ކުޅިވަރު
ބަލޮގަންގެ ސަސްޕެންޝަން ފަސްކުރުމުން ވޯލްޑް ކަޕްގެ އިންސާފުވެރިކަމާމެދު ސުވާލު އުފެދިއްޖެ
އެމެރިކާގެ ބަލޮގަން / ފޮޓޯ: އޭޕީ
ވޯލްޑް ކަޕް ފުޓްބޯޅަ މުބާރާތުގެ ފޯރި ގަދަވަމުން އަންނަނިކޮށް، އެމެރިކާގެ ފޯވާޑް ފޯލަރިން ބަލޮގަންއަށް ދެއްކި ރަތް ކާޑުގެ ސަސްޕެންޝަން ފީފާއިން ފަސްކޮށްދިނުމާ ގުޅިގެން މުބާރާތުގެ އިންސާފުވެރިކަމާ މެދު ބޮޑެތި ސުވާލުތަކެއް އުފެދި، މުޅި މުބާރާތް ހޫނުވެއްޖެއެވެ.
އާދީއްތަ ދުވަހާ ހަމައަށް އެންމެންގެ ސަމާލުކަން ހުރީ ހަމައެކަނި ފުޓްބޯޅަ ކުޅުމަށެވެ. އެއީ މުބާރާތް ބާއްވާ އެއް ގައުމު ކަމަށްވާ އެމެރިކާއަށް އޮތް ބޮޑު އުންމީދުތަކާއި، މިހާތަނަށް އެދެވޭ ކުޅުމެއް ދެއްކިފައި ނުވާ ތަޖުރިބާކާރު ބެލްޖިއަމް ޓީމުގެ ކުރިމަތިލުމަށެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް މިކަމުގެ ތެރެއަށް ވަދެވަޑައިގަތުމާއެކު، ފީފާއިން ނިންމި ކުއްލި ނިންމުމާ ގުޅިގެން، އެމެރިކާ އާއި ބެލްޖިއަމް ކުޅުމަށް ހަމަޖެހިފައިވާ މެޗަށް ސިޔާސީ ނުފޫޒު ވަނީ ވަދެފައެވެ.
ބޮސްނިއާގެ ތާރިކް މުހަރެމޮވިޗްގެ ފައިގެ ކުޑަހުޅަށް އެރި ކަމަށް ބުނެ ރަތް ކާޑު ދެއްކި ބަލޮގަންގެ އެއް މެޗުގެ ސަސްޕެންޝަން ފަސްކޮށްދިނުމުން، ބެލްޖިއަމާ ދެކޮޅަށް ކުޅޭ މެޗުގައި އޭނާއަށް ކުޅުމުގެ ފުރުސަތު މިހާރު ވަނީ ހުޅުވިފައެވެ. ފީފާއިން ނެރުނު ބަޔާނެއްގައި ބުނެފައިވަނީ، އެ އިދާރާގެ ޑިސިޕްލިނަރީ ކޯޑުގެ 27 ވަނަ މާއްދާއާ އެއްގޮތްވާ ގޮތުގެ މަތިން، ބަލޮގަންގެ ސަސްޕެންޝަން ވަނީ އެއް އަހަރު ދުވަހުގެ ޕްރޮބޭޝަނަރީ މުއްދަތަކަށް ފަސްކުރެވިފައި ކަމަށެވެ.
މި ނިންމުމާ ގުޅިގެން އެމެރިކާގެ ކޯޗު މައުރީސިއޯ ޕޮޗެޓީނޯ ބުނީ، މިއީ ހައިރާންވާންޖެހޭ ކަމެއް ނޫން ކަމަށެވެ. އޭނާ ބުނީ މިއީ މީގެ ކުރިންވެސް ހިނގާފައިވާ ކަންކަމަށާއި، މިއީ ހަމައެކަނި އެމެރިކާއަށް ދިމާވި ހާއްސަ ހާލަތެއް ނޫން ކަމަށާއި، އަދި މިގޮތަށް ނިންމުމުން އުފާކުރާ ކަމަށެވެ.
ނަމަވެސް ބެލްޖިއަމްގެ ކޯޗު ރޫޑީ ގާސިއާގެ ހިޔާލު މިއާ މުޅިން ތަފާތެވެ. އޭނާ ވަނީ ފީފާގެ މި ނިންމުމަށް ވަރަށް ބޮޑަށް ފާޑުކިޔާފައެވެ. އަދި މިއީ ވޯލްޑް ކަޕްގެ ތާރީހުގައިވެސް މިފަދަ ނިންމުމެއް ނިންމި ފުރަތަމަ ފަހަރު ކަމަށް އޭނާ ތުހުމަތުކުރިއެވެ.
ޖުލައި 19 ގައި ބާއްވާ ފައިނަލް މެޗަށް ދެ ހަފުތާއަށް ވެފައިވާއިރު، ފީފާގެ މި ނިންމުމަކީ އަމިއްލަ ގަވާއިދުތަކާ ހިލާފަށް ނިންމި ނިންމުމެއްތޯ ނުވަތަ ނޫންތޯ ކުރެވޭ ބަހުސް ވަނީ ގަދަވެފައެވެ. މިއީ މިހާތަނަށް މުބާރާތުގައި ފެންމަތިވި އެންމެ ބޮޑު މައްސަލައަށް މިހާރު ވަނީ ވެފައެވެ.
Ads by MSS
