އިސްރާއީލުގެ ޣައިރުޤާނޫނީ އާބާދީތަކުން އުފައްދާ މުދާ އެތެރެކުރުން މަނާކުރުމަށް އަނެއްކާވެސް ގޮވާލައިފި

އިސްރާއީލުން ޣައިރުޤާނޫނީ ގޮތުގައި ވެރިވެގަނެގެން އުޅޭ ފަލަސްޠީނުގެ ހުޅަނގު އައްސޭރީގައި ހަދާފައިވާ ޔަހޫދީ އާބާދީތަކުގައި އުފައްދާ މުދާތައް އިނގިރޭސިވިލާތަށް އެތެރެކުރުން މަނާކުރުމަށް، އެ ގައުމުގެ ޕާލިމަންޓުގެ ފޮރިން އެފެއާޒް ކޮމިޓީގެ ޗެއަރ އެމިލީ ތޯންބެރީ އަނެއްކާވެސް އިނގިރޭސި ސަރުކާރަށް ގޮވާލައްވައިފިއެވެ.

ތޯންބެރީ ވިދާޅުވީ، މިފަދަ ފިޔަވަޅެއް އެޅުމަކީ އިސްރާއީލާއި ފަލަސްޠީނުގެ މައްސަލައަށް ދެ ދައުލަތުގެ ޙައްލެއް ހޯދުމަށް ކުރެވޭ އުންމީދުތައް ދެމެހެއްޓުމަށް އެޅޭނެ މުހިންމު ބާރެއް ކަމަށެވެ. އަދި އޭނާ އިސްރާއީލުގެ ހުރިހާ މުދަލެއް މަނާކުރުމަށް ތާއީދު ނުކުރެއްވި ނަމަވެސް، ޣައިރުޤާނޫނީ އާބާދީތަކުން އުފައްދާ މުދަލަށް އަމާޒުކޮށް ފިޔަވަޅު އެޅުމަކީ، އިސްރާއީލުން އާބާދީތައް ފުޅާކުރުމާއި ފަލަސްޠީނުގެ ރައްޔިތުން އެމީހުންގެ ބިމުން ނެރެލުމަށް ކުރާ މަސައްކަތްތައް ހުއްޓުވުމަށް އެޅޭނެ ހުރަހެއް ކަމަށް އޭނާ ފާހަގަކުރެއްވިއެވެ. މީގެއިތުރުން، އިނގިރޭސިވިލާތުގެ ފައިސާ ހުޅަނގު އައްސޭރީގައި އިސްރާއީލުގެ އާބާދީތައް ފުޅާކުރުމަށް އެހީތެރިވެދޭ އެއްޗަކަށް ވެގެން ނުވާނެ ކަމަށްވެސް އޭނާ ވިދާޅުވިއެވެ.

މި މައްސަލައިގައި އިނގިރޭސި ޚާރިޖީ ވަޒީރު އެޑް މިލިބޭންޑްވެސް ވަނީ ބުދަ ދުވަހު އިސްރާއީލަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ހުޅަނގު އައްސޭރީގައި އާ އާބާދީތަކެއް ބިނާކުރުމަށް އިސްރާއީލުން އިއުލާނުކުރި ބީލަމަކީ "ބަލައިގަނެވޭނެ ކަމެއް ނޫން" ކަމަށާއި، މީގެ ސަބަބުން ދެ ދައުލަތުގެ ޙައްލަކަށް ވާސިލުވުމަށް ކުރާ މަސައްކަތްތަކަށް ހުރަސްއެޅޭނެ ކަމަށް ވިދާޅުވިއެވެ.

މިވަގުތު އިނގިރޭސި ސަރުކާރުން އެ އާބާދީތަކާއެކު ވިޔަފާރިކުރުން މުޅިން މަނާކޮށްފައި ނުވި ނަމަވެސް، އެފަދަ އިޤްތިޞާދީ އަދި މާލީ ހަރަކާތްތަކުގައި ބައިވެރިނުވުމަށް އިނގިރޭސި ވިޔަފާރިތަކަށް ވަރަށް ބޮޑަށް އިލްތިމާސްކުރެއެވެ. އަދި އެ އާބާދީތަކުގައި އުފައްދާ މުދަލަށް އިނގިރޭސިވިލާތުން އިސްރާއީލާއި ފަލަސްޠީނާއެކު ހަދާފައިވާ ވިޔަފާރީގެ އެއްބަސްވުންތަކުގެ ދަށުން ލިބޭ ޓެރިފް އިނާޔަތްތަކެއް ނުލިބެއެވެ.

މީގެއިތުރުން، މުދާ ގަންނަ ފަރާތްތަކަށް އޮޅުން ނާރާނެހެން، އެއީ އާބާދީތަކުގައި އުފައްދާފައިވާ މުދާކަން އެނގޭނެ ގޮތަށް ލޭބަލްކުރުން އިނގިރޭސި ގަވާއިދުތައް ލާޒިމުކުރެއެވެ. އަދި ސަރުކާރުން ދަނީ އެ އާބާދީތަކުގެ މުދަލާއި ޚިދުމަތްތަކުގެ ވިޔަފާރިއާ ގުޅޭގޮތުން އިތުރު ފިޔަވަޅުތައް އެޅުމަށް ވިސްނަމުންނެވެ.

ތޯންބެރީގެ މި ގޮވާލެއްވުމާއެކު، އިނގިރޭސި ވެރިކަންކުރާ ލޭބަރ ޕާޓީގެ މެންބަރުންގެ ފަރާތުން މިހާރު އޮތް އުސޫލުތަކަށްވުރެ ހަރުކަށި ފިޔަވަޅުތަކެއް އެޅުމަށް ސަރުކާރަށް ދަނީ ބާރުބޮޑުވަމުންނެވެ. އެގޮތުން ޕާލިމަންޓުގެ އެކި ކޮމިޓީތަކުގެ ޗެއަރުން ހިމެނޭހެން، އެ ޕާޓީގެ 130 އަށްވުރެ ގިނަ މެންބަރުން ވަނީ މިދިޔަ ޖޫން މަހު އެ އާބާދީތަކާއެކު ކުރާ ވިޔަފާރި އެއްކޮށް މަނާކުރުމަށް ތާއީދުކުރައްވާފައެވެ.

ތޯންބެރީ މީގެކުރިން ޖޫން މަހުވެސް ވަނީ ފަލަސްޠީނުގެ ބިންތަކަށް އިސްރާއީލުން ވެރިވެގަނެގެން އުޅޭ މައްސަލައިގައި އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން 2024 ވަނަ އަހަރު ނެރުނު ލަފައަށް ރިޢާޔަތްކުރައްވައި، އެ ޣައިރުޤާނޫނީ އާބާދީތަކުން އެތެރެކުރާ މުދާ ހުއްޓުވުމަށް ވަކާލާތު ކުރައްވާފައެވެ.