ބަރުދަން ލުއިކުރުމަށާއި ސިއްޙަތަށް ހިކަނދިފަތުން ލިބޭ ފައިދާތައް!

ހިކަނދިފަތަކީ އަހަރުމެން ދިވެހިންގެ ކެއްކުމުގައި ވަރަށް އާއްމުކޮށް ބޭނުންކުރާ ބާވަތެކެވެ. ކެއުމުގައި ރަހަ މީރުކޮށްދޭ މިފަތަކީ އޭގައި ގިނަ ފައިދާތަކެއް ވެސް އެކުލެވޭ ފަތެކެވެ. އެގޮތުން ހަށިގަނޑުގެ ބަރުދަން ލުއިކުރުމަށް އެހީތެރިވެދިނުމަކީ މީގެ ތެރެއިން އެންމެ ފާހަގަކޮށްލެވޭ އެއް ފައިދާއެވެ.

ދިރާސާތަކުން ދައްކާގޮތުގައި ހިކަނދިފަތުގައި އެކުލެވޭ "މަހަނިމްބައިން" ކިޔާ މާއްދާއަކީ ހަށިގަނޑުގައި އިތުރަށް ހުންނަ ސަރުބީތައް އަންދާލުމަށް އެހީތެރިވެދޭ މާއްދާއެކެވެ. މީގެ އިތުރުން މިއިން ހަށިގަނޑުގައިވާ ލިޕިޑް އަދި ޓްރިގްލައިސެރައިޑް އުފެއްދުން ކޮންޓްރޯލްކޮށް، ސަރުބީ އުފައްދާ ގުލްކޯޒްގެ މިންވަރު ދަށްކޮށްދެއެވެ.

ގުދުރަތީ ބޭސްތައް ބޭނުންކޮށްގެން ބަލިތަކަށް ފަރުވާކުރާ މާހިރުން ވިދާޅުވާ ގޮތުގައި ހެނދުނު ހުސްބަނޑާ ހުރެ ހިކަނދިފަތްކޮޅެއް ރޮލަށް ކެއުމުން ހަކުރުބަލި، ފަލަބަލި، އަދި ކޮލެސްޓްރޯލް ދަށްކުރުމަށް ބޮޑު ލުޔެއް ލިބެއެވެ.
މީގެ އިތުރުން، ހިކަނދިފަތަކީ ހަޖަމްކުރުމުގެ ނިޒާމުގެ މަސައްކަތް ރަނގަޅުކޮށްދީ، ކުޑަގޮހޮރާއި ބޮޑުގޮހޮރު ސާފުކޮށްދޭ އެއްޗެކެވެ. ހިކަނދިފަތުގައިވާ އެންޓިއޮކްސިޑެންޓްތަކުގެ ސަބަބުން ގޮހޮރުގައިވާ ވިހަ މާއްދާތައް ބޭރުކޮށް، ގޮހޮރުގެ ފާރަށް ލިބިފައިވާ ގެއްލުންތަކަށް ފަރުވާ ލިބިގެންދެއެވެ.

ސަރުބީ ވިރުވާލުމަށް ހިކަނދިފަތް ބޭނުންކުރާނީ ކިހިނެއް؟

 * ތަވައަކަށް ނުވަތަ ތެއްޔަކަށް އެއްތަށި ފެން އެޅުމަށްފަހު އުނދުން މައްޗަށް އުދާށެވެ.
 * ފެން ކެކިގަތުމުން 10-15 ހިކަނދިފަތް ފެނުގެ ތެރެއަށް އަޅާށެވެ.
 * ދެން 5 މިނެޓު ވަންދެން ރަނގަޅަށް ކެއްކުމަށްފަހު އުނދުން ނިއްވާލާށެވެ.
 * މިފެން ހިހޫވުމުން ބޯލާށެވެ.
 * ރަހަ މީރުކޮށްލުމަށާއި ފައިދާ އިތުރުކުރުމަށް މީގެ ތެރެއަށް ކުޑަ ލުނބޯހުތްކޮޅަކާއި މާމުއި ސަމްސަލެއް އެއްކޮށްލެވިދާނެއެވެ.

ކޮންމެ ދުވަހަކު ހެނދުނު މިގޮތަށް ތައްޔާރުކޮށްގެން ބޭނުންކުރުމަކީ ބަރުދަން ލުއިކުރުމަށާއި ހަށިގަނޑުގެ ދުޅަހެޔޮކަމަށް ވަރަށް ފައިދާހުރި ކަމެކެވެ.