ރިޕޯޓް
ނުކުޅެދުންތެރިކަން ހުންނަ ފަރާތްތަކަށް ފުރުޞަތުތައް ފުޅާކުރަން މުޖުތަމަަޢުގެ އެއްބާރުލުން ބޭނުންވޭ

ނުކުޅެދުންތެރިކަން ހުންނަ ފަރާތްތަކަސް މުޖުތަމައުގެ އެއްބާރުލުން ފޮޓޯ:އިންޓަނެޓް
ކޮންމެ އަހަރެއްގެ ޑިސެމްބަރު 3 ވަނަ ދުވަހަކީ ނުކުޅެދުންތެރިކަން ހުންނަ މީހުންގެ ބައިނަލްއަޤްވާމީ ދުވަހެވެ. މި ދުވަހުގެ މައިގަނޑު މަޤްޞަދަކީ ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކާއި ކަރާމާތް ރައްކާތެރިކޮށް، އެ ފަރާތްތަކަށް އިޙްތިރާމްކުރާ މުޖުތަމަޢުއެއް ބިނާކުރުމެވެ. މިއަހަރުގެ ޚާއްޞަ އަމާޒަކީ ހުރަސްތައް ނައްތާލުމާއި، ތަޢުލީމު، ވަޒީފާ އަދި ވަސީލަތްތަކަށް ވާޞިލުވުމުގައި ހަމަހަމަ ފުރުޞަތުތައް ހޯދައިދިނުމަށް ވަކާލާތުކުރުމެވެ.
ދުނިޔޭގެ އާބާދީގެ ގާތްގަނޑަކަށް 15 އިންސައްތަ، ނުވަތަ 1 ބިލިއަނަށްވުރެ ގިނަ މީހުން ދިރިއުޅެމުންދަނީ ކޮންމެވެސް ބާވަތެއްގެ ނުކުޅެދުންތެރިކަމަކާ އެކުގައެވެ. މި ފަރާތްތަކުގެ ތެރެއިން ގިނަ ބަޔަކު ކުރިމަތިލާންޖެހެނީ އިޖުތިމާޢީ ތަޢައްޞުބު، ތަފާތުކުރުން އަދި ނިޒާމީ ހުރަސްތަކާއެވެ. ޚާއްޞަކޮށް ތަޢުލީމާއި ވަޒީފާގެ ފުރުޞަތުތަކުން މަޙްރޫމްވެފައިވާ މިންވަރު ފާހަގަކޮށްލެވެއެވެ. ދެމެހެއްޓެނިވި ތަރައްޤީގެ މަސައްކަތްތަކުގައި ނުކުޅެދުންތެރިކަން ހުންނަ މީހުންގެ އަޑާއި ބޭނުންތައް ހިމެނުމަށްޓަކައި، ތަފާސްހިސާބު އެއްކުރުމާއި އެކުލެވޭ ސިޔާސަތުތައް އެކުލަވާލުމުގެ މުހިންމުކަން ވޯލްޑް ބޭންކުން ފާހަގަކޮށްފައިވެއެވެ.
ދިވެހިރާއްޖޭގެ އެންމެ ފަހުގެ ބޯހިމެނުމުގެ ތަފާސްހިސާބުތަކުން ދައްކާގޮތުގައި އާބާދީގެ ގާތްގަނޑަކަށް 10 އިންސައްތަ (24,401 މީހުން) އަކީ ކޮންމެވެސް ބާވަތެއްގެ ނުކުޅެދުންތެރިކަމެއް ހުންނަ މީހުންނެވެ. އެންމެ ގިނައިން ފެންނަނީ ހަރަކާތްތެރިވުމާ ގުޅުންހުރި ގޮންޖެހުންތަކެވެ. ޚާއްޞަކޮށް އަތޮޅުތަކުގައި މި މައްސަލަ ބޮޑުވެފައިވަނީ ވަސީލަތްތަކަށް ވާޞިލުވުމުގެ ފުރުޞަތު މަދުވުމުގެ ސަބަބުންނެވެ. ކަންބޮޑުވާންޖެހޭ ކަމަކީ ނުކުޅެދުންތެރިކަން ހުންނަ ކުދިން ސްކޫލަށް ނުދާ މިންވަރު އެހެން ކުދިންނާ އަޅާބަލާއިރު ތިން ގުނަ އިތުރުވުމެވެ. މިއިން ފާހަގަވަނީ އަމާޒުކުރެވިފައިވާ ތަޢުލީމީ ޕްރޮގްރާމްތަކުގެ މުހިންމުކަމެވެ.
