އޯލްޑް ޓްރެފަޑްގައި ކުޅުނު އަމޮރިމްގެ ފުރަތަމަ މެޗުން ޔުނައިޓެޑް މޮޅުވެއްޖެ

މެންޗެސްޓަރ ޔުނައިޓެޑުގެ ކޯޗެއްގެ މަގާމަށް އަލަށް ހަވާލުވި ރޫބެން އަމޮރިމްގެ އިރުޝާދުގެ ދަށުން އޯލްޑް ޓެރެފަޑްގައި ކުޅުނު ފުރަތަމަ މެޗު އެ ޓީމުން ކާމިޔާބުކޮށްފިއެވެ. ޔޫރޮޕާ ލީގުގައި ބުރާސްފަތި ދުވަހުގެރޭ ނޯވޭގެ ބޮޑޯ/ގްލިމްޓްއާ ދެކޮޅަށް ކުޅުނު މެޗު އެ ޓީމުން ކާމިޔާބުކޮށްފައިވަނީ ހަނިގޮތަކަށް، 3-2 އިންނެވެ. މި މެޗުގެ ތަރިއަކީ އެ ޓީމުގެ ޑެންމާކް ސްޓްރައިކަރ، ރަސްމުސް ހޮއިލަންއެވެ.

އަމޮރިމްއާއެކު ޔުނައިޓެޑުން ކުޅުނު ފުރަތަމަ މެޗާ އެއްގޮތަށް، ބޮޑޯ/ގްލިމްޓްއާ ދެކޮޅަށް ކުޅުނު މެޗުވެސް އެ ޓީމުން ފަށާފައިވަނީ ވަރަށް އުއްމީދީ ގޮތަކަށެވެ. އެ ޓީމުން މިދިޔަ އާދީއްތަ ދުވަހު އިޕްސްވިޗް ކޮޅަށް މެޗުގެ ދެވަނަ މިނެޓުގައި ގޯލެއް ޖަހާ ލީޑު ނަގާފައިވާއިރު، ބޮޑޯ/ގްލިމްޓްއާ ދެކޮޅަށް ލީޑު ނަގާފައިވަނީ މެޗުގެ ފުރަތަމަ މިނެޓުގައި ކާމިޔާބުކުރި ގޯލަކުންނެވެ. 

ޔުނައިޓެޑުން ލީޑު ނެގީ، އިދިކޮޅު ޓީމުގެ ކީޕަރު ނިކިޓާ ހައިކިންއަށް އެ ޓީމުގެ ޑިފެންޑަރު ދިން ބެކްޕާހެއް، ހޮއިލަންގެ ބުރަ މަސައްކަތުން ހޯދުމުން، ހުސްކޮށް އޮތް ގޯލުގެ ތެރެއަށް ފޮނުވާލައި އަލެހާންޑްރޯ ގަނާޗޯ ކާމިޔާބުކުރި ގޯލަކުންނެވެ. ނަމަވެސް މާގިނަ އިރުތަކެއް ނުވަނީސް، ބޮޑޯ/ގްލިމްޓްއާގެ ތާރީހުގައި މިހާތަނަށް ކުޅޭ އެންމެ ބޮޑު މެޗުގައި އެމީހުން ލީޑު ނެގިއެވެ. 

