އެމްޓީސީސީއިން އޮފަރޭޝަނަލް އެވެއާނެސް ސެޝަނެއް ބާއްވައިފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ޕްރޮޖެކްޓް މެނޭޖަރުންނަށް އަމާޒުކޮށްގެން ހިންގާ ސިލްސިލާ ޕްރޮގްރާމް "އޮޕަރޭޝަނަލް އެވެއާނެސް ސެޝަން 2026" ގެ 2 ވަނަ ސެޝަން ކާމިޔާބުކަމާއެކު ނިންމާލައިފިއެވެ. މި ސިލްސިލާ ޕްރޮގްރާމްގެ ފުރަތަމަ ސެޝަން ކުރިއަށް ގެންގޮސްފައިވަނީ 15 އޮގަސްޓް 2026 ވަނަ ދުވަހުއެވެ.

މިއީ އެމްޓީސީސީގެ މެނޭޖިންގ ޑިރެކްޓަރ، ޑީސީޕީ (ރިޓަޔަރޑް) އަޙްމަދު ސަޢުދީގެ ޚާއްޞަ އިސްނެންގެވުމާއި، އިރުޝާދުގެ ދަށުން ކުންފުނީގެ އޮޕަރޭޝަނަލް ހިންގުންތެރިކަން ހަރުދަނާކޮށް، އިތުރަށް ރަނގަޅުކުރުމަށްޓަކައި މެނޭޖްމަންޓްއިން ކުރިއަށް ގެންދާ ވަރަށް މުހިންމު ސިލްސިލާ ޕްރޮގްރާމެކެވެ.

މި ޕްރޮގްރާމުގެ މައިގަނޑު މަޤްޞަދަކީ އެމްޓީސީސީގެ މެނޭޖްމަންޓާއި ޕްރޮޖެކްޓް ޓީމުތަކާ ދެމެދު އޮންނަ ގުޅުން ބަދަހިކޮށް، މަސައްކަތުގެ ތަޖުރިބާ ދެފަރާތުން ޙިއްޞާކޮށް، މަޝްރޫޢުތައް ކާމިޔާބުކަމާއެކު ނިންމުމަށް ބޭނުންވާ މުހިންމު ކަންކަމަށް ފުޅާ ދާއިރާއެއްގައި އަހުލުވެރިވުން ކަމަށް އެމްޓީސީސީއިން ފާހަގަކުރައްވައެވެ. ހަމައެހެންމެ، މި ސިލްސިލާ ޕްރޮގްރާމް މި އަހަރުގެ ބާކީ އޮތް 3 މަހުގައިވެސް ކުރިއަށް ގެންދިޔުމަށް ތާވަލުކޮށްފައިވާކަަމަށް އެމްޓީސީސީއިން ވިދާޅުވެއެވެ.

މި ސެޝަންތަކުގައި އެމްޓީސީސީގެ ޕްރޮޖެކްޓް މެނޭޖްމަންޓް ސިސްޓަމަށް އަހުލުވެރިކުރުމާއި، އިމާރާތްކުރުމާއި ބެހޭ ކުރެހުންތައް ބަލާނެ ގޮތާއި، އީ.އައި.އޭ ބަޔާންކޮށްފައިވާ ތިމާވެއްޓަށް ކުރާ އަސަރުތައް ދެނެގަތުމާއި، ޤާނޫނީ ހޭލުންތެރިކަމާއި، ކޮންޓްރެކްޓް އެޑްމިނިސްޓްރޭޝަނާއި، މަޝްރޫޢުތަކުގެ އެކައުންޓްސް، އިންވެންޓްރީ، މެޓީރިއަލްސް އަދި ޚަރަދު މެނޭޖްކުރުމާއި ބެހޭގޮތުން މަޢުލޫމާތު ޙިއްޞާކުރެވުނެވެ.

