އެމެރިކާގައި ޓިކްޓޮކް މަނާކުރަން ނިންމި ނިންމުން ދެމެހެއްޓުމަށް ކޯޓުން ނިންމައިފި

އެމެރިކާގައި ޓިކްޓޮކް މަނާކުރަން  ނިންމި ނިންމުން ބާތިލްކުރުމަށް އެ ކުންފުނިން ކުރި މަސައްކަތް ނާކާމިޔާބުވެއްޖެއެވެ. މިކަން މިހެން ވެގެން ދިޔައީ އެމެރިކާގެ ފެޑެރަލް އެޕީލްސް ކޯޓުން އެ ގާނޫނު ދެމެހެއްޓުމަށް ނިންމުމާ ގުޅިގެންނެވެ.

ޓިކްޓޮކުން ބުނެފައިވަނީ މި ގާނޫނަކީ އެމެރިކާގެ 170 މިލިއަން ބޭނުންކުރާ ފަރާތްތަކުގެ ޚިޔާލު ފާޅުކުރުމުގެ މިނިވަންކަމަށް "ބޮޑު" އަސަރެއް ކުރާނެ ކަމެއް ކަމަށާއި، އެހެންކަމުން މިއީ ޤާނޫނު އަސާސީއާ ޚިލާފު ކަމެއް ކަމަށެވެ. ނަމަވެސް ކޯޓުން ބުނެފައިވަނީ މި ގާނޫނަކީ "ކޮންގްރެސްގެ ދެ ޕާޓީގެ ފަރާތުންނާއި، ވަކިވަކި ރައީސުންގެ ފަރާތުން ކުރެވުނު ފުޅާ މަސައްކަތެއްގެ ނަތީޖާއެއް" ކަމަށެވެ.

ޓިކްޓޮކުން މިހާރު ބުނެފައިވަނީ އެމެރިކާގެ އެންމެ މަތީ ކޯޓު ކަމަށްވާ ސުޕްރީމް ކޯޓަށް މި މައްސަލަ ހުށަހަޅާނެ ކަމަށެވެ. އެމެރިކާއިން ބޭނުންވަނީ ޓިކްޓޮކް ވިއްކާލުން ނުވަތަ ބަންދުކުރުމެވެ. އެއީ އެ ކުންފުނީގެ ވެރިންނާއި ޗައިނާގެ ސަރުކާރާ ދެމެދު ގުޅުމެއް އޮތް ކަމަށް ބުނެއެވެ. ނަމަވެސް ޓިކްޓޮކާއި އޭގެ މައި ކުންފުނި ކަމަށްވާ ބައިޓްޑާންސްއިން މިކަން އަބަދުވެސް ދަނީ ދޮގުކުރަމުންނެވެ.

ކޯޓުން ބުނެފައިވަނީ މި ގާނޫނަކީ "ހަމައެކަނި ބޭރުގެ އަދާވާތްތެރި ފަރާތެއްގެ ކޮންޓްރޯލް އޮތުމާ ގުޅޭގޮތުން ފަރުވާތެރިކަމާއެކު އެކުލަވާލެވިފައިވާ" އެއްޗެއް ކަމަށާއި، މިއީ "ޗައިނާގެ ފަރާތުން ކުރިމަތިވެފައިވާ ޤައުމީ ސަލާމަތަށް ނުރައްކަލަކާ ކުރިމަތިލުމަށް ކުރެވޭ ފުޅާ މަސައްކަތުގެ ބައެއް" ކަމަށެވެ.

ނަމަވެސް ޓިކްޓޮކުން ބުނެފައިވަނީ މިއީ އެ ކުންފުނީގެ ޤާނޫނީ މަސައްކަތުގެ ނިމުމެއް ނޫން ކަމަށެވެ. އަދި މި ގާނޫނު ބިނާވެފައިވަނީ "ނުބައި، އޮޅުވާލައިފައިވާ އަދި ހީކުރެވޭ މައުލޫމާތުގެ" މައްޗަށް ކަމަށާއި، ޓިކްޓޮކް މަނާކުރުމަކީ އެމެރިކާގެ ރައްޔިތުންގެ ޚިޔާލު ފާޅުކުރުމުގެ މިނިވަންކަން ހަނިކުރުން ކަމަށް އެ ކުންފުނިން ބުނެފައިވެއެވެ.

