އޮސްޓްރޭލިއާގައި ކުޑަކުދިންނަށް ސޯޝަލް މީޑިއާ މަނާކުރާ ބިލް ތަސްދީގުކުރުން ލަސްކޮށްދިނުމަށް އެދިއްޖެ

އޮސްޓްރޭލިއާގައި ކުޑަކުދިންނަށް ސޯޝަލް މީޑިއާ މަނާކުރާ ބިލް ތަސްދީގުކުރުން ލަސްކޮށްދިނުމަށް، ގޫގުލް އާއި މެޓާ ޕްލެޓްފޯމްސް އިން އެ ގައުމުގެ ސަރުކާރުގައި އެދިއްޖެއެވެ. އެ ބިލަކީ 16 އަހަރުން ދަށުގެ ކުދިންނަށް ސޯޝަލް މީޑިއާގެ ގިނަ ބާވަތްތައް ބޭނުންކުރުން މަނާ ކުރާނެ ބިލެކެވެ. ގޫގުލްއާއި މެޓާއިން އެދުނީ، މި ބިލުގެ ސަބަބުން ކުރިމަތިވެދާބެ ގޮންޖެހުންތައް އިތުރަށް ދިރާސާ ކުރުމަށެވެ.

ސޯޝަލް މީޑިއާގެ ޕްލެޓްފޯމްތައް ގެންގުޅޭ ބޮޑު ދެ ކުންފުނިން މިހެން އެދުނުއިރު، އޮސްޓްރޭލިއާގެ ޕްރައިމް މިނިސްޓަރ އެންތޮނީ އަލްބަނީސްގެ ސަރުކާރުން ބޭނުންވަނީ މި އަހަރަށް މަޖިލިސް ނިންމާލުމުގެ ކުރިން ބިލު ފާސްކުރުމަށެވެ. މި އަހަރުގެ ފަހު ޖަލްސާ މި ހަފްތާގެ ބުރާސްފަތި ދުވަހު ބޭއްވުމަށް ހަމަޖެހިފައިވާއިރު، މި ބިލު ފާސްވެއްޖެނަމަ، އޮސްޓްރޭލިއާ ވެގެންދާނީ މިހާ ހަރުކަށިކޮށް ސޯޝަލް މީޑިއާގެ ޕްލެޓްފޯމްތައް ބޭނުންކުރުން މަނާކުރާ ފުރަތަމަ ގައުމަށެވެ. 

އޮސްޓްރޭލިއާގެ ޕާލަމެންޓަށް މި ބިލު ހުށަހަޅާފައިވަނީ މިދިޔަ ހަފްތާގައެވެ. އަދި އެ ބިލަށް ހިޔާލު ފާޅުކޮށް ބަހުސްކުރުމަށް ދީފައިވަނީ އެންމެ ދުވަހެކެވެ. 

ގޫގުލް އާއި މެޓާއިން އޮސްޓްރޭލިއާގެ ޕާލަމެންޓުގައި އެދުނީ، ސޯޝަލް މީޑިއާ މަނާ ކުރާ އުމުރު ކަނޑައެޅުމުގެ ކުރިން، އެކަމަށް އިތުރު ދިރާސާތައް ކުރުމަށެވެ. އެހެންނޫންނަމަ މިކަމުގެ ސަބަބުން އެ ގައުމުގެ ރައްޔިތުންނަށް ނޭދެވޭ އަސަރުތަކެއް ކުރުން އެކަށީގެންވާކަމަށް ވެސް އެ ކުންފުނިތަކުން ފާހަގަކޮށްފައިވެއެވެ. 

މި ގާނޫނުގައި ބުނާ ގޮތުން، ސޯޝަލް މީޑިއާ ޕްލެޓްފޯމްތަކުގެ މައްސަލައަކާއި ގުޅިގެން މިކަން ތަސްދީގުނުވެއްޖެނަމަ، އެ ކުންފުންޏެއް 39 މިލިއަން އެމެރިކާ ޑޮލަރާ ހަމައަށް ޖޫރިމަނާ ކުރުމުގެ އިހްތިޔާރު އޮވެއެވެ.

މި ބިލާ ގުޅިގެން އެލޮން މަސްކްގެ އެކްސް ޕްލެޓްފޯމުން ހާމަކުރި ގޮތުގައި، މިއީ ކުޑަކުދިންގެ ހިޔާލުފާޅު ކުރުމުގެ މިނިވަންކަން ހަނިކޮށް، މައުލޫމާތު ލިބިގަތުމަށް ހުރަސްއެޅޭ ބިލެއް ކަމަށެވެ.