ލިވަޕޫލް މެޗަށްފަހު އެމްބައްޕޭ ބޭނުންވަނީ ސަޕޯޓަރުންގެ ލޯތްބާއި ހިތްވަރު: އެންޗެލޮޓީ

ބުދަ ދުވަހުގެރޭ ޗެމްޕިއަންސް ލީގުގައި ލިވަޕޫލްއާ ދެކޮޅަށް ކުޅެ ރިއާލް މެޑްރިޑް 2-0 އިން ބަލިވި މެޗަށްފަހު، ކާލޯ އެންޗެލޮޓީ ގަބޫލުކުރާ ގޮތުގައި އެޓީމުގެ ފޯވާޑް ކީލިއަން އެމްބައްޕޭ ބޭނުންވަނީ ސަޕޯޓަރުންގެ ލޯތްބާއި ހިތްވަރެވެ. 

ފްރާންސްގެ ޕެރިސް-ސެއިންޓް ޖަމެއިން (ޕީއެސްޖީ) އިން މި އަހަރުގެ ހޫނު މޫސުމުގައި އެމްބައްޕޭ މެޑްރިޑަށް ބަދަލުވުމުގެ ފަހަތުގައި ހިމެނޭ އެންމެ ބޮޑު އެއް އުއްމީދަކީ، ޗެމްޕިއަންސް ލީގު ތައްޓާއި ގާތް ގުޅުމެއް އޮންނަ މެޑްރިޑާއެކު އެ މުބާރާތް ކާމިޔާބުކުރުމެވެ. ނަމަވެސް މި ސީޒަނުގައި ދަށް ނަތީޖާތަކެއް ނެރެމުން އަންނަ މެޑްރިޑް ލިވަޕޫލްގެ މެޗުން ބަލިވުމުން، އެ ޓީމު މުބާރާތުން އަލްވަދާއު ކިޔަން ޖެހިދާނެކަމުގެ ބިރު ވަނީ ވަރަށް ބޮޑަށް ހީވެފައެވެ. 

މި ސީޒަންގެ ޗެމްޕިއަންސް ލީގުގެ ގަދަ-16 އަށް ދަތުރުނުކޮށް މެޑްރިޑް މުބާރާތުން ކަޓައިފިނަމަ، ހަމަގައިމު ވެސް އެމްބައްޕޭއަށް އެންމެ އުނދަގޫ ކުރާނެ އެއް ހަނދާނަކީ ލިވަޕޫލް މެޗެވެ. އެ މެޗުގައި އޭނާ 'މައިތިރި' ކޮށްފައިވަނީ، ލިވަޕޫލްގެ ކަނާތް ފަޅިން ފަހަތަށް ކުޅެމުން އަންނަ ޓްރެންޓް އެލެކްސެންޑަރ އާނޯލްޑުގެ ބަދަލުގައި، ޗެމްޕިއަންސް ލީގުގައި ލިވަޕޫލްގެ ފުރަތަމަ އެގާރައިގައި ހިމެނިގެން އަލަށް ކުޅެން ނިކުތް، ތަޖުރިބާގެ ގޮތުން ޒުވާން، ކޮނޯރ ބްރެޑްލީއެވެ. އަދި މީގެ އިތުރުން އެ މެޗުގައި އޭނާޖެހި ޕެނަލްޓީ ނާކާމިޔާބުވުން ވެގެން ދާނީ މާޔޫސްކަން އިތުރުވެގެން ދާނެ ކަމަކަށެވެ.

އެމްބައްޕޭގެ ފޯމާ ގުޅިގެން އެންޗެލޮޓީއަށް އަމާޒުވި ނޫސްވެރިންގެ ސުވާލުތަކަށް ޖަވާބުދެމުން އެނާ ބުނީ، ލޯތްބާއި ހިތްވަރު ލިބިގެން އެމްބައްޕޭގެ ފޯމު ރަގަޅު ކުރެވޭނެ ކަމަށާއި، ކޮންފިޑެންސް ހޯދުމަށް އޭނާ ވަގުތު ބޭނުންވާކަމަށެވެ. އަދި ޕެނަލްޓީ ކާމިޔާބު ނުކުރެވުމުން އޭނާ ކުށްވެރި ނުކުރާކަމަށާއި، އެއީ ކޮންމެ ކުޅުންތެރިއަކަށް ވިޔަސް ވެދާނެކަމެއް ކަމަށް އެންޗެލޮޓީ ބުނެފައިވެއެވެ.

ޕީއެސްޖީއިން މެޑްރިޑަށް ބަދަލުވުމަށްފަހު ކުޅުނު 18 މެޗުން އެމްބައްޕޭއަށް މިހާތަނަށް ކާމިޔާބު ކުރެވިފައިވަނީ 9 ގޯލެވެ. އަދި ޗެމްޕިއަންސް ލީގުގައި އޭނާއަށް ކާމިޔާބު ކުރެވިފައި ވަނީ އެންމެ ގޯލެކެވެ. 

އެމްބައްޕޭއާ ގުޅޭގޮތުން އެންޗެލޮޓީ އިތުރަށް ބުނީ، ޓިމުންނާއި ސަޕޯޓަރުން ކެތްތެރިވާން ޖެހޭ ކަމަށާއި، ވަގުތާއެކު އެމްބައްޕޭގެ ކުޅުން ރަގަޅުވާނެ ކަމަށެވެ.