އީރާނުން އުރުދުން އަދި ޔޫއޭއީގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފި

އެމެރިކާއިން އީރާނުގެ ލާރަކް އައިލެންޑަށް ދިން ހަމަލާތަކުގެ ބަދަލުހިފުމުގެ ގޮތުން، އުރުދުން އަދި ޔުނައިޓެޑް އަރަބް އެމިރޭޓްސް (ޔޫއޭއީ) ގައި ހުރި އެމެރިކާގެ އަސްކަރީ މަރުކަޒުތަކަށާއި ވަސީލަތްތަކަށް ހަމަލާދީފައިވާ ކަމަށް އީރާނުން ހާމަކޮށްފިއެވެ.

 މިއީ ޖުލައި މަހުގެ ފަހުކޮޅަށް ފަހު ދެފަރާތުގެ ދެމެދުގައި މިފަދަ ސީދާ އަސްކަރީ ކުރިމަތިލުމެއް ހިނގި ފުރަތަމަ ފަހަރެވެ. މި ކުރިމަތިލުންތައް ފެށުނީ ހޮރްމޫޒް ކަނޑުއޮޅީގައި އޮންނަ ލާރަކް އައިލެންޑުގައި ހުރި އީރާނުގެ ރޮކެޓް ލޯންޗަރުތަކަކަށް އެމެރިކާއިން ހަމަލާދިން ކަމަށް ބުނުމާ ގުޅިގެންނެވެ.

މި ހާދިސާއާ ގުޅިގެން އީރާނުގެ ރައީސް މަސްޢޫދު ޕެޒެޝްކިއާން ވިދާޅުވީ، އީރާނަކީ ހަނގުރާމައަކަށް އެދޭ ޤައުމެއް ނޫން ކަމަށާއި ނަމަވެސް އެއްވެސް ފަރާތެއްގެ އުދުވާނަކަށް ހިމޭނުން ނޯންނާނެ ކަމަށެވެ. އަދި އީރާނަށް ހަމަލާދޭ ކޮންމެ ފަރާތަކަށް ވަރުގަދަ ރައްދެއް ދޭނެ ކަމަށާއި، މި ސަރަހައްދުގެ ހަމަޖެހުން ގެއްލުމަކީ އެއްވެސް ޤައުމަކަށް އޮތް ފައިދާއެއް ނޫން ކަމަށްވެސް އޭނާ ވިދާޅުވިއެވެ. އީރާނުގެ އިސްލާމިކް ރިވަލޫޝަނަރީ ގާޑް ކޯޕްސް (އައިއާރުޖީސީ) އިން ބުނި ގޮތުގައި އެމެރިކާގެ ހަމަލާތަކުގައި އީރާނުގެ ސިފައިންނާއި އާންމުންގެ ބަޔަކު މަރުވެ، އަނިޔާވެފައިވެއެވެ.

އައިއާރުޖީސީން ހާމަކުރި ގޮތުގައި، އުރުދުންގައި ހުންނަ އެމެރިކާގެ ކިންގް ހުސައިން އަދި އަލް އަޒްރަޤް އަސްކަރީ މަރުކަޒުތަކަށް މިސައިލާއި ޑްރޯން ބޭނުންކޮށްގެން ވަނީ ވަރުގަދަ ހަމަލާތަކެއް ދީފައެވެ. އީރާނުން ބުނާ ގޮތުގައި މިއީ އދ. ގެ ޗާޓަރުގެ ދަށުން ދިފާއުގައި ދިން ހަމަލާތަކެކެވެ. މީގެ އިތުރުން ޔޫއޭއީގެ އަލް މިންހާދް ވައިގެ މަރުކަޒުގައި ތިބި އެމެރިކާ ސިފައިންނާއި ހެލިކޮޕްޓަރުތަކަށް އަމާޒުކޮށް ގިނަ އަދަދެއްގެ ޑްރޯން ހަމަލާތައް ފޮނުވާލި ކަމަށްވެސް އީރާނުގެ އަސްކަރިއްޔާއިން ބުނެފައިވެއެވެ.

ނަމަވެސް، އުރުދުންގެ އަސްކަރިއްޔާއިން ބުނީ އެ ޤައުމުގެ ވައިގެ ސަރަހައްދަށް ވަން އީރާނުގެ އަށް މިސައިލެއް ދިފާއީ ނިޒާމުތަކުން ވައްޓާލާފައިވާ ކަމަށެވެ. އަދި ޔޫއޭއީގެ ދިފާއީ ވުޒާރާއިން ބުނީ އެ ޤައުމުގެ ކަނޑުގެ ސަރަހައްދުން ދަތުރުކުރި ޑްރޯނަކަށް ވައިގެ ސިފައިން ރައްދުދީފައިވާ ކަމަށާއި، އަސްކަރީ މަރުކަޒަކަށް ހަމަލާ އަމާޒުވި ކަމަށް ބުނާ ވާހަކަ ދޮގުކުރާ ކަމަށެވެ. ޔޫއޭއީގެ ޚާރިޖިއްޔާއިން ވަނީ އީރާނުގެ މި އަމަލު ވަރަށް ބޮޑަށް ކުށްވެރިކޮށްފައެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފައިވަނީ ލާރަކް އައިލެންޑަށް ދިން ހަމަލާއަކީ ހޮރްމޫޒް ކަނޑުއޮޅީގައި މައިން އެޅުމަށް ތައްޔާރުވަމުންދިޔަ އީރާނުގެ ނުރައްކާތެރި ހަރަކާތްތަކަކަށް އަމާޒުކޮށް ދިން ހަމަލާއެއް ކަމަށެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ ޚާރްގް އައިލެންޑަށް ބޮޑެތި ގެއްލުންތަކެއް ލިބެމުންދާ ކަމަށް ސޯޝަލް މީޑިއާގައި ވިދާޅުވެފައެވެ. މީގެ އިތުރުން ހޮރްމޫޒް ކަނޑުއޮޅީގައި އާ މައިންތައް އަޅަން މަސައްކަތްކުރާ ކޮންމެ އުޅަނދެއް ހަލާކުކޮށްލާނެ ކަމުގެ އިންޒާރުވެސް އެމެރިކާއިން ވަނީ ދީފައެވެ.

މި ކުރިމަތިލުންތަކާއެކު ސަރަހައްދީ ހަނގުރާމަ ހުއްޓުވުމަށް ކުރެވެމުންދިޔަ ޑިޕްލޮމެޓިކް މަސައްކަތްތަކަށް ވަނީ ބޮޑެތި ހުރަސްތަކެއް އެޅިފައެވެ. އެމެރިކާ ސަރުކާރުން މިހާރު ވިސްނުން ބަދަލުކުރަމުންދަނީ އަސްކަރީ ފިޔަވަޅުތަކުގެ އިތުރުން "އޮޕަރޭޝަން އިކޮނޮމިކް އައުޓްކާސްޓް" ގެ ނަމުގައި އީރާނާ ދެކޮޅަށް އިޤްތިޞާދީ ދަތިކުރުމުގެ ވަރުގަދަ ފިޔަވަޅުތަކެއް އެޅުމަށެވެ. ނަމަވެސް އީރާނުން ބުނަމުންދަނީ އެމެރިކާގެ އިޤްތިޞާދީ ފިއްތުންތައް ފެއިލްވާނެ ކަމަށެވެ.