އައްޑޫ ސިޓީ ހިތަދޫގެ ފަޅުގޯއްޗެއްގައި ހުރި ކޮންޓެއިނަރެއްގައި އަލިފާނުގެ ހާދިސާއެއް ހިނގައިފި

 އައްޑޫ ސިޓީ ހިތަދޫ، ސަހަރާ މިސްކިތް ކުރިމަތީ ހުންނަ ފަޅުގޯއްޗެއްގައި ހުރި ކޮންޓެއިނަރެއްގައި އަލިފާނުގެ ހާދިސާއެއް ހިނގާފައިވާ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފިއެވެ.

އެމްއެންޑީއެފުން ވިދާޅުވިގޮތުގައި، މި ހާދިސާގެ މައުލޫމާތު  އެމްއެންޑީއެފް ސަދަން އޭރިއާ ކޮމާންޑަށް ލިބިފައިވަނީ ރޭ ދަންވަރު 2:50 އެހާކަންހާއިރުއެވެ. ހާދިސާގެ ރިޕޯޓު  އެމްއެންޑީއެފް ސަދަން އޭރިއާ ކޮމާންޑަށް ލިބުމާއެކު، އެ ފަޔަރ ސްޓޭޝަނުގެ ފަޔަރފައިޓަރުން ވަނީ އެ ސަރަހައްދަށް ގޮސްފައިކަމަށް އެމްޑިއެފުން ވިދާޅުވެއެވެ. 

އަދި ވަގުތުން އެ ސަރަހައްދުގައި އަލިފާން ނިއްވާލުމުގެ މަސައްކަތްކޮށްފައިވާ ކަމަށާއި، އެ މަސައްކަތުގެ ތެރެއިން އަލިފާންގަނޑު ނިއްވާލުވުނީ ފަތިހު 4:21 އެހާކަންހާއިރު ކަމަށް އެ އިދާރާއިން ވިދާޅުވިއެވެ.

އައްޑޫ ސިޓީ ހިތަދޫ، ފަޅުގޯއްޗެއް ތެރޭ ހުރި ކޮންޓެއިނަރެއްގައި ރޯވި އަލިފާން، އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނުން ނިއްވާލައިފި.https://t.co/EUk5TfRuns pic.twitter.com/qt5p4VnJL7

— Maldives National Defence Force (@MNDF_Official) July 4, 2026

މިއީ ކިހިނެއް ހިނގާފައިވާ ހާދިސާއެއް ކަމެއް އެމްއެންޑީއެފުން ހާމަކޮށްފައެއްނުވެއެވެ. އަދި މި ހާދިސާގައި އެއްވެސް މީހަކަށް އަނިޔާއެއްވި ކަމުގެ ރިޕޯޓެއް ލިބިފައިނުވާކަން އެ އިދާރާއިން ހާމަކުރެއެވެ.