ރާއްޖޭގައި ފުރަތަމަ ފަހަރަށް ނެވިގޭޝަން-ގައިޑެޑް ސިކުނޑީގެ އޮޕަރޭޝަނެއް ދަރުމަވަންތަ ހޮސްޕިޓަލުން ކާމިޔާބުކަމާއެކު ކޮށްފި

ދަރުމަވަންތަ ހޮސްޕިޓަލުގެ ޑިޕާޓްމަންޓް އޮފް ނިއުރޯސާޖަރީން ރާއްޖޭގައި ފުރަތަމަ ފަހަރަށް ނެވިގޭޝަން-ގައިޑެޑް ސިކުނޑީގެ އޮޕަރޭޝަނެއް ކާމިޔާބުކަމާއެކު ކޮށް، ރާއްޖޭގެ ސިއްހީ ދާއިރާގައި ތާރީހީ ބޮޑު ކުރިއެރުމެއް ހޯދައިފިއެވެ.

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ވިދާޅުވީ، މި ތާރީހީ އޮޕަރޭޝަން ކުރިއަށްދިޔައީ ދުނިޔޭގެ ފެންވަރުގެ އެންމެ ފަހުގެ ޓެކްނޮލޮޖީ ކަމަށްވާ "މެޑްޓްރޯނިކް ސްޓެލްތްސްޓޭޝަން އެސް 8" ބޭނުންކޮށްގެންނެވެ. މިއީ ރާއްޖޭގައި ޒަމާނީ އަދި އެންމެ ފުރިހަމަ ނިއުރޯސާޖަރީގެ ހިދުމަތްތައް ގާއިމުކުރުމަށް ކުރެވެމުންދާ މަސައްކަތުގެ ތެރެއިން ހާސިލުކުރެވުނު ވަރަށް މުހިންމު ކާމިޔާބީއެކެވެ.

The Department of Neurosurgery at Dharumavantha Hospital has successfully performed the country’s first navigation-guided brain surgery using the Medtronic StealthStation™️ S8.

A major milestone in bringing advanced precision neurosurgery to the Maldives.#DharumavanthaHospital… pic.twitter.com/ipViFImQSH

— IGMH (@igmhmv) September 28, 2026

ސްޓީރިއޯޓެކްޓިކް ނިއުރޯނެވިގޭޝަން ނުވަތަ ނެވިގޭޝަން-ގައިޑެޑް ސިކުނޑީގެ އޮޕަރޭޝަނަކީ އެއްގަމު ދަތުރުފަތުރުގައި މަގު ހޯދުމަށް ބޭނުންކުރާ ޖީޕީއެސް ނިޒާމެކޭ އެއްފަދައިން، އޮޕަރޭޝަން ކުރަމުންދާއިރު ސިކުނޑީގެ އެތެރޭގެ ހަގީގީ މަންޒަރުތައް ތްރީޑީކޮށް ވަގުތުން ޑޮކްޓަރުންނަށް ބަލައިލެވޭ ގޮތަށް ފަރުމާކޮށްފައިވާ ހާއްސަ ނިޒާމެކެވެ. މި ނިޒާމުގެ އެހީގައި ސިކުނޑީގެ ޓިއުމަރުތައް ނެގުމާއި، ލޭހޮޅިތަކުގެ މައްސަލަތައް ހައްލުކުރުމުގެ އިތުރުން ނާރުގެ އެކި އޮޕަރޭޝަންތައް ކުރިއަށްވުރެ މާ ފަސޭހައިން ކުރެވޭނެއެވެ.

މި ޓެކްނޮލޮޖީ މަސައްކަތްކުރަނީ އޮޕަރޭޝަންގެ ކުރިން ހަދާ އެމްއާރްއައި ނުވަތަ ސީޓީ ސްކޭންތަކަށް ބިނާކޮށެވެ. އޮޕަރޭޝަން ތިއޭޓަރުގައި ހުންނަ ހާއްސަ ކެމެރާތަކާއި ސެންސަރުތަކުގެ އެހީގައި، ސްކޭންގެ މަންޒަރުތަކާއި ބަލިމީހާގެ ސިކުނޑީގެ ހަގީގީ އެނަޓޮމީ ވަގުތުން ގުޅުވާލަދެއެވެ. މީގެ ސަބަބުން ސާޖަން ބޭނުންކުރާ އާލާތްތައް ސިކުނޑީގެ ކޮން ދިމާލެއްގައި އަދި ކިހާ ފުންމިނެއްގައި ހުރިކަން ކޮމްޕިއުޓަރު ސްކްރީނުން މިލިމީޓަރުގެ ކުޑަކުޑަ މިންވަރަކަށް ވެސް ސައްހަކޮށް ދައްކައިދެއެވެ.

އައިޖީއެމްއެޗުން ފާހަގަކުރާ ގޮތުގައި، މިފަދަ ވަސީލަތްތަކުގެ ސަބަބުން އޮޕަރޭޝަންގެ ރައްކާތެރިކަން އެތައް ގުނައަކަށް އިތުރުވެ، ސިކުނޑީގެ ދުޅަހެޔޮ ބައިތަކަށް ލިބޭ ގެއްލުން ކުޑަކޮށްދެއެވެ. އަދި ހަމައެކަނި ބަލިޖެހިފައިވާ ބަޔަށް ވާސިލުވުމަށް ކުޑަ ތަންކޮޅެއް ކަފާލައިގެން އޮޕަރޭޝަން ކުރެވޭތީ، އޮޕަރޭޝަނަށްފަހު ދިމާވެދާނެ ނުރައްކާތައް ކުޑަވެ، ބަލިމީހާ އަވަހަށް ފަސޭހަވެގެން ހޮސްޕިޓަލުގައި ހޭދަކުރަންޖެހޭ މުއްދަތު ވަރަށް ބޮޑަށް ކުރުވެގެންދާނެ ކަމަށްވެސް އައިޖީއެމްއެޗުން ފާހަގަކުރެއެވެ.