ވަޒީފާގެ ތަފާސްހިސާބުތަކުން ދައްކާގޮތުގައި ޖިންސުގެ ހަމަހަމަކަން ނެތްކަން ފާހަގަކުރެވެއެވެ. ނުކުޅެދުންތެރިކަން ހުންނަ އަންހެނުންގެ ތެރެއިން 28 އިންސައްތަ މީހުން ވަޒީފާގެ ބާޒާރުގައި ބައިވެރިވާއިރު، ފިރިހެނުންގެ ތެރެއިން 41 އިންސައްތަ މީހުން ބައިވެރިވެއެވެ.
ދިވެހިރާއްޖޭގައި ޚާއްޞަ އެހީއަށް ބޭނުންވާ ފަރާތްތަކަށް ފުރުޞަތު އިތުރުކުރުމަށްޓަކައި އެކި މަސައްކަތްތައް ކުރެވެމުންދެއެވެ. މީގެ ތެރޭގައި ޚާއްޞަ ޕްރޮގްރާމްތައް ހިންގުމާއި ވަސީލަތްތަކަށް ފަސޭހައިން ވާޞިލުވެވޭނެ ގޮތްތައް ޤާއިމުކުރުން ހިމެނެއެވެ. ނަމަވެސް، މާނަވީ ބަދަލެއް ގެނައުމަށްޓަކައި ދެމެހެއްޓެނިވި ވަކާލާތުކުރުމާއި، އިތުރު ވަސީލަތްތަކާއި، އަދި މުޖުތަމަޢުގެ ހޭލުންތެރިކަން އިތުރުކުރުން މުހިންމެވެ.
އިޖްތިމާޢީ އަދި އާއިލީ ތަރައްޤީއާ ބެހޭ ވުޒާރާއިން ވޭތުވެދިޔަ 9 މަސްދުވަހުގެ ތެރޭގައި އެތަނުގެ ޚިދުމަތްތަކަށް ފާހަގަކޮށްލެވޭ ހެޔޮބަދަލުތަކެއް ގެނެސްފައިވެއެވެ. ކ. ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަރުކަޒުން ދެމުންގެންދާ ޚިދުމަތުގެ ފެންވަރު ރަނގަޅުކުރުމާއެކު، އެތަނުން ފަރުވާ ފުރިހަމަކުރާ ފަރާތްތައް އަނބުރާ އާއިލާތަކާ ހަވާލުކޮށް، މުޖުތަމަޢުގައި އުޅެވޭނެ މަގުފަހިކުރުމަށް މުހިންމު މަސައްކަތްތަކެއް ކުރެވި، ބޮޑެތި ބަދަލުތަކެއް ގެނެވިފައިވެއެވެ.
އެންމެ ބޮޑު ބަދަލަކީ އެތަނަކީ ދާއިމީކޮށް މީހުން ބައިތިއްބާ ތަނެއްގެ ބަދަލުގައި ވަގުތީ ހިޔާވައްސެއްގެ ގޮތުގައި ހަމަޖައްސާ، އެތަނުގައި ފަރުވާދީ އަނބުރާ މުޖުތަމަޢަށް މީހުން ނެރުމުގެ އަމާޒަށް ޕްރޮގްރާމްތައް ހިންގަން ފެށުމެވެ. މިހާރު އެތަން ހިންގަމުންދަނީ ފަރުވާއާއި މުޖުތަމަޢަށް ނެރުމުގެ އަޚްލާޤާއި ހުނަރު ދަސްކޮށްދޭ ތަނެއްގެ ނިޒާމަށެވެ.
ޚާއްޞަ އެހީއަށް ބޭނުންވާ މީހުންގެ މަރުކަޒުގެ އުމްރާނީ ވަސީލަތްތަކަށްވެސް ވަނީ މުހިންމު ބަދަލުތަކެއް ގެނެވިފައެވެ. އެގޮތުން މުޖުތަމަޢަށް އަނބުރާ ނެރޭ މީހުންނަށް ބޭނުންވާ ފަރުވާއާއި ޕްރޮގްރާމްތައް ހިންގުމަށް ޚާއްޞަ އަލުން އިޖްތިމާޢީ މާޙައުލަށް ތައްޔާރުކުރުމުގެ ބައިގަނޑެއް ވަނީ އެތާނގައި ޤާއިމުކުރެވިފައެވެ. މިތަނުގައި ހުނަރު ދަސްކޮށްދިނުމުގެ ޕްރޮގްރާމްތައް ހިންގައެވެ. އެގޮތުން ދާދި ފަހުން ވަނީ ކޭކު ތައްޔާރުކުރުމުގެ ކޯހެއްވެސް ހިންގާފައެވެ. މިކޯހުގައި 10 މީހުން ބައިވެރިވިއެވެ.
