ޣައްޒާގެ މައްސަލައިގައި ފަރަންސޭސިވިލާތުން ދުނިޔެއަށް ވަރުގަދަ ފާޑުކިޔުމެއް އަމާޒުކޮށްފި

ޣައްޒާގެ މައްސަލައިގައި ބައިނަލްއަގުވާމީ މުޖުތަމައުން ފިޔަވަޅު އެޅުމުގައި ފެއިލްވެފައިވާ ކަމަށް ވިދާޅުވެ، އދ. ގެ އާންމު މަޖިލީހުގައި ފަރަންސޭސިވިލާތުގެ ރައީސް އެމަނުއެލް މެކްރޮން ދުނިޔޭގެ ގައުމުތަކަށް ވަރަށް ބޮޑަށް ފާޑުވިދާޅުވެއްޖެއެވެ.

އދ. ގެ އާންމު މަޖިލީހުގެ ޖަލްސާގައި ވާހަކަފުޅު ދައްކަވަމުން ރައީސް މެކްރޮން ވިދާޅުވީ، އިސްރާއީލުގެ ނިރުބަވެރިން ޣައްޒާއަށް އިންސާނީ އެހީ ވެއްދުމަށް އަޅަމުންދާ ހުރަސްތަކާ ދެކޮޅަށް ފިޔަވަޅު އެޅުމުގައި ދުނިޔެ ނުކުޅެދިފައިވާ ކަމަށާއި، މިއީ މުޅި ބައިނަލްއަގުވާމީ މުޖުތަމައަށް ވެސް ލިބުނު ވަރަށް ބޮޑު ލަދުވެތިކަމެއް ކަމަށެވެ. އަދި ޣައްޒާގެ މި ނާޒުކު ހާލަތާ މެދު އަމަލީ އެއްވެސް ފިޔަވަޅެއް ނާޅައި ގައުމުތަކުން ހަނު ތިބޭނަމަ، ބައިނަލްއަގުވާމީ މުޖުތަމައުގެ އިތުބާރާމެދު ސުވާލު އުފެދޭނެ ކަމަށް ވެސް އޭނާ ފާހަގަކުރެއްވިއެވެ.

"ބައެއް ފަރާތްތަކުން ސުލްހައެއް އޮތް ކަމަށް ދައުވާކުރި ނަމަވެސް، އެ ސުލްހައިގެ ސަބަބުން އިންސާނީ އެހީ ފޯރުކޮށްދިނުމުގެ މަގު އެންމެ ސިކުންތަކަށް ވެސް ހުޅުވިފައެއް ނުވޭ،"

މެކްރޮން ވިދާޅުވިއެވެ.

މީގެއިތުރުން ހުޅަނގު އައްސޭރީގައި ފަލަސްތީނުގެ ރައްޔިތުންނާ ދެކޮޅަށް އިސްރާއީލުގެ ނިރުބަވެރިން ހިންގަމުންދާ ލާއިންސާނީ އުދުވާނުތައް ވެސް މެކްރޮން ވަނީ ހަރުކަށި އިބާރާތުން ކުށްވެރިކުރައްވާފައެވެ.

މި ޖަލްސާގެ ތެރެއިން ފަރަންސޭސިވިލާތް، ކެނެޑާ އަދި އިނގިރޭސިވިލާތުން ވަނީ ފަލަސްތީނުގެ މިނިވަން މުސްތަގިއްލު ދައުލަތެއް ގާއިމުކުރުމަށް ރަސްމީކޮށް ގޮވާލާފައެވެ.

މިނިވަން ފަލަސްތީނެއް ގާއިމުކުރުމާ ގުޅޭގޮތުން ބޭއްވި ހާއްސަ ބައްދަލުވުމެއްގައި ވާހަކަދައްކަވަމުން އިނގިރޭސި ބޮޑުވަޒީރު އެންޑީ ބާންހަމް ވިދާޅުވީ، ދެ ދައުލަތުގެ ހައްލު ހޯދައިނުދެވިއްޖެނަމަ ސިޔާސީ ލީޑަރުންނަށް ރައްޔިތުން ކުރާ އިތުބާރު މުޅިން ގެއްލިގެންދާނެ ކަމަށެވެ. އަދި ހުޅަނގު އައްސޭރީގައި އިސްރާއީލުން ގަވާއިދާ ހިލާފަށް ބިނާކޮށްފައިވާ ޔަހޫދީ އާބާދީތަކާ އެކު ކުރާ އެންމެހައި ވިޔަފާރީގެ މުއާމަލާތްތައް އިނގިރޭސިވިލާތުން މިހާރު މަނާކޮށްފައިވާ ކަމަށް ވެސް ބޮޑުވަޒީރު ހާމަކުރެއްވިއެވެ.

ހަމައެއާއެކު، ކެނެޑާގެ ބޮޑުވަޒީރު މައިކް ކާނީ ވަނީ ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން 100 މިލިއަން ކެނެޑިއަން ޑޮލަރު (71 މިލިއަން ޔޫއެސް ޑޮލަރު) ގެ އެހީގެ ޕެކޭޖެއް އިއުލާނު ކުރައްވާފައެވެ. މި އެހީގެ 80 އިންސައްތަ ސީދާ އިންސާނީ އެހީގެ ކަންކަމަށް ހާއްސަކުރެވިފައިވާއިރު، ބާކީ 20 އިންސައްތަ ހޭދަކުރުމަށް ހަމަޖެހިފައިވަނީ ސުލްހައާއި ސަލާމަތީ ކަންކަމަށެވެ. މީގެއިތުރުން އިސްރާއީލުން ޣައިރުގާނޫނީ ގޮތުގައި ހިފާފައިވާ ސަރަހައްދުތަކުގައި ހަދާފައިވާ އާބާދީތަކުން އުފައްދާ އެއްވެސް މުދަލެއް ކެނެޑާއަށް އެތެރެކުރުން ހުއްޓުވުމަށް ހަރުދަނާ ފިޔަވަޅުތަކެއް އަޅުއްވާނެ ކަމަށް ވެސް ކާނީ ވިދާޅުވިއެވެ.

ބައިނަލްއަގުވާމީ މައިދާނުގައި މި ގައުމުތަކުން އިސްރާއީލާ ދެކޮޅަށް ފިޔަވަޅު އަޅައި، ފަލަސްތީނުގެ ހައްގުގައި އަޑުއުފުލަން ފަށާފައި މިވަނީ ޣައްޒާގެ ހާލަތު އިންތިހާއަށް ގޯސްވެ، އިންސާނީ ކާރިސާއެއްގެ ތެރެއަށް ޣައްޒާ ވެއްޓިފައިވާ ދަނޑިވަޅެއްގައެވެ.