ހިތް ނުތަނަވަސް ކަމުގައި އުޅޭ ފިރިހެނުން ގަޔާ ވަނީ ސައިޒުން ބޮޑެތި އަންހެނުންނާ - ދިރާސާ

އާންމު ވިސްނުމުގައި ފިރިހެނުން އެންމެ ބޮޑަށް ޝައުގުވެރިވަނީ ހިކިކޮށް، ހިމަތޮޅިކޮށް ތިބޭ އަންހެނުންނަށް ކަމަށް ބެލެވުނު ނަމަވެސް، ފަހުގެ އިލްމީ ދިރާސާއަކުން މިވަނީ އެ ވިސްނުން ބަދަލުކޮށްލާފައެވެ. ދިރާސާތަކުން ދައްކާ ގޮތުގައި، ހިތްނުތަނަވަސްކަމާއި ސްޓްރެސްގެ ހާލަތްތަކުގައި ފިރިހެނުން އެންމެ ބޮޑަށް ގަޔާވަނީ ހަށިގަނޑުގެ ސައިޒުން ބޮޑެތި އަދި ބަރުދަން ހުންނަ އަންހެނުންނާއެވެ.

ލަންޑަންގެ ޔުނިވަރސިޓީ އޮފް ވެސްޓްމިންސްޓަރގެ ދިރާސާވެރިން ކުރިއަށް ގެންދިޔަ މި ދިރާސާގައި، 41 ފިރިހެނަކަށް ހިތްނުތަނަވަސްވާ ނުވަތަ ސްޓްރެސް ކުރިމަތިކުރުވި މަސައްކަތްތަކެއް ދިނުމަށްފަހު، އެކި ސައިޒުގެ އަންހެން ހަށިގަނޑުތައް ހިމެނޭ ފޮޓޯތަކެއް ދައްކައި އެ މީހުން އެންމެ ގަޔާވާ ސިފަތައް ވަޒަންކުރަން އެންގުނެވެ. މި ތަހުލީލުގެ ނަތީޖާ، އެއްވެސް ސްޓްރެސްއެއް ނެތް އާދައިގެ ހާލަތުގައި ތިބި 40 ފިރިހެނުންގެ ނަތީޖާއާ އަޅާކިޔުމުން ފެނުނީ ހައިރާންކުރުވަނިވި ތަފާތެކެވެ. ސްޓްރެސްގައި ތިބި ފިރިހެނުން އެންމެ ރީތި ކަމަށް ނިންމާފައިވަނީ ހަށިގަނޑު ބޮޑެތި، ބަރު އަންހެނުންނެވެ. އަދި އާންމުކޮށް އެކި ބައްޓަމުގެ އަންހެނުންނަށް އެ މީހުން ދިން ރޭޓިންގ މާ ބޮޑަށް ވެސް މައްޗެވެ.

މި ދިރާސާގެ އެއް މުސައްނިފު ކަމަށްވާ މާޓިން ޓޯވީ ވިދާޅުވި ގޮތުގައި، އިންސާނާ ރީތިކަން ދެކޭ ގޮތަކީ ދިރިއުޅޭ މާހައުލާއި ދިމާވާ ހާލަތްތަކަށް ބަލައި ބަދަލުވާ ކަމެކެވެ. މީގެ ކުރިން ކޮށްފައިވާ ދިރާސާތަކުން ވެސް އެނގޭ ގޮތުގައި، ކާބޯތަކެއްޗާއި ވަސީލަތްތައް ދަތި ހާލަތްތަކުގައި ފިރިހެނުން ބޮޑަށް އިސްކަންދެނީ ބަރުދަން ހުންނަ އަންހެނުންނަށެވެ. މީގެ މައިގަނޑު ސަބަބަކީ، ދަތި ދަނޑިވަޅުތަކުގައި މާ ބޮޑަށް ހިކިކޮށް ހުރުމަކީ ބަލިކަށިކަމާއި ދަރިމައިވުމުގެ ގާބިލުކަން ކުޑަކަން އަންގައިދޭ ކަމެއްގެ ގޮތުގައި ސިކުނޑި ދެކޭތީއެވެ. އަދި ހަށިގަނޑުގައި ސަރުބީ ހުރުމަކީ ދަތި ހާލުގައި ކެތްތެރިވެވޭނެ ކަމާއި، މުޖުތަމައުގައި ފުދުންތެރިކަން ހުރިކަން ދައްކުވައިދޭ ސިފައެއްގެ ގޮތުގައި ބެލެވެއެވެ.

މި ދިރާސާއާ ގުޅޭގޮތުން ވާހަކަދައްކަވަމުން ކްލީވްލޭންޑް ކްލިނިކްގެ ސައިކޮލޮޖިސްޓް ސްކޮޓް އެމް ބީ ވިދާޅުވީ، ދަތި ނުވަތަ ސްޓްރެސްގެ ހާލަތްތަކުގައި އިންސާނާ ބައިވެރިއަކު އިޚްތިޔާރުކުރާ މިންގަނޑުތައް ލުއިވެ، ފުޅާވެގެންދާ ކަމަށެވެ.

މި ހޯދުމަކީ، ހަށިގަނޑުގެ ސިފައާ މެދު ކަންބޮޑުވެ، މާ ބޮޑަށް ހިކެން އުޅުމުގެ ސަބަބުން ނަފްސާނީ މައްސަލަތަކާއި ކެއުމަށް ދިމާވާ ކަންކަމަށް (އީޓިންގ ޑިސްއޯޑާ) ތަހައްމަލުކުރަމުންދާ ފަރާތްތަކަށް ލިބޭނެ ވަރަށް ބޮޑު ހިތްވަރެކެވެ. "އަހަރެން ފަލަވީމާ އެއްވެސް ފިރިހެނަކު ގަޔައެއް ނުވާނެޔޭ" ހީކުރާ ހީކުރުމަކީ ހަގީގަތެއް ނޫންކަން މި ދިރާސާއިން ވަރަށް ބޮޑަށް ސާފުވެގެންދެއެވެ.