5 އަހަރަށްފަހު އޮފީސްތަކުގެ ޓެލެޑްރާމާ މުބާރާތް ބާއްވަނީ : ބައިވެރިވާން ހުޅުވާލައިފި

ނޭޝަނަލް ސެންޓަރ ފޮރ ދި އާޓްސް (އެން.ސީ.އޭ) އިން 5 އަހަރުގެ މެދުކެނޑުމަކަށްފަހު "އެން.ސީ.އޭ އޮފީސްތަކުގެ ޓެލެޑްރާމާ މުބާރާތު" އަލުން ފަށައި، މި އަހަރުގެ މުބާރާތުގައި ބައިވެރިވުމުގެ ފުރުޞަތު ހުޅުވާލައިފިއެވެ.

މި މުބާރާތަކީ މުނިފޫހިފިލުވުމުގެ ދާއިރާއަށް ފަންނާނުން އިތުރުކޮށް، ފަންނުވެރީންނަށް ހިތްވަރުދީ އަގުވަޒަންކުރުމާއެކު، އެކުވެރި ވާދަވެރި މާހައުލެއްގައި ފަންނުވެރިކަން ތަރައްޤީކުރުމުގެ މަޤްޞަދުގައި ބާއްވަމުން އަންނަ، ބޮޑު މަޤުބޫލުކަމެއް ލިބިފައިވާ މުބާރާތެކެވެ.

އެން.ސީ.އޭ އިން މިހާރު ވަނީ 1446 ވަނަ އަހަރުގެ މި މުބާރާތުގައި ބައިވެރިވުމުގެ ފުރުޞަތު މި މަހުގެ 12 ވަނަ ދުވަހާ ހަމައަށް ހުޅުވާލާފައެވެ. މި މުބާރާތުގައި ބައިވެރިވެވޭނީ ސަރުކާރު އޮފީސްތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ މުއައްސަސާތަކަށެވެ. ކޮންމެ އޮފީހަކުން މުބާރާތަށް ހުށަހެޅޭނީ އެންމެ ޓެލެޑްރާމާއެކެވެ.

މުބާރާތުގައި ބައިވެރިކުރާ ޓެލެޑްރާމާގެ ދިގުމިނަކީ މަދުވެގެން 45 މިނެޓާއި ގިނަވެގެން 50 މިނެޓެވެ. ޑްރާމާ ހުށަހަޅަންވާނީ ދިވެހި ބަހުންނެވެ. މުބާރާތުގައި ބައިވެރިކުރާ ޑްރާމާތައް ދައްކަން ފަށާނީ ރަމަޟާންމަހުގެ ތެރޭގައެވެ.

މުބާރާތުގައި ޖުމްލަ 14 ވަނައެއް ހޮވާގޮތަށް ވަނީ ހަމަޖެހިފައެވެ. އޭގެ ތެރޭގައި އެންމެ މޮޅު ޑްރާމާއަށް 50,000 ރުފިޔާ، އެންމެ މޮޅު އެކްޓަރ (އަންހެން/ފިރިހެން) އަށް 15,000 ރުފިޔާ، އެންމެ މޮޅު ސަޕޯޓިންގ އެކްޓަރ (އަންހެން/ފިރިހެން) އަށް 10,000 ރުފިޔާ، އަދި އެންމެ މޮޅު ނިއު ކަމަރ (އަންހެން/ފިރިހެން) އަށް 5,000 ރުފިޔާގެ ފައިސާގެ އިނާމު ހިމެނެއެވެ.

އެން.ސީ.އޭ އިން ބުނީ މުބާރާތް ބޭއްވުމަށް މަދުވެގެން 5 އޮފީހެއްގެ ބައިވެރިވުން ބޭނުންވާނެ ކަމަށެވެ. މުބާރާތުގެ ވަނަތައް ހޮވުމުގައި ބަލާނީ ހުރިހާ ފަނޑިޔާރުން ދޭ މާކްސްގެ އެވްރެޖަށެވެ. އަދި "ވިއުވަރސް ޗޮއިސް" އެވޯޑު ލިބޭނީ އެސް.އެމް.އެސްއަށް ހުޅުވާލައިގެން އެންމެ ގިނަ އެސް.އެމް.އެސް ލިބޭ ފަރާތަކަށެވެ.