އިސްރާއީލުން ހިފާފައިވާ ހުޅަނގު އައްސޭރި އެއްކޮށް ބަންދުކޮށްފި

އިސްރާއީލުގެ ކަމާބެހޭ ފަރާތްތަކުން ހިފާފައިވާ ހުޅަނގު އައްސޭރި އެއްކޮށް ބަންދުކޮށް، އެ ސަރަހައްދަށް ވަދެނުކުމެވޭ ސަރަހައްދުތައް ބަންދުކޮށްފައިވާ ކަމަށް ފަލަސްތީނުގެ ރަސްމީ ނިއުސް އެޖެންސީ، ވަފާއިން އާދީއްތަ ދުވަހު ރިޕޯޓްކޮށްފިއެވެ.

ރިޕޯޓްތައް ބުނާ ގޮތުގައި، މި ހުރަސްތައް އޮކްޓޯބަރު މަހުގެ ތިން ވަނަ ދުވަހާ ހަމައަށް ދެމިއޮންނާނެއެވެ. އިސްރާއީލުން މި ފިޔަވަޅުތައް އެޅި ސަބަބެއް ކަމަށް ބުނެފައިވަނީ ޔަހޫދީންގެ ދީނީ މުނާސަބަތެއް ކަމަށްވާ ސުއްކޮތް ނުވަތަ ފީސްޓް އޮފް ޓެބަނެކަލްސް ފާހަގަކުރުމެވެ.

މި ފިޔަވަޅުތަކުގެ ދަށުން އަސްކަރީ ޗެކްޕޮއިންޓުތަކުގައި ހަރުކަށި ފިޔަވަޅުތައް އަޅައި، ފަލަސްތީނު ރައްޔިތުން ދަތުރުފަތުރު ކުރުމާއި މުގައްދަސް ތަންތަނަށް ދިއުމަށް ވަނީ ހުރަސްއަޅާފައެވެ. ވަފާއިން ރިޕޯޓްކުރި ގޮތުގައި އިސްރާއީލު ސިފައިން ވަނީ ރާމަﷲ އަދި އަލްބީރޭގެ ވަށައިގެންވާ ސަރަހައްދުތަކުގައި ހަރުކަށި ފިޔަވަޅުތައް އަޅައި، ބައެއް މަގުތަކާއި ވަދެވޭ ދޮރުތައް ބަންދުކޮށްފައެވެ.

މީގެ އިތުރުން ތުރުމުސް އައްޔާ، އަބޫދް، ނަބީ ސާލިހު، އަޓާރާ އަދި ތައިބޭއަށް ވަންނަ ދޮރުތައް ބަންދުކޮށްފައިވާއިރު، ޔަބްރޫދު، އައިން ސިންޔާ އަދި ޖަބާގައި ޗެކްޕޮއިންޓްތައް ގާއިމުކޮށް އުޅަނދުތައް ބަލައި ފާސްކޮށް، ފަލަސްތީނު މީހުންގެ އައިޑެންޓިޓީ ކާޑު ޗެކްކުރަމުންދާ ކަމަށް އެ ސަރަހައްދުގެ މަސްދަރުތަކާ ހަވާލާދީ ވަފާއިން ބުނެފައިވެއެވެ.

މި ހަރުކަށި ފިޔަވަޅުތައް އަޅާފައިވަނީ 2023 ވަނަ އަހަރުގެ އޮކްޓޯބަރު މަހު ޣައްޒާގައި ހަނގުރާމަ ފެށުނު ފަހުން ހުޅަނގު އައްސޭރީގައި ނުތަނަވަސްކަން އިތުރުވެފައިވާ ދަނޑިވަޅެއްގައެވެ.

ފަލަސްތީނުގެ ރަސްމީ ހިސާބުތައް ދައްކާ ގޮތުން، އެ މުއްދަތުގެ ތެރޭގައި ހުޅަނގު އައްސޭރިން މަދުވެގެން 1,206 ފަލަސްތީނު މީހުން ވަނީ ޝަހީދުކޮށްލާފައެވެ. މީގެ ތެރޭގައި 254 ކުޑަކުދިން ހިމެނޭއިރު، 13,350 އަށްވުރެ ގިނަ މީހުން ޒަޚަމްވެ، 24,600 އަށްވުރެ ގިނަ މީހުން ވަނީ ހައްޔަރުކޮށްފައެވެ.