އޯލްޑް ޓެރެފަޑަށް މެޗު ބެލުމަށް ހާޒިރުވި ބޮޑޯ/ގްލިމްޓްއާ ނިސްބަތްވާ އަވަށުގެ ގާތްގަނޑަކަށް 12 އިންސައްތަ ސަޕޯޓަރުންގެ ކުރިމަތީގައި ކުޅުނު މި މެޗުގައި، އެމީހުންގެ ފުރަތަމަ ގޯލު ކާމިޔާބުކުރީ މެޗުގެ 19 ވަނަ މިނެޓުގައި ހެކޮން އެވްޔެންއެވެ. ޓީމުގެ މިޑްފިލްޑަރ، ސެންޑްރޯ ފެޓް ދިން ޕާހަކުން، ޔުނަޓެޑްގެ ޕެނަލްޓީ އޭރިޔާގެ ރޮނގު މަތީގައި ހުރެފައި އެއް ޓަޗުން ފޮނުވާލީ ބޯޅަ ގޮސް ވަނީ ޔުނައިޓެޑްގެ ގޯލުގެ މަތީ ކަނަށެވެ. އަދި އޭގެ 4 މިނެޓުފަހުން، ފިލިޕް ޒިންޗަނަގެލް ވަނީ، އަނިޔާގެ ސަބަބުން 18 މަހަށް ކުޅުމާއި ދުރުގައި ހުރެފައި މި މެޗަށް ނިކުތް ޔުނައިޑެޓުގެ ޑިފެންޑަރ، ޓައިރެލް މަލަސިއާ ކައިރިން ކަނާތް ފަރާތުން ބޯޅަ ހިފައިގެން ދިއުމަށްފަހު، ތިރިތިރިން ގޯލުގެ ދުރުފަޅިއަށް ފޮނުވާލާ، އެ ޓީމަށް ލީޑު ނަގައިދީފައެވެ.

ނަމަވެސް ހާފު ނިމުމުގެ ކުރިން ހޮއިލަން ވަނީ ޔުނައިޓެޑަށް ނަތީޖާ ހަމަހަމަކޮށްދީފައެވެ. އެ ޓީމުގެ ފަހަތަށް ކުޅޭ މޮރޮކޯގެ މަޒްރޫއީ، ބޮޑޯ/ގްލިމްޓްއާގެ ގޯލު ކުރިމައްޗަށް ހުރަސް ކޮށްދިން ބޯޅަ ހޮއިލަން ގޯލަށް ފޮނުވާލާފައިވަނީ އެއް ފައިން ކޮންޓްރޯލް ކުރުމަށްފަހު ބޯޅަ ނުވެއްޓެނީސް، އަނެއް ފައިން ގޯލަށް ފޮނުވާލުމަށްފަހުއެވެ. ޔުނައިޓެޑުން މެޗުގައި ދެވަނަ ފަހަރަށް ލީޑު ނެގީ ދެވަނަ ހާފު ފަށައިގެން 5 މިނެޓު ކުޅެވުނުތަނާ، އަނެއްކާ ވެސް ހޮއިލަން ކާމިޔާބުކުރި ގޯލަކުންނެވެ.

އެއަށްފަހު ވެސް ގޯލު ކާމިޔާބު ކުރާނެ ގިނަ ފުރުސަތުތަކެއް ވަނީ ޔުނައިޓެޑަށް ލިބިފައެވެ. ނަމަވެސް ގަނާޗޯ އާއި ބަދަލު ކުޅުންތެރިއެއްގެ ގޮތުގައި ކުޅެން ނިކުތް މާކަސް ރަޝްފޯޑަށް ވަނީ ލިބުނު ފުރުސަތުތަކުގެ ބޭނުން ހިފޭގޮތް ނުވެފައެވެ.

މި މެޗުން ލިބުނު 3 ޕޮއިންޓާއެކު ޔުނައިޓެޑަށް މިހާރު ޖުމްލަ ލިބިފައިވަނީ 5 މެޗުން 9 ޕޮއިންޓެވެ. އަދި އެ ޓީމު އޮތީ ޔޫރޮޕާ ލީގުގެ ލީގު ފޭސްގެ 12 ވަނައިގައެވެ. 

އަމޮރިމްއަށް ދެން ވެސް އޮތީ އޯލްޑް ޓްރެފަޑް މެޗެކެވެ. ޕްރިމިއަ ލީގުގައި އާދީއްތަ ދުވަހު ޔުނައިޓެޑުން ނިކުންނާނީ އެވަޓަންއާ ދެކޮޅަށެވެ.