ހޮރްމުޒް ކަނޑުއޮޅީގެ ނުތަނަވަސްކަން އިތުރުވެ އެމެރިކާއާއި އީރާން ޞުލްޙައާއި ދެކޮޅަށް

ހޮރްމުޒް ސަރަޙައްދުގައި މަސްލަޙަތު ގެއްލި އަނެއްކާވެސް ޞުލްޙައަށް ކުރާ މަސައްކަތް ހުއްޓުމަަކަށް އަތުވެއްޖެއެވެ.

ހޮރްމުޒް ކަނޑުއޮޅި އަލުން ހުޅުވާލުމަށް އީރާނުން ހުށަހެޅި ޑިޕްލޮމެޓިކް ހުށަހެޅުން އެމެރިކާގެ ރައީސް ޑޮނަލްޑް ޓްރަމްޕް ދެކޮޅު ހެއްދިތާ މަދު ގަޑިއިރުތަކެއްގެ ތެރޭގައި، އެ ސަރަހައްދުގައި ބާރުގަދަ ގޮވުންތަކެއްގެ އަޑު އިވިފައިވާ ކަމަށް އީރާނުގެ މީޑިއާތަކުން ރިޕޯޓްކޮށްފިއެވެ.

 އީރާނުގެ ދެކުނުގެ ގޭޝްމް ރަށާ ކައިރިން އިވުނު ގޮވުންތަކަކީ އީރާނުގެ ހުއްދައަކާ ނުލައި ދަތުރުކުރި އުޅަނދުތަކަކަށް އަމާޒުކޮށް ފޮނުވާލި މިސައިލާއި ޑްރޯން ހަމަލާތަކެއް ކަމަށް ބެލެވެއެވެ. ނަމަވެސް، މި ހަމަލާތައް އީރާނުގެ ކަމާބެހޭ ފަރާތްތަކުން ރަސްމީކޮށް ކަށަވަރުކޮށްދީފައެއް ނުވެއެވެ.

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނަމުންދަނީ އެ ގައުމުގެ ހުއްދަ ނުހޯދައި ދަތުރުކުރާ އެއްވެސް އުޅަނދަކަށް ހޮރްމުޒް ކަނޑުއޮޅި ބޭނުން ނުކުރެވޭނެ ކަމަށެވެ. މީގެއިތުރުން، އެމެރިކާއިން އީރާނުގެ ބަނދަރުތަކަށް އަޅާފައިވާ ދަތިކުރުމުގެ ފިޔަވަޅުތައް ނިމުމަކަށް ނުގެންނަނީސް ކަނޑުއޮޅި ފުރިހަމައަށް ނުހުޅުވާނެ ކަމަށް އީރާނުން ވަނީ ހާމަކޮށްފައެވެ. އަދި އީރާނުން ވަނީ އެ ގައުމުން ހުއްދަދީފައިވާ ވަގުތީ މަގެއް ބޭނުންކުރުމަށާއި ކަމާބެހޭ ފީ ދެއްކުމަށް ޝިޕިންގ ކުންފުނިތަކަށް އަންގާފައެވެ.

އަނެއްކޮޅުން، އެމެރިކާއިން ބުނަމުންދަނީ އެ ގައުމުގެ ހަނގުރާމަމަތީ މަނަވަރުތަކުގެ އެހީގައި ތެޔޮ ޓޭންކަރުތައް ރައްކާތެރިކަމާއެކު ބޭރުކުރަމުންދާ ކަމަށެވެ. އެމެރިކާގެ އެނާޖީ ސެކްރެޓަރީ ކްރިސް ރައިޓް ވިދާޅުވީ ދުވާލަކު ގާތްގަނޑަކަށް 13 މިލިއަން ފީފާގެ ތެޔޮ ދަތުރުކުރަމުންދާ ކަމަށެވެ.

 ނަމަވެސް އީރާނުން ދަނީ އެމެރިކާއިން ހަގީގަތާ ހިލާފު މައުލޫމާތު ފަތުރަމުންދާ ކަމަށް ތުހުމަތުކުރަމުންނެވެ. މި އަހަރުގެ ފެބްރުއަރީ 28 ގައި އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފެށި ފަހުން މި ސަރަހައްދުގެ ދަތުރުފަތުރަށް ވަނީ ބޮޑެތި ބުރޫތަކެއް އަރާފައެވެ.

އދ. ގެ އާންމު މަޖިލީހުގައި އީރާނުން ވަނީ ހަތް ޝަރުތެއް ފުރިހަމަކޮށްފިނަމަ ހަފްތާއެއްގެ ތެރޭގައި ކަނޑުއޮޅި ހުޅުވާލަން ތައްޔާރަށް އޮތް ކަމަށް ބުނެފައެވެ. މީގެ ތެރޭގައި އީރާނުގެ ބަނދަރުތަކުގެ ބްލޮކޭޑް އުވާލުމާއި، ހިފަހައްޓާފައިވާ ފައިސާތައް ދޫކޮށްލުމާއި، ލުބުނާނަށް ދެމުންދާ ހަމަލާތައް ހިމެނޭހެން ހުރިހާ ދިމާއަކުން ހަމަލާތައް ހުއްޓާލުން ހިމެނެއެވެ. ނަމަވެސް ރައީސް ޓްރަމްޕް ވަނީ މި ހުށަހެޅުންތައް ދޮގުކޮށް ބަލައިނުގަންނަ ކަމަށް ބުނެފައެވެ.

އީރާނުގެ އަސްކަރިއްޔާގެ ތަރުޖަމާނު އަބުލްފަޟްލް ޝެކަރްޗީ އިންޒާރު ދެއްވަމުން ވިދާޅުވީ އެމެރިކާއިން އިތުރަށް މި ކަމުގެ ތެރެއަށް ވަދެއްޖެނަމަ “އެމެރިކާއަށް ވަރުގަދަ ރައްދެއް ލިބޭނެ” ކަމަށެވެ. މަސްރަހު ދިރާސާކުރާ ފަރާތްތަކުން ލަފާކުރާ ގޮތުގައި، ކުރިއަށް އޮތް ހަފްތާތަކުގައި ހޮރްމުޒް ކަނޑުއޮޅީގައި އުޅަނދުތަކަށް ދެވޭ ހަމަލާތަކާއި ދެފަރާތުގެ ދެމެދުގައި ބަދަލުކުރެވޭ އަސްކަރީ ހަމަލާތައް އިތުރުވެ، ނުތަނަވަސްކަން އިތުރަށް ގޯސްވެގެންދާނެއެވެ.