ފިޒިއޮތެރަޕީގެ ދާއިރާއިން ފޯރުކޮށްދެވޭ ތަޢުލީމު ފުޅާކުރުމަށް އެއްބަސްވުމެއްގައި ސޮއިކޮށްފި

ދިވެހިރާއްޖޭގެ ފިޒިއޮތެރަޕީގެ ދާއިރާ ކުރިއަރުވައި، ފެންވަރު ރަނގަޅު ތަޢުލީމާއި ދެމެހެއްޓެނިވި ގުޅުންތައް ޤާއިމުކުރުމުގެ ގޮތުން، ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ)އިން މޯލްޑިވްސް ފިޒިއޮތެރަޕީ އެސޯސިއޭޝަނާ އެކު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ދެފަރާތުން ސޮއިކޮށްފައި ވަނީ، ބައިނަލްއަޤްވާމީ ފިޒިއޮތެރަޕީ ދުވަހާއި ގުޅުވައިގެން ބޭއްވި ރަސްމިއްޔާތެއްގައެވެ.

މި އެއްބަސްވުމަކީ، ރާއްޖޭގައި ފިޒިއޮތެރަޕީ އަދި ޞިއްޙީ ޚިދުމަތްތައް އިތުރަށް ހަރުދަނާކޮށް ކުރިއެރުވުމަށް އެޅުނު މުހިންމު ފިޔަވަޅެއް ކަމަށް އެމްއެންޔޫއިން ވިދާޅުވެއެވެ. 

މިއީ ދިވެހިރާއްޖޭގައި އުމުރުން ދުވަސްވީ މީހުން ގިނަވަމުންދިއުމާއި ދާއިމީ ބަލިތައް ތަޙައްމަލުކުރާ މީހުންގެ އަދަދު އިތުރުވަމުންދާތީ، ޞިއްޙީ ދާއިރާގައި ފިޒިއޮތެރަޕީ އާއި ރިހެބިލިޓޭޝަން ޚިދުމަތްތަކުގެ ބޭނުންތެރިކަން ވަރަށް ބޮޑަށް އިތުރުވެފައިވާ ދަނޑިވަޅެއްގައި ވެވުނު އެއްބަސްވުމެއްކަން އެމްއެންޔޫއިން ފާހަގަކުރައްވައެވެ.

The Maldives National University (MNU) and the Maldivian Physiotherapy Association have signed an MoU, strengthening collaboration in physiotherapy education, professional development, and knowledge exchange.

This partnership marks an important step towards advancing… pic.twitter.com/hMLOaxUaTT

— The Maldives National University (@MNUedu) September 8, 2026

ހަމައެއާއެކު، ފިޒިއޮތެރަޕީއަކީ ހަމައެކަނި ބަލިމީހުންގެ ހާލަތު ރަނގަޅުކުރުމަށް ދެވޭ ފަރުވާއެއް ނޫންކަމަށާއި، ބަލިތަކުން ދުރުހެލިވުމަށާއި، ޖިސްމާނީ ދުޅަހެޔޮކަމާއި ހަރަކާތްތެރިކަން ދިގު މުއްދަތަކަށް ދެމެހެއްޓުމަށްޓަކައި ލާޒިމު ޚިދުމަތެއްކަން ވެސް އެމްއެންޔޫއިން ވަނީ ފާހަގަކުރައްވާފައެވެ.

މި އެއްބަސްވުމުގެ ޒަރީޢާއިން އެމްއެންޔޫ އަދި ފިޒިއޮތެރަޕީ އެސޯސިއޭޝަން އެކުގައި މަސައްކަތްކޮށް، ބައިނަލްއަޤްވާމީ ފެންވަރުގެ ތަޢުލީމާއި ތަމްރީނު ރާއްޖޭގައި ފޯރުކޮށްދީ، މި ދާއިރާއިން ފަންނީ އަދި ޤާބިލު ދިވެހި ޒުވާނުން އުފެއްދުމަށް މަގުފަހިވެގެންދާނެއެވެ.

މީގެ އިތުރުން މި ދާއިރާއިން އިލްމާއި ހުނަރު ބަދަލުކުރުމާއި ދިރާސާތައް ހިންގުމުގެ އިތުރުން، ރާއްޖޭގެ އެކި ކަންކޮޅުތަކަށް މި ޚިދުމަތް ފުޅާކުރުމަށް އެއްބާރުލުން ދެވޭނެކަމަށް އެމްއެންޔޫއިން ހާމަކުރެއެވެ. މިކަމުގެ ސަބަބުން، ރަށްރަށުގައި ދިރިއުޅޭ ފަރާތްތަކަށް ރިހެބިލިޓޭޝަންގެ ޚިދުމަތްތައް ހޯދުމަށް ދިމާވާ ދަތިތަކަށް ބޮޑު ހައްލެއް ލިބި، ރާއްޖޭގެ ޞިއްޙީ ނިޒާމު ލާމަރުކަޒީ އުސޫލުން ވަރުގަދަކުރުމަށް ބާރަކަށް ވެގެންދާނެކަމަށް އެ ޔުނިވަރސިޓީން ފާހަގަކުރެއެވެ.