ކުޅިވަރު

ކްލަބް ވޯލްޑް ކަޕް: ގިނަ ބައެއްގެ ފާޑު ކިއުން އޮތީ މެސީގެ އިންޓަ މިއާމީއަށް ފުރުސަތު ދިން ގޮތާއިމެދު

ކްލަބް ވޯލްޑް ކަޕް: ގިނަ ބައެއްގެ ފާޑު ކިއުން އޮތީ މެސީގެ އިންޓަ މިއާމީއަށް ފުރުސަތު ދިން ގޮތާއިމެދު

މެސީ (ވ) އާއި ފީފާގެ ރައީސް އިންފެންޓީނޯ (ކ)

މިފްތާޙް މުޙައްމަދު

މިފްތާޙް މުޙައްމަދު

07 ޑިސެމްބަރު 2024، 10:07

07 ޑިސެމްބަރު 2024، 10:07

ހުލާސާ

މުބާރާތް ބާއްވާ ގައުމުގެ ކްލަބަކަށް ދޭން ކަނޑައަޅާފައި އޮތް ޖާގަ އެ ކްލަބަށް ދިން އިރު، އެ ކްލަބަކީ އެންމެ ފަހުގެ ސީޒަނުގެ ޗެމްޕިއަނުންނެއް ނޫން.

މުބާރާތަށް ގެނައި ބަދަލާ ގުޅިގެން ދެން އެންމެ ބޮޑު ފާޑުކިއުމެއް އަމާޒުވެފައިވަނީ، ކުޅުންތެރިންނަށް ލިބޭ ރެސްޓު ކުޑަވުމުން.

މުބާރާތް ކުޅޭ ފޯމެޓަށާއި، ޓީމުތަކުގެ އަދަދަކަށް ބޮޑު ބަދަލުތަކެއް ގެނައުމަށްފަހު ބާއްވާ ފުރަތަމަ ކްލަބް ވޯލްޑްކަޕްގެ ގުރުއަތުނެގުން ބުރާސްފަތި ދުވަހު ބާއްވައިފިއެވެ. މުބާރާތުގެ އައު ފޯމުޓާއި، މުބާރާތުގައި ވާދަކުރުމަށް ކްލަބްތަކަށް ފުރުސަތު ލިބޭ ގޮތް އިއުލާން ކުރުމާއެކު، އެންމެ ގިނަ ބައެއްގެ ފާޑު ކިއުން އަމާޒުވީ، އިންޓަ މިއާމީއަށް ފުރުސަތު ދިން ގޮތާމެދުއެވެ. މީގެ އިތުރުން، މުބާރާތުގައި ހޭދަވާ މުއްދަތުގެ ސަބަބުން، ފުޓުބޯޅަ ސީޒަން ނިމުމަށްފަހު ކުޅުންތެރިން ރެސްޓު ކުރުމަށް ލިބޭ މުއްދަތު ކުޑަވުމުން، އެކަމާ ހިތްހަމަ ނުޖެހިގެން ގިނަ ކުޅުންތެރިން ވަނީ ދުނިޔޭގެ ފުޓުބޯޅައިގެ މައި އިދާރާ، ފީފާއަށް ވަރަށް ބޮޑަށް ފާޑު ކިއުން އަމާޒުކޮށްފައެވެ. 

މުބާރާތުގެ ޖާގަތައް ދިންގޮތަށް ބަލައި، އާންމުންގެ ފާޑުކިއުން އެންމެ ބޮޑަށް އަމާޒުވީ އިންޓަ މިއާމީއަށް ފުރުސަތު ދިން ގޮތުންނެވެ. މުބާރާތް ބާއްވާ ގައުމުގެ ކްލަބަކަށް ދޭން ކަނޑައަޅާފައި އޮތް ޖާގަ އެ ކްލަބަށް ދިން އިރު، އެ ކްލަބަކީ އެންމެ ފަހުގެ ސީޒަނުގެ ޗެމްޕިއަނުންނެއް ނޫނެވެ. ދުނިޔޭގެ ތަރި، ލިއޮނެލް މެސީ ކުޅެމުން އަންނަ އިންޓަމިއާއި އެންމެ ފަހުގެ ސީޒަނުގެ އެމްއެލްއެސް ސަޕޯޓަރސް ޝީލްޑް ކާމިޔަބުކުރެވުނު ނަމަވެސް، އެމްއެލްއެސް ޕްލޭ-އޮފް އެ ކްލަބަށް ކާމިޔާބު ކުރެވިފައެއް ނުވެއެވެ. 

މުބާރާތަށް ގެނައި ބަދަލާ ގުޅިގެން ދެން އެންމެ ބޮޑު ފާޑުކިއުމެއް އަމާޒުވެފައިވަނީ، ކުޅުންތެރިންނަށް ލިބޭ ރެސްޓު ކުޑަވުމުންނެވެ. މުބާރާތުގައި ގާތްގަނޑަކަށް އެއް މަސް ދުވަސް ހޭދަވާއިރު، މުބާރާތް ފަށަނީ ޗެމްޕިއަންސް ލީގުގެ ފައިނަލް ކުޅޭތާ ދެ ހަފްތާ ފަހުންނެވެ. އަދި މުބާރާތް ނިމޭތާ ފަސް ހަފްތާ ފަހުން އިންގްލިޝް ޕްރިމިއަރ ލީގު ފަށާނެއެވެ. މުބާރާތް ބޭއްވުމަށް ހަމަޖެހިފައިވަނީ ޖޫން 15 އިން ޖުލައި 13 އަށެވެ.

މި މައްސަލައާ ގުޅިގެން، ކުޅުންތެރިންގެ ޔޫނިއަނުންނާއި ލީގުތަކުން ވަނީ ފީފާއާ ދެކޮޅަށް، ޔޫރަޕިއަން ކޯޓް އޮފް ޖަސްޓިސްގައި ދައުވާ ވެސް ކޮށްފައެވެ. ކުޅުންތެރިންނާއި ލީގުތަކުން ބުނަމުން ދިޔައީ، ފީފާއިން މިފަދަ ބޮޑު ބަދަލެއް ގެނައީ ކަމާ ގުޅުންހުރި ފަރާތްތަކާ މަޝްވަރާ ނުކޮށް ކަމަށެވެ.

މުބާރާތުގެ ގުރުއަތުނެގުން ބުރާސްފަތި ދުވަހު ބޭއްވިއިރު، މުބާރާތް ކުޅޭ ފޯމެޓަށް ގެނައި އެންމެ ބޮޑު އެއް ބަދަލަކީ، ކުރިން ކޮންމެ އަހަރަކު ބާއްވަމުން ދިޔަ ކްލަބް ވޯލްޑް ކަޕް، ކޮންމެ ހަތަރު އަހަރުން އެއް ފަހަރު ކުޅޭ މުބާރާތެއްގެ ގޮތަށް ބަދަލު ކުރުމެވެ. މީގެ އިތުރުން، މި މުބާރާތް ކުރިން ކުޅެމުން އައީ 7 ޓީމާއެކުއެވެ. ނަމަވެސް ދެން މި މުބާރާތުގައި 6 ބައްރުގެ 32 ޓީމު ވާކުރާނެއެވެ. އަދި އެންމެ ގިނަ އަދަދެއްގެ ކޯޓާ ދީފައިވަނީ ޔޫރަޕަށެވެ. އެގޮތުން ޔޫރަޕުގެ 12 ކްލަބެއް މުބާރާތުން ފެނިގެން ދާނެއެވެ.

ޔޫރަޕްގެ ކްލަބުތަކަށް މުބާރާތުން ޖާގަ ދިނުމުގައި ބަލާފައިވަނީ ފާއިތުވި 4 އަހަރު ޗެމްޕިއަންސް ލީގުގައި ޓީމުތައް ހޯދާފައިވާ ކާމިޔާބީއަށެވެ. އެގޮތުން، ޗެލްސީ، މެންޗެސްޓަރ ސިޓީ އަދި ރެއާލް މެޑްރިޑަށް ޖާގަ ދީފައިވަނީ އެންމެ ފަހުން މުބާރާތް ކާމިޔާބުކުރި ޓީމުތަކުގެ ގޮތުގައެވެ. 

މި ލިޔުން ކިޔާލުމުން

Ads by MSS