ބެން-ގްވީރުގެ ވީޑިއޯއާއެކު އިޒްރޭލުގެ މިލިއަން ޑޮލަރުގެ 'ހަސްބަރާ' ކެމްޕޭން ފުނޑުފުނޑުވެއްޖެ

ޣައްޒާގެ ހިސާރުކޮށްގެން ތިބިތިބުން މުގުރާލުމަށް ދަތުރުކުރި ފްލޮޓިލާ އެކްޓިވިސްޓުން ހައްޔަރުކޮށް، އެމީހުންނަށް ފުރައްސާރަކުރާ މަންޒަރު ފެންނަ ވީޑިއޯއެއް އިސްރާއިލްގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގްވީރު އާންމުކުރުމާ ގުޅިގެން، އިސްރާއިލުން ދުނިޔެއަށް ދައްކަމުން އައި ރީތި ތަަސްވީރު ނުވަތަ "ހަސްބަރާ" ކެމްޕޭނަށް ބޮޑު ގޮންޖެހުމަކާ ކުރިމަތިވެއްޖެއެވެ.

އެކްސްގައި އާންމުކުރި މި ވީޑިއޯއިން ފެންނަނީ އަޝްދޮދު ބަނދަރުގައި، ލޯމަތީގައި ފޮތިގަނޑު ބަނދެ، އަތްފައި ބަނދެފައި ތިބި އެކްޓިވިސްޓުންގެ ކުރިމަތީގައި ބެން-ގްވީރު މަލާމާތްކޮށް އުފާފާޅުކުރާ މަންޒަރެވެ.

ސައިޕްރަސް ކައިރިން ބައިނަލްއަޤުވާމީ ކަނޑުގެ ސަރަޙައްދުން އިސްރާއިލްގެ އަސްކަރިއްޔާއިން ވަނީ 430 އެކްޓިވިސްޓުން ޣައިރު ޤާނޫނީ ގޮތެއްގައި ހައްޔަރުކޮށްފައެވެ. މީގެތެރެއިން 87 މީހަކު މިހާރު ވަނީ އިސްރާއިލްގެ ޖަލުތަކުގައި ތިބި 9،500 އަށްވުރެ ގިނަ ފަލަސްޠީނު އަސީރުންނާ ބައިވެރިވުމުގެ ގޮތުން ބަނޑުހައިހޫނުކަމުގެ ހަޅުތާލެއް ފަށާފައެވެ. މި ހާދިސާއާ ގުޅިގެން އިޓަލީ، ފްރާންސް، ނެދަލޭންޑްސް، ކެނެޑާ އަދި ސްޕެއިން ފަދަ ޤައުމުތަކުން ވަނީ އިސްރާއިލްގެ ސަފީރުން ހާޒިރުކޮށް، އިންސާނީ ކަރާމާތަށް އަރައިގަތުމުގެ މި އަމަލު ކުށްވެރިކޮށްފައެވެ.

'ހަސްބަރާ' އިލިއުޝަންގެ ނިމުން

ކަމާބެހޭ މާހިރުން ފާހަގަކުރާ ގޮތުގައި، ބޮޑުވަޒީރު ބެންޖަމިން ނަތަންޔާހޫ އެކްޓިވިސްޓުން އަވަހަށް ޑީޕޯޓްކޮށްލުމަށް ކުރި މަސައްކަތަކީ އިންސާނީ ހަމްދަރުދީއެއް އޮވެގެން ކުރި ކަމެއް ނޫނެވެ. އެއީ އިޒްރޭލުގެ އަގު ދުނިޔޭގެ ކުރިމަތީގައި ވެއްޓިގެން ދިޔުމުން އެކަން އޮއްބާލުމަށް ކުރި މަސައްކަތެކެވެ. އިސްރާއިލުން ދަނީ އެ ޤައުމުގެ އަސްކަރީ އަމަލުތައް ދިފާއުކުރުމަށް "ހަސްބަރާ" ގެ ނަމުގައި ބޮޑު ޕްރޮޕެގެންޑާ ކެމްޕޭނެއް ހިންގަމުންނެވެ. މި ކެމްޕޭނަށް ކުރާ ހޭދަ 2026 ވަނަ އަހަރާ ހަމައަށް 700 މިލިއަން ޑޮލަރަށް އިތުރުކުރުމަށް ވަނީ ރޭވިފައެވެ.

އަލް-ޝަބަކާގެ ޕޮލިސީ ފެލޯ ފަތުހީ ނިމްރު ބުނި ގޮތުގައި، ނަތަންޔާހޫއަށް މިއީ ޕަބްލިކް ރިލޭޝަންސް މައްސަލައެކެވެ. "ނަތަންޔާހޫއަށް މައްސަލައަކީ އެކްޓިވިސްޓުންނަށް ކުރި އަނިޔާއެއް ނޫން، އެ މަންޒަރު ދުނިޔެއަށް ދެއްކުން،" އޭނާ ވިދާޅުވިއެވެ. ނަމަވެސް ބެން-ގްވީރު ފަދަ ހަރުކަށި މިނިސްޓަރުން ބޭނުންވަނީ އެގައުމުގެ އެތެރޭގެ ހަރުކަށި ފިކުރުގެ މީހުންގެ ތާއީދު ހޯދުމަށް މިފަދަ އަނިޔާވެރި އަމަލުތައް ދެއްކުމަށެވެ.

އެމެރިކާގެ ދެފުށްގެންގެންގުޅޭ ސިޔާސަތު

މި ހާދިސާއާ ގުޅިގެން އެމެރިކާއިން އިސްރާއިލަށް ކަނޑައަޅާފައި ހުންނަވާ ސަފީރު މައިކް ހަކަބީ ވަނީ ބެން-ގްވީރުގެ އަމަލު ކުށްވެރިކުރައްވާފައެވެ. ނަމަވެސް، ހަމަ އެ ދުވަސްވަރު އެމެރިކާގެ ޓްރެޜަރީން ވަނީ ފްލޮޓިލާ އިންތިޒާމުކުރި ފަރާތްތަކަކީ "ޓެރަރިޒަމަށް ތާއީދުކުރާ" ބައެއް ކަމަށް ބުނެ އެމީހުންނާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. މިއީ އެމެރިކާއިން ގެންގުޅޭ ދެފުށްގެންގެންގުޅޭ ސިޔާސަތެއްކަމަށް ގިނަ ބަޔަކު ދަނީ ބުނަމުންނެވެ.

ފަލަސްޠީނުގެ ނޭޝަނަލް އިނިޝިއޭޓިވްގެ ސެކްރެޓަރީ ޖެނެރަލް މުސްޠަފާ ބަރްޣޫތީ ވިދާޅުވީ، ބައިނަލްއަޤުވާމީ އެކްޓިވިސްޓުންނަށް ކުރި މި އިހާނެތިކަމަކީ ފަލަސްޠީނުގެ އަސީރުން ކޮންމެ ދުވަހަކު ތަހައްމަލުކުރާ އަނިޔާގެ ކުޑަ މިންވަރެއް ކަމަށެވެ. 2023 އޮކްޓޯބަރުގެ ފަހުން އިސްރާއިލްގެ ބަންދުގައި ތިއްބާ 100 އެއްހާ ފަލަސްޠީނު މީހުން މަރުވެފައިވާކަމަށް ރިޕޯޓްތައް ބުނެއެވެ.