އެމެރިކާގެ އައު ދަތިކުރުމުގެ ފިޔަވަޅުތަކަކީ އެހެން ގައުމުތަކުގެ ސިޔާދަތަށް އަރައިގަތުން: އިރާން

އީރާނާއެކު ވިޔަފާރިކުރާ ކޮންމެ ގައުމަކަށް އަދަބު ދޭނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރާ ގުޅިގެން، އެމެރިކާއިން އަޅަން އުޅޭ އައު ދަތިކުރުމުގެ ފިޔަވަޅުތަކަކީ ގައުމުތަކުގެ ސިޔާދަތު ފުނޑުފުނޑުކޮށްލުން ކަމަށް ބުނެ އީރާނުން އެކަން ވަރަށް ބޮޑަށް ކުށްވެރިކޮށްފިއެވެ.

ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަގާއީ ވިދާޅުވީ، އެމެރިކާގެ މި އިއުލާނަކީ އދ. ގެ މެންބަރު ގައުމުތަކުގެ ސިޔާދަތީ އިމުން ބޭރުން ބާރުފޯރުވަން އުޅުން ކަމަށެވެ. އަދި އީރާނާއެކު ވިޔަފާރި ކުރުން ހުއްޓާލުމަށް ބޭރުގެ ބޭންކުތަކަށާއި ވިޔަފާރިތަކަށް ނުވަތަ އެއާޕޯޓުތަކަށް މަޖުބޫރު ކުރުމުގެ ހައްގެއް އެއްވެސް ގައުމަކަށް ނޯންނާނެ ކަމަށް އޭނާ ވިދާޅުވިއެވެ.

ބަގާއީ އިތުރަށް ވިދާޅުވީ "މީގެ ނަތީޖާއަކަށް ވާނީ އދ. ގެ ނިޒާމުގެ މައްޗަށް ބިނާވެފައިވާ ގައުމުތަކުގެ ސިޔާދަތު މުޅިން ގެއްލި، އިސްތިއުމާރީ ބާރުތަކުގެ ޒަމާނަށް އަނބުރާ ރުޖޫއަވުން" ކަމަށެވެ. އެމެރިކާގެ ރައީސް ޓްރަމްޕް ވަނީ ބުދަ ދުވަހު އީރާނާ ދެކޮޅަށް މިހާތަނަށް ހިންގާ އެންމެ ބޮޑު އިގްތިސާދީ ފިޔަވަޅުތައް އިއުލާނު ކޮށް، އީރާނާ ގުޅުން ބާއްވާ ކޮންމެ ފަރާތަކަށް ވަރުގަދަ އިގްތިސާދީ އަދަބުތަކާ ކުރިމަތިލާން ޖެހޭނެ ކަމުގެ އިންޒާރު ދީފައެވެ.

މީގެ އިތުރުން، އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވީ މި ފިޔަވަޅުތަކުގެ ސަބަބުން އީރާން ބޮޑު އަނދަވަޅަކަށް ވެއްޓޭނެ ކަމަށާއި، ދުނިޔޭގެ އެހެން ގައުމުތައް އޮތީ އެމެރިކާއާއެކު ނުވަތަ އެމެރިކާއާ ދެކޮޅަށް ކަމަށެވެ. ނަމަވެސް އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ އެމެރިކާގެ މި ފިޔަވަޅުތައް ފެއިލްވާނެ ކަމަށާއި، މިއީ މީގެ ކުރިންވެސް ފެނިފައިވާ ކަންކަން ކަމަށެވެ.

ދެ ގައުމުގެ ދެމެދުގައި މި ބަހުގެ ހަމަލާތައް ބަދަލުކުރެވެމުން މިދަނީ ސުލްހައިގެ ވާހަކަތައް ހުއްޓުމަކަށް އައިސްފައިވާ ދަނޑިވަޅެއްގައެވެ. އެމެރިކާގެ ނޭވީން އީރާނުގެ ބަނދަރުތައް ބަންދުކޮށްފައިވާއިރު، ހޮރްމޫޒް ކަނޑުއޮޅިން ތެޔޮ އުފުލުން ވަނީ ވަރަށް ބޮޑަށް ހުއްޓިފައެވެ. އެހެންނަމަވެސް، ބަޣުދާދުގެ އެދުމުގެ މަތިން އިރާގުގެ ބައެއް ތެޔޮ ޓޭންކަރުތަކަށް އެ ކަނޑުއޮޅިން ދަތުރުކުރުމުގެ ހުއްދަ އީރާނުން މިހާރު ވަނީ ދީފައެވެ.