ހަނގުރާމައިގެ ބިރުވެރިކަމުގެ ތެރޭގައި އީރާނުގެ ދަރިވަރުން އަލުން ސްކޫލަށް ދާން ފަށައިފި

އެމެރިކާ އާއި އިސްރާއީލުން އީރާނާ ދެކޮޅަށް ފެށި ހަނގުރާމައިގެ ސަބަބުން ދިމާވި ބޮޑެތި ގެއްލުންތަކާއި ބިރުވެރިކަމަށްފަހު، އައު ދިރާސީ އަހަރާއެކު އީރާނުގެ ސްކޫލުތަކުގައި ކިޔަވައިދިނުން އަލުން ފަށައިފިއެވެ.

 ނަމަވެސް އަދިވެސް ހަނގުރާމައިގެ ބިރުވެރިކަން މުޅިން ފިލައިގެން ނުދާ ކަމުގެ އިހުސާސް ބެލެނިވެރިންނާއި ޓީޗަރުން ދަނީ ފާޅުކުރަމުންނެވެ.

ހަނގުރާމައިގެ ފުރަތަމަ ދުވަހު މިނާބްގައި ހުންނަ ޝަޖަރޭ-ޔޭ ތައްޔިބާ އެލިމެންޓަރީ ސްކޫލަށް ދިން ވައިގެ ހަމަލާގައި 120 ކުދިން އަދި 35 ބޮޑެތި މީހުން ވަނީ މަރުވެފައެވެ. އެ ސްކޫލުގެ ބަދަލުގައި އައު އިމާރާތެއް އެޅި ނަމަވެސް، ދެކުނުގެ ޕްރޮވިންސްތަކުގައި އެމެރިކާގެ ހަމަލާތައް އަލުން އަތުވެދާނެ ކަމުގެ ބިރަށް ފުރަތަމަ ދެ ހަފުތާގައި ކިޔަވައިދިނުން ކުރިއަށްދާނީ އޮންލައިންކޮށެވެ. ފެބްރުއަރީ 28 ގައި ހަނގުރާމަ ފެށުނު ފަހުން ގިނަ ދުވަސްތަކެއް ވަންދެން ކިޔަވައިދިނުން ކުރިއަށް ގެންގޮސްފައިވަނީ އޮންލައިންކޮށެވެ.

ތެހެރާންގެ ބެލެނިވެރިއެއް ކަމަށްވާ މީސަމް އަލްޖަޒީރާއަށް ބުނި ގޮތުގައި، އަލުން ހަނގުރާމަ ފެށި ދަރިވަރުން ބަލައި ސްކޫލަށް ދާން ޖެހިދާނެ ކަމުގެ ބިރުވެރިކަން އަދިވެސް ހިތުން ފިލައިގެން ނުދެއެވެ. މިނާބްގެ ޓީޗަރެއް ކަމަށްވާ ފަރާމަރްޒްގެ އަންހެނުންނާއި ހަތް އަހަރުގެ ދަރިފުޅު ވަނީ އެ ސްކޫލަށް ދިން ހަމަލާގައި މަރުވެފައެވެ. އޭނާ ބުނީ ސްކޫލުތައް ހުޅުވުނު ނަމަވެސް އޭނާގެ ދިރިއުޅުން ދެން ދުވަހަކުވެސް ކުރިން އޮތް ހާލަތަށް ރުޖޫޢަ ނުވާނެ ކަމަށެވެ.

އީރާނުގެ އެޑިއުކޭޝަން މިނިސްޓްރީން ހާމަކުރި ގޮތުގައި ހަނގުރާމައިގެ ސަބަބުން 1,288 ސްކޫލަކަށް ވަނީ ސީދާ އަދި ނުސީދާ ގޮތުން ގެއްލުން ވެފައެވެ. މީގެ އިތުރުން ހަނގުރާމައިގެ އަސަރުތައް ދަރިވަރުންނަށް ދަސްކޮށްދިނުމަށް "ސެކްރިފައިސް އެންޑް މާޓާޑޮމް ބެލް" ގެ ނަމުގައި އައު ބައެއް މަންހަޖަށް ވަނީ އިތުރުކޮށްފައެވެ.

ޓީޗަރުން ފާހަގަކުރާ ގޮތުގައި ގިނަ ދުވަސްތަކެއް ވަންދެން އޮންލައިންކޮށް ކިޔަވައިދޭން ޖެހުމުގެ ސަބަބުން ދަރިވަރުންނާއި ޓީޗަރުންގެ ގުޅުމަށް ވަނީ ބޮޑެތި އަސަރުތަކެއް ކޮށްފައެވެ. އަދި އަލުން ހަމަލާތައް ފެށިއްޖެނަމަ އިންޓަނެޓްގެ ޚިދުމަތް ނުލިބޭ ކުދިން ތަޢުލީމުން މަޙްރޫމްވެދާނެ ކަމުގެ ކަންބޮޑުވުންވެސް ވަނީ އުފެދިފައެވެ.