ދެއްވައެވެ.