ޕީސީއޯއެސްއަށް ގުޅޭ ފޭކު ފަރުވާ ވިއްކާ އިންފްލުއެންސަރުންގެ ސަބަބުން އަންހެނުން ގެއްލުމުގެ ތެރެއަށް

ޕޮލިސިސްޓިކް އޯވަރީ ސިންޑްރޯމް (ޕީސީއޯއެސް) އަކީ ކޮންމެ 10 އަންހެނުންގެ ތެރެއިން އެކަކަށް ޖެހޭ ހޯމޯނުތަކާ ގުޅުންހުރި ބައްޔެކެވެ. މި ބަލީގެ ސަބަބުން ގިނަ އަންހެނުންނަށް ވޭން ، ބަރުދަން އިތުރުވުން، ބިހިނެގުން އަދި ވަރުބަލިކަން ކުރިމަތިވެއެވެ. ނަމަވެސް މި ބައްޔަށް ފަސޭހައިން ފަރުވާއެއް ނުލިބޭތީ، ގިނަ އަންހެނުން އެހީ ހޯދަން އުޅެނީ ޞިއްޙީ ދާއިރާއިން ބޭރުންނެވެ.

12 އަހަރު ވަންދެން ޕީސީއޯއެސްގެ އަލާމާތްތަކާ ކުރިމަތިލާންޖެހުނު ސޯފީ ކިޔާ އަންހެނަކު ބުނީ އޭނާއަށް ފަރުވާ ހޯދަން އުނދަގޫވެފައިވާތީ، އިންސްޓަގްރާމްގައި ފެނުނު ކޯޓްނީ ސިމަންގް ނަމަކަށް ކިޔާ އިންފްލުއެންސަރެއްގެ އެހީ ހޯދިކަމަށެވެ. ނަމަވެސް 3،600 ޑޮލަރު ޚަރަދުކޮށްގެން ކޯޓްނީގެ "ފަރުވާ" ހޯދުމަށްފަހު ވެސް ސޯފީގެ ޙާލަތު ރަނގަޅުނުވިއެވެ.

ނަފްސާނީ ޑޮކްޓަރެއް ކަމުގައިވާ ޑރ. ޖެން ގަންޓަރ ވިދާޅުވީ ކޯޓްނީ ފަދަ އިންފްލުއެންސަރުންނަކީ މެޑިކަލް ޓެސްޓުތައް އޯޑަރުކުރުމުގެ ޤާބިލުކަން ހުރި ބައެއް ނޫން ކަމަށެވެ. އަދި އެފަދަ ޓެސްޓުތަކުގެ ކްލިނިކަލް ބޭނުން ވަރަށް މަދު ކަމަށެވެ.

ޕީސީއޯއެސްއަށް ފަސޭހައިން ފަރުވާއެއް ނެތުމުގެ ސަބަބުން، ގިނަ އިންފްލުއެންސަރުން މި ބައްޔަށް ފޭކު ފަރުވާތައް ވިއްކަމުންދާކަން ބީބީސީ ވޯލްޑް ސަރވިސްގެ ތަޙްޤީޤަކުން ހާމަވެފައިވެއެވެ. ޓިކްޓޮކް އަދި އިންސްޓަގްރާމްގައި "ޕީސީއޯއެސް" ހޭޝްޓެގް ބޭނުންކޮށްގެން އެންމެ ގިނައިން ބަލާފައިވާ ވީޑިއޯތަކުގެ ދެބައިކުޅައެއްބައިގައި ދޮގު މަޢުލޫމާތު ހިމެނޭކަން ފާހަގަކުރެވިފައިވެއެވެ.

ޕީސީއޯއެސްއަށް ފަރުވާ ހޯދަން އުޅޭ އަންހެނުންނަށް ޑރ. ގަންޓަރ ލަފާދެއްވަނީ އިތުބާރުހުރި ޞިއްޙީ ފަރުވާދޭ ފަރާތްތަކުގެ އެހީ ހޯދުމަށެވެ. އަދި އިންޓަރނެޓުގައި ފެންނަ ހުރިހާ މަޢުލޫމާތަކަށް އިތުބާރުނުކުރުމަށެވެ.