ޚާއްޞަ އެހީއަށް ބޭނުންވާ ފަރާތްތައް އަމާޒުކޮށް އިޖްތިމާޢީ އަދި އާއިލީ ތަރައްޤީއާ ބެހޭ ވުޒާރާއާއި މޯލްޑިވްސް ޕޮލިޓެކްނިކް ގުޅިގެން "އިލެކްޓްރިކް އިންސްޓޯލޭޝަން އަދި މެއިންޓަނަންސް ކޯސް" ވެސް ވަނީ ކުރިއަށް ގެންގޮސްފައެވެ. މި ކޯސް ޚާއްޞަކޮށްފައިވަނީ އަޑުއެހުމުގެ ނުކުޅެދުންތެރިކަން ހުންނަ ފަރާތްތަކަށެވެ. އަޑުއެހުމުގެ ނުކުޅެދުންތެރިކަން ހުންނަ 17 މީހުން މި ކޯހުގައި ބައިވެރިވެފައިވެއެވެ.
ނުކުޅެދުންތެރިކަން ހުންނަ މީހުންގެ ބައިނަލްއަޤްވާމީ ދުވަހުން އަޅުގަނޑުމެންނަށް ހަނދާންކޮށްދެނީ ކޮންމެ މީހަކަށްވެސް، އޭނާގެ ޤާބިލުކަމަށް ބެލުމެއްނެތި، ކުރިއެރުމުގެ ފުރުޞަތު އޮތް ދުނިޔެއެއް އުފެއްދުމަކީ އަޅުގަނޑުމެން އެންމެންގެވެސް ޒިންމާއެއްކަމެވެ. މި ޑިސެމްބަރު 3 ގައި، އެއްވެސް މީހަކު ފަހަތަށް ނުޖެހޭ ގޮތަށް، އެންމެންނަށް އޯގާތެރި، ހަމަހަމަ މުޖުތަމަޢުއެއް ބިނާކުރުމަށް އަޅުގަނޑުމެން އެންމެން އަޒުމް ކަނޑައަޅަންޖެހެއެވެ.
ޚާއްޞަ އެހީއަށް ބޭނުންވާ ފަރާތްތައް މުޖުތަމަޢުގެ ކަންކަމުގައި ހިމެނުމަށް އެޅޭ ކޮންމެ ފިޔަވަޅަކުން އަޅުގަނޑުމެންގެ އިންސާނިއްޔަތުކަން އިތުރުވެގެންދެއެވެ. މި ދުވަހަކީ ހަމައެކަނި ހޭލުންތެރިކަން އިތުރުކުރުމުގެ ދުވަހެއްގެ ގޮތުގައި ނުބަލައި، ޢަމަލީ ގޮތުން ބަދަލުތައް ގެނައުމަށް މަސައްކަތްކުރުމުގެ ފުރުޞަތެއްގެ ގޮތުގައި ބޭނުންކުރަންޖެހެއެވެ.
ނުކުޅެދުންތެރިކަން ހުންނަ ފަރާތްތަކަށް ހަމަހަމަ ފުރުޞަތުތައް ހޯދައިދިނުމަށްޓަކައި، ތަޢުލީމީ ދާއިރާގައާއި، ވަޒީފާގެ މައިދާނުގައި އަދި އާންމު ދިރިއުޅުމުގައި ހުރި ހުރަސްތައް ނައްތާލުމަށް އިތުރު މަސައްކަތްތަކެއް ކުރަންޖެހެއެވެ. މީގެ ތެރޭގައި ޤާނޫނީ އަދި ސިޔާސަތުތަކުގެ ބަދަލުތައް ގެނައުމާއި، ވަސީލަތްތަކަށް ވާޞިލުވުމުގެ ފުރުޞަތު ފަހިކޮށްދިނުމާއި، އަދި މުޖުތަމަޢުގެ ނަޒަރިއްޔާތު ބަދަލުކުރުން ހިމެނެއެވެ.
ނުކުޅެދުންތެރިކަން ހުންނަ މީހުންގެ ބައިނަލްއަޤްވާމީ ދުވަހަކީ އަޅުގަނޑުމެންގެ މުޖުތަމަޢުގެ ހުރިހާ މެންބަރުންނަށް ހަމަހަމަ ފުރުޞަތުތަކާއި ޙައްޤުތައް ކަށަވަރުކޮށްދިނުމުގެ މުހިންމުކަން އަލުން ހަނދާންކޮށްދޭ ދުވަހެކެވެ. މި މަޤްޞަދު ޙާޞިލުކުރުމަށް، އަޅުގަނޑުމެން އެންމެން އެކުގައި މަސައްކަތްކުރަންޖެހެއެވެ. އެއްވެސް މީހަކު ފަހަތަށް ނުޖެހޭ، އެކުލެވޭ އަދި ދެމެހެއްޓެނިވި މުޖުތަމަޢުއެއް ބިނާކުރުމަކީ އަޅުގަނޑުމެން އެންމެންގެ ޒިންމާއެކެވެ.