ނޭޕާލާއި ޗައިނާއަށް ކުރިމަތިވި ފެންބޮޑުވުމުގެ ހާދިސާގައި މަރުވި މީހުންގެ އަދަދު 1،000 އިން މައްޗަށް އަރައިފި

ނޭޕާލާއި ޗައިނާގެ ބައެއް ސަރަހައްދުތަކަށް ކުރިމަތިވި ފެންބޮޑުވުމުގެ ހާދިސާތަކުގައި މަރުވި މީހުންގެ ޖުމްލަ އަދަދު 1،019 އަށް އަރައިފިއެވެ. އަދި ގުޅުން ކެނޑިފައިވާ ސަރަހައްދުތަކުގައި ތިބި މީހުން ސަލާމަތްކުރުމުގެ މަސައްކަތް ރެސްކިއު ޓީމުތަކުން ކުރަމުންދާއިރު، 4،400 އަށް ވުރެ ގިނަ މީހުން ވީނުވީއެއް ނޭނގި ވަނީ ގެއްލިފައެވެ.

ނޭޕާލުގެ ނޭޝަނަލް ޑިޒާސްޓާ ރިސްކް ރިޑަކްޝަން އެންޑް މެނޭޖްމަންޓް އޮތޯރިޓީ (އެންޑީއާރުއާރުއެމްއޭ) އިން އަންގާރަ ދުވަހު ހާމަކުރި އެންމެ ފަހުގެ މައުލޫމާތުގައިވާ ގޮތުން، އެ ގައުމުން އެކަނިވެސް މަރުވި މީހުންގެ އަދަދު ވަނީ 1،003 އަށް އަރާފައެވެ. މީގެ އިތުރުން 583 ބޭރު މީހުން ހިމެނޭހެން 3،916 މީހުން ގެއްލިފައިވާ ކަމަށް ވަނީ ރިޕޯޓްކޮށްފައެވެ. އަނެއްކޮޅުން ޗައިނާގެ އޮފިޝަލުން އާދީއްތަ ދުވަހު ހާމަކުރި ގޮތުގައި، އެ ގައުމުން 16 މީހަކު މަރުވެފައިވާއިރު، 261 ބޭރު މީހުން ހިމެނޭ ގޮތަށް 546 މީހުން އަދިވެސް ވަނީ ގެއްލިފައެވެ.

މި ކާރިސާ ހިނގަން މެދުވެރިވީ އޮގަސްޓް މަހުގެ 26 ވަނަ ދުވަހު ހިމާލިޔާގެ ފަރުބަދަމަތީގެ ގްލޭޝިއާއެއް ވެއްޓި، ގިނަ އަދަދެއްގެ ހިލަ އާއި ގަނޑުފެން އަދި ފެން ތިރީގައިވާ ވާދީތަކަށް ފައިބައިގެން ދިއުމާ ގުޅިގެންނެވެ. ސެޓެލައިޓް ފޮޓޯތައް ދިރާސާކުރި ސައިންސްވެރިން ބުނާ ގޮތުގައި، މި ހާދިސާ ހިނގާފައިވަނީ ގްލޭޝިއާގެ ދަށުގައިވާ ބެޑްރޮކް ފޭލްވުމުގެ ސަބަބުންނެވެ.

ފެންބޮޑުވުމުގެ ސަބަބުން ނޭޕާލްގެ ހައިޑްރޯޕަވަރ ސްޓޭޝަންތަކަށް ބޮޑެތި ގެއްލުންތަކެއް ލިބި، އެ ތަންތަނުގެ ޓަނަލްތަކުގައި އެތައް ސަތޭކަ މަސައްކަތްތެރިންނެއް ވަނީ ތާށިވެފައެވެ. މިހާތަނަށް ހައިޑްރޯޕަވަރ ޕްރޮޖެކްޓްތަކުން 279 މަސައްކަތްތެރިން ސަލާމަތްކޮށްފައިވާ ކަމަށާއި، އަދި މުޅި ސަރަހައްދުން 11،000 އަށް ވުރެ ގިނަ މީހުން ސަލާމަތްކޮށްފައިވާ ކަމަށް ބޮޑުވަޒީރު ބަލެންދްރަ ޝާހް ވިދާޅުވިއެވެ. މީގެ އިތުރުން ބައެއް ސަރަހައްދުތަކަށް ކަރަންޓާއި މުވާސަލާތީ ޚިދުމަތްތައް އަލުން ވަނީ ދީފައެވެ.

"އެތައް ގިނަ ރައްޔިތުންގެ ގެދޮރާއި، އާއިލާތަކާއި، ލޯބިވާ މީހުން އަދި މުދާ ވަނީ ގެއްލިފައި،" ބޮޑުވަޒީރު ޝާހް ސޯޝަލް މީޑިއާގައި ވިދާޅުވިއެވެ. އަދި ސަރުކާރުން މި ހިތާމައިގައި ރައްޔިތުންނަށް އެހީތެރިވެ، އަލުން އާންމު ހާލަތަށް ރުޖޫޢަވުމަށް ކުރެވެން ހުރި ހުރިހާ ކަމެއް ކުރާނެ ކަމުގެ ޔަގީންކަން އެ މަނިކުފާނު ދެއްވިއެވެ.

އެންމެ ބޮޑަށް ގެއްލުންވި އެއް ޑިސްޓްރިކްޓް ކަމަށްވާ ނުވަކޮޓްގެ މަގުތައް މިހާރު ވަނީ އަލުން ގުޅާލެވިފައެވެ. ފުލުހުންގެ އޮފިޝަލް ބިޕިން ރެގްމީ ވިދާޅުވި ގޮތުގައި އެ ޑިސްޓްރިކްޓްގެ ބެތުރާބަތީ އަވަށުގެ ގެއަކުން އެކަނިވެސް 24 މީހެއްގެ ހަށިގަނޑު ވަނީ ފެނިފައެވެ. މި ކާރިސާއާ ގުޅިގެން މިހާތަނަށް 42 މިލިއަން ޑޮލަރަށް ވުރެ ގިނަ އެހީ ނޭޕާލަށް ލިބިފައިވާއިރު، އަވަށްޓެރި އިންޑިއާ އަދި ޗައިނާއިން ދަނީ ބެއިލީ ބްރިޖް އެޅުން ފަދަ ސަލާމަތީ އެހީތެރިކަން ފޯރުކޮށްދެމުންނެވެ.