ތިނަދޫ އަށް ސިޓީއެއްގެ ދަރަޖަ ދިނުމާއި ގުޅޭ މައްސަލައެއް މަޖިލީހަށް ހުށައަޅައިފި

ގދ. ތިނަދޫ އަށް ސިޓީއެއްގެ ދަރަޖަ ދީފައިވާ މައްސަލައާއި ގުޅިގެން އެކަމާއި ގުޅޭ މައްސަލައެއް ރައްޔިތުންގެ މަޖިލީހަށް ހުށައަޅައިފިއެވެ. 

މިމައްސަލަ ރައްޔިތުންގެ މަޖިލީހަށް ހުށައަޅުއްވައިފައިވަނީ ތިނަދޫ އުތުރު ދާއިރާގެ މެމްބަރު ސަޢުދުﷲ ޙިލްމީ އެވެ. 

މިމައްސަލަ ބެލުމަށް އެދި މެމްބަރު ސަޢުދުﷲ މަޖިލީހަށް ހުށައަޅުއްވައިފައިވަނީ ގދ. ތިނަދޫއަށް ސިޓީއެއްގެ ދަރަޖަ ދިނުމުގައި ބޮޑު އޮޅުވާލުންތަކެއް ހުރި ކަމަށް ތުހުމަތުކޮށެވެ.

މިމައްސަލަ ތަހުޤީޤު ކޮށްދިނުމަށް އެދި ރައްޔިތުންގެ މަޖިލީހަށް ސަޢުދުﷲ ހުށައަޅުއްވައިފައިވަ ސިޓީގައި ވިދާޅުވެފައިވަނީ ތިނަދޫ ސިޓީއަކަށް ބަދަލުކުރުމުގައި އެތައް ބަޔަކު ކަންބޮޑުވާ އަދި ޤާނޫނާ ހިލާފު އެތައް ކަމެއް ހިނގާފައިވާތީ އަދި އެކަމުގެ ސަބަބުން ކުރިއަށް އޮތް ތަނުގައި ވެސް އެފަދަ ކަންކަން ހިނގާފާނެ ކަމެއް ބެލެވޭތީ، މަޖިލީހުން އެ މައްސަލަ ބަލައިދިނުމަށް އެދޭ ކަމަށެވެ.

ގދ.ތިނަދޫ އަކީ ސިޓީއެއް ކަމަށް ކަނޑައަޅައި އެރަށަށް ސިޓީއެއްގެ ދަރަޖަ ދީފައިވަނީ ކުރީގެ ރައީސް އިބްރާހިމް މުޙައްމަދު ޞާލިޙުގެ ރިޔާސީ ކެމްޕޭނުގެ ތެެރޭގައެވެ.

ތިނަދޫއަށް ސިޓީއެއްގެ ދަރަޖަ ދީފައިވަނީ އެރަށުގެ އާބާދީގައި 10،000 މީހުން ހަމަނުވަނީސް ކަމަށްވާތީ ތިނަދޫއަށް ދީފައިވާ ސިޓީއެއްގެ ދަރަޖަ ބާޠީލް ކުރުމަށް ހައިކޯޓަށް ދުސްތޫރީ މައްސަލައެއް ހުށައަޅައިފައިވާކަން ވެސް ފާހަގަކޮށްލަން ޖެހެއެވެެ. 

އިދާރީ ދާއިރާތައް ލާމަރުކަޒީ އުސޫލުން ހިންގުމަ ބެހޭ ޤާނޫނުގައި ވާގޮތުން ރަށަކަށް ސިޓީއެއްގެ ދަރަޖަ ދެވޭނީ އެރަށެއްގެ އާބާދީގައި 10،000 މީހުން ހަމަވުމުންނެވެ.

ތިނަދޫ އަށް ސިޓީއެއްގެ ދަރަޖަ ކުރީގެ ސަރުކާރުން ދިން އިރު އޭރު އެރަށުގެ އާބާދީއަކީ 8000 މީހުން ކަމަށާއި އޭގެ ތެރެއިން ތިނަދޫގައި ދިރިއުޅެނީ 5000 އެއްހާ މީހުން ކަމަށް ތަފާސްހިދާބުތަކުން ދައްކައެވެ.