2024 ވަނަ އަހަރުގެ އެމެރިކާގެ ރިޔާސީ އިންތިޚާބުގައި ޑޮނަލްޑް ޓްރަމްޕް ކާމިޔާބުކުރުމަކީ ޓިކްޓޮކަށް އިތުރު ފުރުސަތެއް ލިބިގެންދާނެ ކަމެއް ކަމަށް ވެސް ބެލެވެއެވެ. އޭނާގެ ފުރަތަމަ ދައުރުގައި ޓިކްޓޮކް ބަންދުކުރަން މަސައްކަތްކުރި ނަމަވެސް، ނޮވެންބަރު މަހުގެ އިންތިޚާބުގެ ކުރިން އޭނާ ވަނީ ޓިކްޓޮކް މަނާކުރުމުގެ ގާނޫނު ތަންފީޒުކުރުމަށް ހުއްދަ ނުދޭނެ ކަމަށް ބުނެފައެވެ. ޓްރަމްޕް ރައީސްކަމުގެ ހުވާކުރާނީ ޖެނުއަރީ 20 ގައެވެ. އެއީ ޓިކްޓޮކް މަނާކުރުމަށް  ގާނޫނުގައި ބުނާ ދުވަހުގެ ފަހު ދުވަހެވެ.

ނަމަވެސް، އިންތިޚާބުގެ ކުރިން އޭނާ ދިން ވައުދު ފުއްދާނެކަމެއް އަދި ނޭނގެއެވެ. ކޯނެލް ޔުނިވަރސިޓީގެ ޕްރޮފެސަރ ޖޭމްސް ގްރިމެލްމަން ބުނެފައިވަނީ ޓިކްޓޮކަށް ލުޔެއް ދިނުމަށް ރައީސް އިންތިޚާބުވި ފަރާތަށް "ވަރަށް އުނދަގޫވާނެ" ކަމަށެވެ. "އެމެރިކާގެ ކޮންގްރެސްގައި ޗައިނާއާ ދެކޮޅު ވިސްނުން ވަރަށް ވަރުގަދައެވެ. އެހެންކަމުން މިހާރު ދެ ޕާޓީގައި ވެސް ޓިކްޓޮކް އެމެރިކާގެ މާކެޓުން ބޭރުކުރަން ބޭނުންވާ ބައެއް އެބަތިބި،" އޭނާ ބީބީސީ ނިއުސްއަށް ބުނެފައިވެއެވެ.

މި ކޯޓު މައްސަލަ ވަނީ ޓިކްޓޮކް ބޭނުންކުރާ ފަރާތްތަކާއި އެ އެޕްގެ ވާދަވެރިން ވެސް ގާތުން ބަލަމުން ގެންގޮސްފައެވެ. ކުދި ވިޔަފާރިތަކަށް އެހީތެރިވާ އަދި ޓިކްޓޮކް ކޮންޓެންޓް ކްރިއޭޓަރެއް ކަމަށްވާ ޓިފަނީ ސިއާންސީ ބުނެފައިވަނީ ހުކުރު ދުވަހުގެ ނިންމުމުން އޭނާ "ހައިރާންވެފައި" ނުވާ ކަމަށެވެ. ނަމަވެސް އޭނާ އޭނާގެ ޓިކްޓޮކް ކޮންޓެންޓް އިންސްޓަގްރާމް ފަދަ އެހެން ޕްލެޓްފޯމްތަކަށް ނުގެންދާނެ ކަމަށް ބީބީސީ ނިއުސްއަށް ބުނެފައިވެއެވެ.

"އެމީހުން ބޭނުންވާ ގޮތަށް އަހަރެންގެ ކޮންޓެންޓް އެހެން ޕްލެޓްފޯމްތަކަށް ނުގެންދާނަން. އެތަންތަނުގައި ކާމިޔާބު ނުވާނެ، އަދި ސެންސަރ ކުރުމުގެ ފުރުސަތު ބޮޑު، އަދި އޮޑިއެންސްގެ މައްޗަށް ކޮންޓްރޯލް ގެއްލޭ ތަންތަނަށް ނުގެންދާނަން،" އޭނާ ބުނެފައިވެއެވެ.

ނަމަވެސް، އެހެން ޕްލެޓްފޯމްތަކުން ޓިކްޓޮކް ނެތް ސޯޝަލް މީޑިއާ މާހައުލަކަށް ތައްޔާރުވަމުން އެބަދެއެވެ. ފޭސްބުކް، އިންސްޓަގްރާމް، ވަޓްސްއެޕް އަދި ތްރެޑްސް ހިންގާ މެޓާއިން ވަނީ އެމީހުންގެ އެޕްތަކުގައި ޓިކްޓޮކްގެ ކުރު ވީޑިއޯތަކާ ވާދަކުރާނެ އެއްޗެހި ތައާރަފުކޮށްފައެވެ. އަދި ޓިކްޓޮކްގެ މުސްތަގުބަލާމެދު ސުވާލު އުފެދެމުންދާއިރު، ބައެއް ބަދަލުތައް ގެނެސްފައިވާ ކަމަށް ބޭނުންކުރާ ފަރާތްތަކުން ބުނެއެވެ.