މޫސުމީ ވިއްސާރައިގައި އިންޑިއާ އަދި ނޭޕާލުން 68 މީހުން މަރުވެއްޖެ

ވޭތުވެދިޔަ 72 ގަޑިއިރުގެ ތެރޭގައި އުތުރު އިންޑިއާ އަދި ނޭޕާލަށް ބޯކޮށް ވާރޭވެހި، ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި މަދުވެގެން 68 މީހުން މަރުވެއްޖެ ކަމަށް ކަމާބެހޭ އިދާރާތަކުން އާދީއްތަ ދުވަހު ހާމަކޮށްފިއެވެ.

އިންޑިއާގެ އެންމެ އާބާދީ ބޮޑު ސްޓޭޓް ކަމަށްވާ އުއްތަރު ޕްރަދޭޝްގައި ވޭތުވެދިޔަ ތިން ދުވަހުގެ ތެރޭގައި 56 މީހުން މަރުވެ، 1،000 އަށް ވުރެ ގިނަ ގެދޮރަށް ގެއްލުން ލިބިފައިވާ ކަމަށް އެ ސްޓޭޓުގެ ރިލީފް ކޮމިޝަނަރުގެ އޮފީހުން ބުނެފައިވެއެވެ. 

މި މަރުތައް ހިނގާފައިވަނީ ބޭ އޮފް ބެންގޯލް ސަރަހައްދުގައި އުފެދުނު ކޮޅިގަނޑު އެއްގަމަށް އަރައި ވިއްސާރަ ވަރުގަދަވުމުގެ ސަބަބުން ކަމަށާއި، ހުކުރު ދުވަހުން ފެށިގެން އާދީއްތަ ދުވަހާ ހަމައަށް އެ ސްޓޭޓަށް 66.5 މިލިމީޓަރުގެ ވާރޭ ވެހިފައިވާ ކަމަށް ރިޕޯޓުކޮށްފައިވެއެވެ. މީގެ އިތުރުން މި ވިއްސާރައިގެ ސަބަބުން ދަނޑުބިންތަކަށް ބޮޑެތި ގެއްލުންތަކެއް ވަނީ ލިބިފައެވެ.

އަވަށްޓެރި ނޭޕާލުގައި ބުރާސްފަތި ދުވަހުން ފެށިގެން ކުރި ވިއްސާރައިގައި 12 މީހުން މަރުވެފައިވާ ކަމަށް އެ ގައުމުގެ ޑިޒާސްޓާ އޮތޯރިޓީން ބުނެއެވެ. "ބުރާސްފަތި ދުވަހުން ފެށިގެން ވިއްސާރައާ ގުޅުންހުރި ކާރިސާތަކުގައި، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން 12 މީހުން މަރުވެއްޖެ،" ކަމަށް އެ އިދާރާގެ ތަރުޖަމާނު ޝާންތީ މަހަތު ވިދާޅުވިއެވެ. އަދި އިތުރު 7 މީހަކު ގެއްލިގެން ހޯދަމުން އަންނަ ކަމަށްވެސް އޭނާ ހާމަކުރެއްވިއެވެ.

މީގެ އިތުރުން އިންޑިއާގެ އޮޑިޝާ ސްޓޭޓުގައި ކޯރުތައް ފުރިގެން ބަންޑުންވުމާ ގުޅިގެން، ބިން ތިރި ސަރަހައްދުތަކުގައި ދިރިއުޅޭ 70،000 އަށް ވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. މި ވިއްސާރައިގައި ފާލަންތަކަށާއި މަގުތަކަށް ގެއްލުން ލިބިފައިވާއިރު، މަގުބޫލު ފަތުރުވެރި ސަރަހައްދެއް ކަމަށްވާ ދޭވްކުންޑު ވެސް ވަނީ ބަންދުކޮށްފައެވެ.

ދުނިޔޭގެ ފިނިހޫނުމިން މަތިވެ މޫސުމަށް އަންނަ ބަދަލުތަކުގެ ސަބަބުން ދެކުނު އޭޝިއާ ސަރަހައްދުގައި މިފަދަ ނުރައްކާތެރި މޫސުމީ ހާދިސާތައް އިތުރުވަމުންދާ ކަމަށް ސައިންސްވެރިން އަންނަނީ އިންޒާރު ދެމުންނެވެ.