ހަނގުރާމައަށް ހަ މަސް ފުރުނުއިރު އީރާނުގެ އާންމު ދިރިއުޅުމަށް ބޮޑެތި ބަދަލުތަކެއް

އެމެރިކާ އާއި އިސްރާއީލުން އީރާނާ ދެކޮޅަށް ފެށި ހަނގުރާމައަށް ހަ މަހަށް ވުރެ ގިނަ ދުވަސް ވެފައިވާއިރު، އެ ގައުމުގެ 90 މިލިއަނެއްހާ ރައްޔިތުންގެ ދިރިއުޅުމުގެ ހާލަތު އިންތިހާއަށް ދަށަށް ގޮސް، އާންމު ދިރިއުޅުން ބޮޑު ތަކުލީފަކަށް ވެއްޖެއެވެ.

 ފެބްރުއަރީ 28 ގައި ދިން ހަމަލާތަކުގައި އީރާނުގެ އޭރުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް ކޮމާންޑަރުން އަވަހާރަވި ނަމަވެސް، ވެރިކަން ދަމަހައްޓައި އައު ރޫހީ ލީޑަރެއްގެ ގޮތުގައި މުޖްތަބާ ޚާމަނާއީ ވަނީ ހަމަޖައްސާފައެވެ.

ހަނގުރާމައިގެ ސަބަބުން އީރާނުގެ ތެލާއި ގޭހުގެ ވަސީލަތްތަކަށާއި، ބަނދަރުތަކާއި ވައިގެ ބަނދަރުތަކަށް ބޮޑެތި ގެއްލުންތަކެއް ވަނީ ލިބިފައެވެ. ތަފާސްހިސާބުތަކުން ދައްކާ ގޮތުގައި އަހަރުން އަހަރަށް ބަލާއިރު އިންފްލޭޝަން ވަނީ 89 އިންސައްތައަށް އަރާފައެވެ. އަދި ކާބޯތަކެތީގެ އަގުތައް ވަނީ 127 އިންސައްތައަށް އުފުލިފައެވެ. މީގެ އިތުރުން، އީރާނުގެ ފައިސާގެ އަގު ރެކޯޑު މިންވަރަކަށް ދަށްވެ، އެމެރިކާ ޑޮލަރަކަށް 2.06 މިލިއަން ރިއާލް ވަނީ އަރާފައެވެ.

ހަނގުރާމަ ހުއްޓުވުމަށް ޑިޕްލޮމެޓިކް ހައްލެއް ހޯދުމާއި، ހަނގުރާމަ ކުރިއަށް ގެންދިއުމާ މެދު ސަރުކާރުގެ އެތެރޭގައި ޚިޔާލުތަފާތުވުންތައް އޮތް ނަމަވެސް، އެމެރިކާގެ ކުރިމަތީގައި ކުޑަކަކޫ ނުޖެހުމަށް އެންމެން އެއްބަސްވެއެވެ. އޮމާނާއެކު ހޮރުމުޒް ކަނޑުއޮޅިން ދަތުރުފަތުރުގެ މަގެއް ހުޅުވުމަށް އީރާނުން މަސައްކަތް ކުރި ނަމަވެސް، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ބޭނުންވަނީ އެއްވެސް ހުރަހެއް ނެތި އެ ސަރަހައްދު އެއްކޮށް ހުޅުވާލުމަށެވެ.

ގައުމުގެ އެތެރޭގެ މަސްލަހަތު ދެމެހެއްޓުމުގެ ނަމުގައި ޖުޑިޝަރީ އާއި ޖާސޫސީ އިދާރާތަކުން އަންނަނީ ހަރުކަށި ފިޔަވަޅުތަކެއް އަޅަމުންނެވެ. އޭގެ ތެރޭގައި މަރުގެ އަދަބު ދިނުން އިތުރުވުމާއި، މަޖުބޫރު ހިޖާބުގެ ގަވާއިދުތައް ތަންފީޒުކުރުމަށް ވިޔަފާރިތައް ބަންދުކުރުން ހިމެނެއެވެ. މިކަމާ ގުޅިގެން އދ. އާއި އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ.