ޞިއްޙަތާއި ބެހޭ ވުޒާރާއިން ބޭއްވި "ސައިކޮލޮޖިކަލް ފަސްޓް އެއިޑް ޓްރެއިނިންގް ޕްރޮގްރާމް" ނިންމާލައިފި

ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއިން، މޯލްޑިވްސް ރެޑް ކްރެސެންޓާއާއި ގުޅިގެން ބޭއްވި "ސައިކޮލޮޖިކަލް ފަސްޓް އެއިޑް ޓްރެއިނިންގް ޕްރޮގްރާމް" ނިންމާލައިފިއެވެ.  

މި ޕްރޮގްރާމް ނިންމާލުމުގެ ގޮތުން އިއްޔަ ބޭއްވުނު ހާއްސަ ރަސްމިއްޔާތު ޝަރަފުވެރިކޮށްދެއްވީ ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވަޒީރު  ޤީލާ އަލީއެވެ. މިއީ ނަފްސާނީ އަދި އިޖްތިމާއީ ފުރަތަމަ އެހީ ބޭނުންވާ މީހުން ދެނެގަނެ، އެފަދަ ޙާލަތެއް ދިމާވެއްޖެނަމަ ނަފްސާނީ ފުރަތަމަ އެހީ ދިނުމުގެ ހުނަރުތައް އިތުރުކުރުމުގެ ގޮތުން، ޖޫން މަހުގެ 29 އިން 30 އަށް މާލޭގައި ކުރިއަށްގެންދިޔަ  ޕްރޮގްރާމެކެވެ.

މި ޕްރޮގްރާމުގައި ޖުމްލަ 25 ފަރާތަކުން ބައިވެރިވިއެވެ. އޭގެތެރޭގައި ކ. އަތޮޅުގެ ހުރިހާ ރަށަކުން ބައިވެރިވި ފަރާތްތަކާއި، ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއާއި،  މޯލްޑިވިއަން ބްލަޑް ސަރވިސަސް އަދި މޯލްޑިވްސް ޕޮލިސް ސަރވިސް ހިމެނެއެވެ.

Minister @geelaali attended the Closing Ceremony of the Psychological First Aid – First Responders Training Program as Chief Guest, held in collaboration with the Maldivian Red Crescent (@maldivianrc ), to strengthen first responders’ psychological support skills. pic.twitter.com/OP2hcAihLa

— Ministry of Health, Family and Welfare (@MoHmv) June 30, 2026

ސައިކޮލޮޖިކަލް ފަސްޓް އެއިޑް (ޕީއެފްއޭ) ގެ ބޭނުމަކީ  ކާރިސާގެ ވަގުތުގައި އަދި ކުއްލި ޙާލަތްތަކުގައި ނުވަތަ އޭގެ ފަހުން ނަފްސާނީ އުނދަގޫތައް ކުރިމަތިވާ ފަރާތްތަކަށް ނަފްސާނީ ފުރަތަމަ އެހީ ފޯރުކޮށްދިނުމާއި ގުޅޭ ޢިލްމާއި އަމަލީ ހުނަރު ބައިވެރިންނަށް ދަސްކޮށްދިނުމެވެ. އެގޮތުން ނަފްސާނީ ފުރަތަމަ އެހީ ބޭނުންވާ މީހުން ދެނެގަންނާނެ ގޮތްތަކާއި ،  މިފަދަ ފަރާތްތަކަށް ނަފްސާނީ ފުރަތަމަ އެހީ ދެވޭނެ ޙާލަތްތަކުގައި އަމަލުކުރާނެ ގޮތްތަކާ ގުޅޭގޮތުން ވެސް ބައިވެރިންނަށް ވަނީ ތަމްރީނުތައް ދެވިފައެވެ.

އަދި ހަމައެއާއެކު، ނަފްސާނީ ފުރަތަމަ އެހީ ފޯރުކޮށްދޭ ފަރާތްތަކުގެ އަމިއްލަ ނަފްސާނީ ޞިއްޙަތަށް އަޅާލުމުގެ މުހިންމުކަމާއި، އަމިއްލަ ދުޅަހެޔޮކަމަށް އިސްކަންދޭނެ ގޮތްތަކާއި ގުޅޭގޮތުން ވެސް ބައިވެރިންނަށް ވަނީ މަޢުލޫމާތު ހިއްސާކުރެވިފައިކަމަށް ސިއްހަތާބެހޭ ވުޒާރާއިން ބުނެއެވެ.