މިދިޔަ އަހަރު އެހީދޭ ފަރާތްތަކަށް އަމާޒުކޮށް ރެކޯޑު އަދަދަކަށް ހަމަލާދީފައިވޭ: އ.ދ

ވޭތުވެދިޔަ 2025 ވަނަ އަހަރަކީ އިންސާނީ އެހީތެރިކަން ފޯރުކޮށްދޭ ފަރާތްތަކަށް އަމާޒުކޮށް ރެކޯޑު އަދަދަކަށް ނުރައްކާތެރި ހަމަލާތައް ދިން އަހަރެއް ކަމަށް އދ. ގެ އިންސާނީ އެހީއާ ބެހޭ އިދާރާއިން ހާމަކޮށްފިއެވެ.

މިފަދަ ހަމަލާތައް އިތުރުވުމުގެ މައިގަނޑު އެއް ސަބަބަކީ ހަނގުރާމަތަކުގައި ހަތިޔާރު އެޅި ޑްރޯން ބޭނުންކުރާ މިންވަރު އިތުރުވުން ކަމަށް ރިޕޯޓުތައް ބުނެއެވެ.

އެހީދޭ މަސައްކަތްތެރިންގެ ސަލާމަތާ ބެހޭ މަޢުލޫމާތު އެއްކުރާ "އެއިޑް ވޯކާ ސެކިއުރިޓީ ޑޭޓާބޭސް" ގެ ތަފާސްހިސާބުތައް ދައްކާ ގޮތުން، 2025 ވަނަ އަހަރު އެކަނިވެސް 907 އެހީތެރިއަކު މަރާލައި، ޒަޚަމްކޮށް ނުވަތަ ރަހީނުކޮށްފައިވެއެވެ. މީގެ ތެރެއިން 350 މީހުން މަރުވެފައިވާއިރު، މިއީ 2024 ވަނަ އަހަރު ރެކޯޑު ކުރެވުނު 387 މަރާ އަޅާބަލާއިރު ކުޑަ ދަށްވުމެކެވެ. މީގެ އިތުރުން އެހީދޭ ފަރާތްތަކަށް އެންމެ ނުރައްކާތެރި ތަނެއްގެ ގޮތުގައި ފާހަގަކުރެވުނީ ޣައްޒާއެވެ. ޣައްޒާގައި އެކަނިވެސް 186 އެހީތެރިއަކު މަރާލާފައިވާއިރު، ދެވަނައަށް އެންމެ ނުރައްކާތެރި ގައުމަކީ ސޫދާނެވެ.

އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ވަނީ މި ހަމަލާތަކަކީ ބަލައިގަނެވޭނެ ކަންކަން ނޫން ކަމަށް ވިދާޅުވެ، ހަނގުރާމައިގެ ޤަވާޢިދުތަކަށް އިޙްތިރާމް ކުރުމަށާއި ކުށްވެރިން ޒިންމާދާރު ކުރުވުމަށް ޤައުމުތަކަށް ގޮވާލައްވާފައެވެ. ގުޓެރެސް ވިދާޅުވީ، "އެހެން މީހުންނަށް ޚިދުމަތް ކުރުމަކީ މިހާރު ދުވަހަކުވެސް ނުވާހާ ނުރައްކާތެރި ކަމަކަށް ވެއްޖެ" ކަމަށެވެ. އަދި އދ. ގެ އެހީގެ ކަންކަމާ ބެހޭ އިސްވެރިޔާ ޓޮމް ފްލެޗާ ވިދާޅުވީ، އަގުހެޔޮ އަދި ފަސޭހައިން ބޭނުންކުރެވޭ ހަތިޔާރު އެޅި ޑްރޯންތައް އިތުރުވުމަކީ ނުރައްކާ ބޮޑުވި ސަބަބެއް ކަމަށެވެ.

މިދިޔަ އަހަރުގެ މާޗު މަހު ޑިމޮކްރެޓިކް ރިޕަބްލިކް އޮފް ކޮންގޯގެ އިރުމަތީ ގޯމާއަށް ދިން ޑްރޯން ހަމަލާއެއްގައި ފަރަންސޭސި އެހީތެރިއަކު ހިމެނޭހެން މަދުވެގެން ތިން މީހުން މަރުވެފައިވާއިރު، ސޫދާނާއި ޔޫކްރެއިންގައި އެހީ ހިފައިގެންދާ ގާފިލާތަކަށް ވެސް ތަކުރާރުކޮށް ހަމަލާދީފައިވެއެވެ. އޮކްސްފެމްގެ އިންސާނީ އެހީގެ ސިޔާސަތާ ބެހޭ އިސްވެރިޔާ ބުޝްރާ ޚާލިދީ ވިދާޅުވީ، "އަޅުގަނޑުމެންނަށް މި ފެންނަނީ ސީދާ އިންސާނީ އެހީތެރިކަމުގެ ޢަމަލުތަކަށް އަމާޒުކޮށް ދެވޭ ހަމަލާތަކެއް" ކަމަށެވެ.

އެހީދޭ ފަރާތްތަކަށް ހަމަލާތައް އިތުރުވަމުންދަނީ އެ މަސައްކަތްތަކަށް ލިބޭ ފަންޑު މަދުވަމުންދާ ދަނޑިވަޅެއްގައެވެ. ޔޫރަޕިއަން ކޮމިޝަނުން ނެރުނު ބަޔާނެއްގައި ބުނެފައިވަނީ، "މަރުވާ ކޮންމެ އެހީތެރިއަކީ ހަމައެކަނި އަމިއްލަ ހިތާމައެއް ނޫން؛ އެއީ ބައިނަލްއަޤްވާމީ މުޖުތަމަޢުން އެންމެ އަސާސީ ވަޢުދުތައް ފުއްދުމުގައި ވެފައިވާ ނާކާމިޔާބީއެއް،" ކަމަށާއި އެހީ ފޯރުކޮށްދިނުމުގައި ދެމިތިބޭނެ ކަމަށެވެ.