އިއްޔެ ބޭއްވުނު ސެޝަންގައި އެންމެ ފުޅާ ދާއިރާއެއްގައި މަޝްވަރާކޮށްފައިވަނީ ދެފަރާތުގެ ބައިވެރިވުން ހިމެނޭ ގޮތަށް، މިހާރު ކުރިއަށްދާ މަސައްކަތްތަކާއި، ދިމާވާ އޮޕަރޭޝަނަލް ގޮންޖެހުންތަކާ އަދި އެކަންކަމަށް ގެނެވިދާނެ ޢަމަލީ ޙައްލުތަކާ ބެހޭގޮތުންނެވެ. މީގެ ސަބަބުން، މަސައްކަތުގައި ލިބޭ މަޢުލޫމާތާއި ތަޖުރިބާތައް ޙިއްޞާކުރުމުގެ ފުރުޞަތު ލިބި، ސަމާލުކަން ދޭންޖެހޭ ދާއިރާތައް ދެނެގަނެވި، މަޝްރޫޢުތައް ތަންފީޒުކުރުން ހަރުދަނާކުރުމަށް ބޭނުންވާ އައު ޚިޔާލުތައް ހުށަހެޅުމަށް މަގުފަހިވާނެ ކަމަށްވެސް އެމްޓީސީސީއިން ވިދާޅުވެއެވެ. އަދި، ޢަމަލީ މައިދާނުގައި މަސައްކަތްކުރާ ޓީމުތަކާއި މެނޭޖްމަންޓާ ދެމެދު އޮތް ގުޅުން އިތުރަށް ބަދަހިވެ، ބިނާކުރަނިވި މަޢުލޫމާތުގެ މައްޗަށް ރިޢާއަތްކޮށް ނިންމުންތައް ނިންމުމަށާއި މުވާސަލާތީ ގުޅުން ހަރުދަނާކުރުމަށް މި ސެޝަނުން ބޮޑު އެހީތެރިކަމެއް ލިބިފައިވާކަނަމަށް އެމްޓީސީސީއިން ފާހަގަކުރައްވައެވެ.

ޢަމަލީ ތަޖުރިބާގެ އަލީގައި މަސައްކަތްތައް އިޞްލާހުކުރުމަށް އިސްކަންދިނުމަކީ، މަސައްކަތުގެ ފެންވަރު އިތުރަށް ރަނގަޅުކުރުމަށާއި، ޒިންމާދާރުކަމާއި ރައްކާތެރިކަމާއެކު މަޝްރޫޢުތައް ނިންމުމަށް އެމްޓީސީސީން ކުރާ މަސައްކަތްތަކަށް ލިބުނު އިތުރު ކުރިއެރުމެއް ކަމަށް އެފަރާތުންދެކެއެވެ. މީގެ އިތުރުން، މި ޕްރޮގްރާމުގެ ސަބަބުން ޕްރޮޖެކްޓް މެނޭޖްމަންޓްގެ ޤާބިލުކަން އިތުރުވެ، ޖަވާބުދާރީވުމާއި އުޞޫލުތަކަށް ޙުރުމަތްތެރިކޮށް ހިތުން އިތުރުވެ، އެކި ޑިޕާޓްމަންޓްތަކާއި ޕްރޮޖެކްޓް ޓީމުތަކުގެ މެދުގައި އޮންނަ ގުޅުން އިތުރަށް ހަރުދަނާވާނެކަމަށް އެމްޓީސީސީގެ މެނޭޖްމަންޓުން ޤަބޫލުކުރެއެވެ. އަދި، ޓީމުތަކުން ފާހަގަކުރާ ކަންކަމަށް ވަގުތުން ފިޔަވަޅު އަޅައި،
މަސައްކަތްތައް ގާތުން ބެލެހެއްޓުމަށްވެސް މި ޕްރޮގްރާމުގެ ސަބަބުން މަގުފަހިވާނެކަން އެމްޓީސީއިން ފާހަގަކުރައްވައެވެ.

އެމްޓީސީސީގެ އަމާޒަކީ، މިފަދަ ހަރަކާތްތައް މެދުވެރިކޮށް ކުންފުނީގެ މުވައްޒަފުންނަކީ ހުނަރުވެރި އަދި ޤާބިލު ބަޔަކަށް ހެދުމެވެ. ހަމައެހެންމެ، ރާއްޖޭގެ އެކި ކަންކޮޅުތަކުގައި ހިންގާ މަޝްރޫޢުތައް ރައްކާތެރިކަމާއި، ހަލުވިކަމާއި، އަދި ފުރިހަމަކަމާއެކު ނިންމައި ރައްޔިތުންނަށް ފޯރުކޮށްދިނުމެވެ.