މަސްވެރިންގެ ދުވަހާއި ގުޅިގެން ކެއްކުމުގެ މުބާރާތެއް ބާއްވަނީ

މަސްވެރިންގެ ދުވަހާއި ގުޅިގެން "ރަހަވަރު" ގެ ނަމުގައި ކެއްކުމުގެ މުބާރާތެއް ބާއްވަން ނިންމައި އެމުބާރާތުގައި ބައިވެރިވާން މަސްވެރިކަމާ ބެހޭ ވުޒާރާއިން ހުޅުވާލައިފިއެވެ.

މި މުބާރާތް ބޭއްވަނީ މަސްވެރިކަމާ ކަނޑުގެ ވަޞީލަތްތަކާ ބެެހޭ ވުޒާރާއާއި  ޗެފްސް ގިލްޑް އޮފް މޯލްޑިވްސް (ސީޖީއެމް) ގުޅިގެންނެވެ. 

މަސްވެރިކަމާ ބެހޭ ވުޒާރާއިން ބުނެފައިވަނީ: 

 44 ވަނަ މަސްވެރިންގެ ދުވަހުގެ މުނާސަބަތުގައި ބޭއްވުމަށް ހަމަޖެހިފައިވާ ކެއްކުމުގެ މި މުބާރާތް ބޭއްވުމަށް ތާވަލްކޮށްފައިވަނީ، ޑިސެމްބަރުމަހުގެ 7 ވާ ހޮނިހިރުދުވަހު މާލޭގައި ކަމަށެވެ. މި މުބާރާތް ކުރިއަށްދާނީ އެދުވަހުގެ ހަވީރު 4 ކުން 6 ކަށް ޤައުމީ ޔުނިވަރސިޓީގެ ހޮސްޕިޓާލިޓީ ފެކަލްޓީގައެވެ.

މި މުބާރާތުގައި ދޮޅުގަޑިއިރުގެ ތެރޭގައި މުށިމަހާއި ފާނަ ހިމެނޭ ދެ ބާވަތެއްގެ ކެއުމެއް ތައްޔާރުކުރުމަށް ބޭނުންވާ މަސް ވުޒާރާއިން ފޯރުކޮށްދޭނެއެވެ. މިއީ މަސްވެރިންގެ ދުވަހާ ގުޅިގެން ބާއްވާ ހަރަކާތްތަކުގެ ތެރޭގައި ކެއްކުމުގެ މުބާރާތެއް ބާއްވާ ފުރަތަމަ ފަހަރެވެ.

މިފަދަ މުބާރާތެއް ބޭއްވުމުގެ މައިގަނޑު މަޤްސަދެއް ކަމުގައި ވުޒާރާއިން ބުނެފައިވަނީ، ރާއްޖޭގެ ކާބޯތަކެތީގެ ރައްކާތެރިކަމަށް މަސްވެރިކަން ހިއްސާކުރާ މިންވަރު ފާހަގަކުރުމާއި ކެއިންބުއިމުގެ އާދަކާދަތަކަށް އަންނަމުންދާ ބަދަލުތަކުގެ ސަބަބުން، ތަފާތު އައު ބާވަތްތަކުގެ މަހުގެ އުފެއްދުންތައް އުފައްދާ ބޭނުންކުރުމުގެ މުހިއްމުކަން އަންގައިދިނުންކަމަށް މަސްވެރިކަމާ ބެހޭ ވުޒާރާއިން ބުނެއެވެ.

މުބާރާތުގެ ވަނަތަކަށް ކަނޑައެޅިފައިވާ އިނާމު:-

• 1 ވަނަ – 10،000 ރުފިޔާ
• 2 ވަނަ – 7،000 ރުފިޔާ
• 3 ވަނަ – 5،000 ރުފިޔާ

މި މުބާރާތުގައި ބައިވެރިވުމުގެ ސުންގަޑިއަކީ އަންނަ އަންގާރަދުވަހުގެ 18:00 އާ ހަމަޔަށެވެ.

މިއަހަރުގެ މަސްވެރިންގެ ދުވަހުގެ މުނާސަބަތުގައި ގިނަ ހަރަކާތްތަކެއް ކުރިއަށް ގެންދިޔުމަށް މަސްވެރިކަމާ ބެހޭ ވުޒާރާއިން ވަނީ ނިންމައިފައެވެ. 

އެގޮތުން ކުރިއަށް ގެންދިއުމަށް ނިންމާފައިވާ އިތުރު ހަރަކާތްތަކުގެ ތެރޭގައި:-

• ޑިސެމްބަރުމަހުގެ 6 ވަނަ ދުވަހު ކުރިއަށްގެންދިއުމަށް ހަމަޖެހިފައިވާ މަސްރޭސް
• ޑިސެމްބަރުމަހުގެ 12 ވަނަ ދުވަހު ދަރުބާރުގޭގައި ކުރިއަށްގެންދާ މަސްވެރިންގެ ފޯރަމް
• ޑިސެމްބަރު 14 ވަނަ ދުވަހު ދަރުބާރުގޭގައި ކުރިއަށްގެންދިއުމަށް ހަމަޖެހިފައިވާ އާޓް އެގްޒިބިޝަން
• ޑިސެމްބަރު 13 ވަނަ ދުވަހު ސެންޓްރަލްޕާކްގައި ކުރިއަށްގެންދާ ކުޑަކުދިންގެ ހަވީރު 

މަސްވެރިންގެ ދުވަހުގެ މުނާސަބަތުގައި ބާއްވާ ޚާއްސަ ޖަލްސާ އޮންނާނީ ޑިސެމްބަރު 13 ވަނަ ދުވަހުގެ ރޭ ދަރުބާރުގޭގައެވެ.