ފީނުމުގައި ރައްކާތެރިކަމަށް ސަލާލުވުމަށް ދެވޭ މަޢުލޫމާތު އިތުރުކުރަންޖެހޭ

ދިވެހިރާއްޖެއަކީ ދުނިޔޭގެ އެކި ކަންކޮޅުތަކުން ފީނާ މީހުން އަންނަ މަޝްހޫރު މަންޒިލެކެވެ. ނަމަވެސް، މަދުން ނަމަވެސް ހިނގާފައިވާ ބައެއް ހާދިސާތަކާ ގުޅިގެން، ފީނުމުގެ ރައްކާތެރިކަމަށް އިތުރަށް ސަމާލުވާންޖެހޭކަން ފާހަގަކުރެވިފައިވެއެވެ. މިގޮތުން، ޚާއްޞަކޮށް ޑިސެމްބަރު މަހު ފީނުމުގެ ޙަރަކާތްތައް އިތުރުވާ ދަނޑިވަޅުގައި، މިކަމަށް އިތުރު ސަމާލުކަމެއް ދޭންޖެހޭކަމަށް ފީނުމުގެ ދާއިރާގެ މާހިރުން ވަނީ ބުނެފައެވެ.

އަލަށް ޑައިވް ކުރަން ފަށާ ފަރާތްތަކަށް ފީނުން ތަޖުރިބާ ކުރަން ރާއްޖެއަކީ އެންމެ އެކަށީގެންވާ އެއް ޤައުމު، ޕަޑި އަދި ސްކޫބާ ސްކޫލް އިންޓަރނޭޝަނަލްގެ ރައްކާތެރިކަމުގެ ޤަވާއިދުތަކާއި ، 53 އަހަރުވީ ތަޖުރިބާ ގެ އަލީގައި ރާއްޖޭގެ ފަރުތަކާއި ކަނޑުތަކަށް އެންމެ އެކަށީގެންވާ ރައްކާތެރިކަމުގެ ފިޔަވަޅުތަކަށް މިހާރުވެސް ރާއްޖެއިން އަމަލުކުރަނީ

ޑައިވިންގގެ ދާއިރާގެ ޒަމާންވީ ތަޖުރިބާ ކާރެއް ކަމުގައިވާ ޑައިވް ކްލަބް މޯލްޑިވްސްގެ މެނޭޖިންގ ޑައިރެކްޓަރ އަބްދުﷲ ހަސްރަތު ( ހައްތު) ވިދާޅުވިއެވެ.

ފަރުދުން މީޑިއާއަށް ދެއްވި އިންޓަރވިއުއެއްގައި އަބްދުﷲ ހަސްރަތު ( ހައްތު)  ވިދާޅުވީ ފީނުމަށް ރާއްޖެއަށް ފަތުރުވެރިން އަންނައިރު ރައްކާތެރިކަމުގެ ފިޔަވަޅުތަކަށް އަމަލުކުރާ ރަނގަޅު ޑައިވް ސްކޫލްތަކާއި އޮޕަރޭޓަރުން ހިޔާރު ކުރުމާއި ، މިފަދަ ހިދުމަތް ފަތުރުވެރިންނަށް ފޯރު ކޮށްދޭ ފަރާތްތަކުންވެސް ރަައްކާތެރި ކަމުގެ ފިޔަވަޅުތަކަށް އަމަލުކުރާކަން ކަށަވަރުކުރެވި ރަނގަޅު މަޢުލޫމާތު ފަތުރުވެރިންނަށް ފޯރު ކޮށްދިނުން މުހިންމުކަމަށެވެ.

ދިވެހިރާއްޖޭގެ ކަނޑުތަކުގައި އުޅޭ ކުލަކުލައިގެ މަސްމަހާމެއްސާއި، ގިނަ އަދަދެއްގެ ކަނޑުގެ ދިރުންތަކަކީ ފީނާ މީހުންނަށް ނުހަނު ޝައުޤުވެރިކަން ހުރި ކަމެކެވެ. ނަމަވެސް، މިފަދަ ދިރުންތަކާ ކައިރިވުމުގައި ވަރަށް ބޮޑަށް ސަމާލުވާންޖެހެއެވެ. ޚާއްޞަކޮށް ކަނޑުގައި އުޅޭ ސޫފާސޫފި، މިސާލަކަށް މިޔަރު ފަދަ ތަކެއްޗާ ދިމާވާއިރު، އެތަކެތި ފަހަތުން ދިއުމާއި، އަތްލުމާއި، ކާންދިނުން ފަދަ ކަންކަން ކުރާއިރު ސަމާލުވާންޖެހެއެވެ. މިފަދަ ޢަމަލުތަކުން އެ ދިރުންތަކުގެ ޠަބީޢީ އާދަތަކަށް ބަދަލު އައިސް، އިންސާނުންނަށް ނުރައްކާވެދާނެ ކަމަށް މާހިރުން ވަނީ އިންޒާރުދީފައެވެ.

