އޮޑިހަރުގެއަކާއި ގުދަނަކުން ވައްކަން ކުރި ދެ މީހަކު ހައްޔަރުކޮށްފި

ހދ. ކުޅުދުއްފުށީ އޮޑިހަރުގެއަކާއި، ގުދަނަކުން ވަގަށް ނަގާފައިވާ ތަކެތި ހޯދައި، ވައްކަންކުރި ކަމުގެ ތުހުމަތުގައި ދެ މީހަކު ހައްޔަރުކޮށްފައިވާ ކަމަށް ދިވެހި ފުލުހުންގެ ހިދުމަތުން ވިދާޅުވެއްޖެއެވެ.

ޖުލައި މަހުގެ 8 ވަނަ ދުވަހުގެ ރޭ ވައްކަންކޮށްފައިވާ ކަމަށް ތުހުމަތުކުރެވޭ މައްސަލައާ ގުޅިގެން، މި ދެ މީހުން ހައްޔަރުކޮށްފައިވަނީ ޖުލައި 9 ގައެވެ. މައްސަލައާއި ގުޅިގެން ހައްޔަރުކުރެވުނު ދެ މީހުންނަކީ:

• ތަންބީގެ، ހދ. ކުޅުދުއްފުށި  ޙަސީބު އާދަމް (27އ)
• ވައިޓްހާރޑް، ހދ. ކުޅުދުއްފުށި  މުޙައްމަދު ނަބީލް އަޙްމަދު (27އ) 

ކުޅުދުއްފުށީ އޮޑިހަރުގެއަކާއި ގުދަނަކުން ވަގަށް ނަގާފައިވާ ތަކެތި ހޯދައި، ދެ މީހަކު ހައްޔަރުކޮށްފިhttps://t.co/BuxtDXeBvj

— Maldives Police (@PoliceMv) July 12, 2026

އެ މީހުން ވަގަށްނެގި ތަކެތީގެ އަގު 80،000 ރުފިޔާއަށްވުރެ ބޮޑުކަމަށް ލަފާކުރެވޭއިރު، އެ ތަކެތީގެ ތެރޭގައި ކަރަންޓު ބުރުމާއާއި، ކަރަންޓު ކީހާއި، ކަޓްއޮފްއާއި، ޓޫލް ބޮކްސްތަކަކާއި ކަރަންޓު ނަރުތަކެއްގެ އިތުރުން ކަރަންޓު އެހެނިހެން ސާމާނު ހިމެނޭ ކަމަށް ފުލުހުން ވިދާޅުވެއެވެ.

މި ތަކެތި މީހާރު ފުލުހުން ހޯދާފައިވާއިރު، ތަކެތި ވެރިފަރާތާ ހަވާލުކުރުމުގެ  މަސައްކަތްތައް ކުރަމުންގެންދާ ކަމަށް ފުލުހުން ވިދާޅުވިއެވެ.

މައްސަލައާއި ގުޅިގެން ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުންވަނީ  ޙަސީބު އާދަމް 5 ދުވަހަށް އަދި މުޙައްމަދު ނަބީލް އަޙްމަދު 12 ދުވަހަށް  ބަންދުކުރުމަށް އަމުރުކޮށްފައެވެ.

މި މައްސަލަ ފުލުހުންގެންދަނީ އިތުރަށް ތަހުގީގުކުރަމުންކަމަށް އެ އިދާރާއިން ވިދާޅުވެއެވެ.