މެއި މަހު ފެށި ސީ-ޓު-އެއާ ކާގޯ މެދުވެރިކޮށް 1000 ޓަނުގެ މުދާ ރާއްޖެއިން އެކްސްޕޯޓުކޮށްފި

މި އަހަރުގެ މެއި މަހު ވެލާނާ އިންޓަނޭޝަނަލް އެއަރޕޯޓު (ވީއައިއޭ) އިން ފެށި ސީ-ޓު-އެއާ ކާރގޯ ޓްރާންޝިޕްމެންޓް މެދުވެރިކޮށް މިހާތަނަށް 1000 ޓަނުގެ މުދާ އެކްސްޕޯޓުކޮށްފައިވާ ކަމަށް، އެއަރޕޯޓު ހިންގަމުން އަންނަ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ. 

ސީ-ޓު-އެއާ ކާގޯގެ ޚިދުމަތަކީ މޯލްޑިވްސް ޕޯޓްސް ލިމިޓެޑް (އެމްޕީއެލް) މެދުވެރިކޮށް ކަނޑުމަގުން ގެންނަ މުދާ، ރައްކާތެރިކަމާއެކު ވައިގެ މަގުން އެހެން މަންޒިލުތަކަށް ފޮނުވުމަށް އެމްއޭސީއެލްއިން ފެށި ޚިދުމަތެކެވެ.

މި ޚިދުމަތް މެދުވެރިކޮށް މި އަހަރުގެ މިހާތަނަށް މައިގަނޑުގޮތެއްގައި އެކްސްޕޯޓްކޮށްފައި ވަނީ ބަންގްލަދޭޝް އިން ރާއްޖެއަށް ކަނޑުމަގުން އެތެރެކުރާ ގާމެންޓް ޝިޕްމަންޓްތަކެވެ. 

އެމްއޭސީއެލްއިން ހާމަކޮށްފައިވާ ގޮތުގައި، ރާއްޖެއާއި ލަންޑަނާއި ދެމެދު ދަތުރުކުރާ ވަރޖިން އެޓްލާންޓިކް ވެސް ވަނީ މި ޚިދުމަތާއި ހޯމަ ދުވަހު ގުޅިފައެވެ. އެހެންކަމުން މިހާރު މި ހިދުމަތް ފޯރުކޮށްދިނުމަށް އެ ކުންފުންޏާއި 12 އެއަރލައިނެއް ގުޅިފައިވާކަމަށް ހާމަކޮށްފައިވެއެވެ. 

ވާޖިން އެޓްލާންޓިކްގެ އިތުރުން އެމްއޭސީއެލް އާއި ގުޅިގެން މި ޚިދުމަތް ފޯރުކޮށްދޭ އެއާލައިންތަކުގެ ތެރޭގައި މިހާރު ހިމެނެނީ ޓާކިޝް އެއަރލައިންސް، ގަތަރު އެއަރވޭސް، އެމިރޭޓްސް އެއަރލައިން، އިއްތިހާދު އެއަރވޭސް، އޭރޯފްލޮޓް، ނިއޯސް، ގަލްފް އެއާ، ޑިސްކަވާ އެއަރލައިންސް، އޮސްޓްރިއަން އެއަރލައިންސް، ކޮންޑޯ އަދި ބްރިޓިޝް އެއާވޭސްއެވެ.

އެމްއޭސީއެލްއިން އިތުރަށް ހާމަކޮށްފައިވާ ގޮތުގައި، މި ޚިދުމަތާއެކު އެ ކުންފުނިން ދެމުންގެންދާ ކާގޯގެ ޚިދުމަތް ވަނީ އިތުރަށް ފުޅާވެގެން ގޮސްފައެވެ. އަދި ދުނިޔޭގެ ކާގޯ ލޮޖިސްޓިކްސް ޗެއިންގައި ވީއައިއޭގެ ހިއްސާ އޮތުމަކީ އޭގެ ފައިދާ ރާއްޖޭގެ އިޤްތިޞާދަށް ކުރާނެ ކަމެއް ކަމަށް ވެސް އެ ކުންފުނިން ހާމަކޮށްފައިވެއެވެ.