ދިވެހިރާއްޖޭގެ ބައެއް ސަރަޙައްދުތަކުގައި  ކަނޑުގެ އޮއިވަރު ގަދައަށް ހުރުމަކީވެސް ފީނާ މީހުންނަށް ދިމާވެދާނެ ނުރައްކަލެކެވެ. ޚާއްޞަކޮށް ތަޖުރިބާ މަދު ފީނާ މީހުންނަށް މިފަދަ އޮއިވަރުތަކުގައި ޖެހި، ބޭނުންވާ ދިމާލަށް ދަތުރު ނުކުރެވުމަކީ އެކަށީގެންވާ ކަމެކެވެ. އެހެންކަމުން، ފީނުމުގެ ކުރިން އެ ސަރަޙައްދެއްގެ ކަނޑުގެ ޙާލަތު ރަނގަޅަށް ދެނެގަތުމަކީ މުހިންމު ކަމެކެވެ.އަދި ހިދުމަތް ފޯރުކޯށްދޭ ފަރާތްތަކުންވެސް މިފަދަ ކަންކަމަށް މިހާރަށް ވުރެން ބޮޑު ސަމާލުކަމެއް ދޭންޖެހެއެވެ.

ފީނުމުގެ ރައްކާތެރިކަން ކަށަވަރުކުރުމަށްޓަކައި، ފީނުމުގެ ކުރިން ރަނގަޅަށް ޕްލޭންކުރުމާއި، ފީނުމުގެ އާލާތްތައް ރަނގަޅަށް ޗެކްކުރުމާއި، ފީނާ ސަރަޙައްދުގެ މަޢުލޫމާތު ހޯދުމަކީ ކޮންމެހެން ކުރަންޖެހޭނެ ކަންކަމެވެ. މީގެ އިތުރުން، އަބަދުވެސް ފީނަންވާނީ އެހެން މީހަކާ އެކުގައެވެ. އަދި ފީނާއިރު، އެއްބަސްވެފައިވާ ޕްލޭނާ އެއްގޮތަށް ޢަމަލުކުރުމަކީވެސް މުހިންމު ކަމެކެވެ.

ދިވެހިރާއްޖޭގެ ފީނުމުގެ ތަޖުރިބާކާރުން ދޭ އިރުޝާދުތަކަށް ޢަމަލުކުރުމަކީވެސް ވަރަށް މުހިންމު ކަމެކެވެ. 

ދިވެހިރާއްޖޭގެ ފީނުމުގެ މަރުކަޒުތަކުންނާއި ފަތުރުވެރިކަމުގެ ދާއިރާގެ ފަރާތްތަކުން ވަނީ ފީނުމުގެ ރައްކާތެރިކަމާ ގުޅޭ ގޮތުން ހޭލުންތެރިކަން އިތުރުކުރުމަށް އެކި ކަހަލަ ޕްރޮގްރާމްތައް ހިންގާފައެވެ. މީގެއިތުރުން ފީނާ މީހުން ގިނަވާ ދުވަސްވަރު ކާރިސާތައް މަދުކުރުމަށް ،ވޯކްޝޮޕްތަކާއި، ރައްކާތެރިކަމާ ގުޅޭ ވީޑިއޯތަކާއި، އިންޓަރެކްޓިވް ސެޝަންތައް ބޭއްވުމަކީ މުހިންމުކަމެވެ. މިފަދަ ޕްރޮގްރާމްތަކުގެ ސަބަބުން، ފީނާ މީހުންގެ މެދުގައި ރައްކާތެރިކަމުގެ ސަގާފަތެއް އުފެދި، ނުރައްކާތެރި ހާދިސާތައް މަދުވެގެންދާނެ އެވެ. ޚާއްސަކޮށް އަލށް ފަށާ ފީނާމީހުންނަށް އަދި ރާއްޖޭގެ ކަނޑުގައި އަލަށް ފީނާ ފަތުރުވެރިންނަށް މިއީ މުހިންމު މަޢުލޫމާތެކެވެ.

ޚުލާޞާކޮށް ބަލާއިރު، ދިވެހިރާއްޖެއަކީ ދުނިޔޭގައި ފީނުމަށް އެންމެ މަޝްހޫރު އެއް މަންޒިލް ކަމުގައިވީ ނަމަވެސް، ފީނުމުގެ ރައްކާތެރިކަމަށް ސަމާލުވުމަކީ ވަރަށް މުހިންމު ކަމެކެވެ. ޚާއްޞަކޮށް ޑިސެމްބަރު މަހު ފީނުމުގެ ޙަރަކާތްތައް އިތުރުވާ ދަނޑިވަޅުގައި، ކަނޑުގެ ދިރުންތަކަށް އިޙްތިރާމްކުރުމާއެކު، ރައްކާތެރިކަމުގެ އުސޫލުތަކަށް ފުރިހަމައަށް ޢަމަލުކުރުމަކީ ކޮންމެހެން ކުރަންޖެހޭނެ ކަމެކެވެ. މިގޮތަށް ޢަމަލުކުރުމުން، ފީނާ މީހުންނަށް ރައްކާތެރި، އަދި ހަނދާނުގައި ދެމިހުންނާނެ ތަޖުރިބާއެއް ކުރެވޭނެއެވެ.