ޓްރަމްޕްގެ ނިންމުމާއެކު ތެލުގެ އަގު އުޑަށް!

ހަތް ދުވަހުގެ ތެރޭގައި ހޮރުމުޒް ކަނޑުއޮޅި ހުޅުވާލުމަށް އީރާނުން ހުށަހެޅި ހުށަހެޅުން އެމެރިކާގެ ރައީސް ޑޮނަލްޑް ޓްރަމްޕް ބަލައިނުގަތުމާ ގުޅިގެން، ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް އުފުލިއްޖެއެވެ.

ދުނިޔޭގެ ބެންޗްމާކް ކަމަށްވާ ބްރެންޓް ކްރޫޑްގެ އަގު ހޯމަ ދުވަހު އޭޝިއާގެ ވިޔަފާރީގައި ތިން އިންސައްތައަށް ވުރެ މައްޗަށް ގޮސް، ފީފާއެއްގެ އަގު ގާތްގަނޑަކަށް 108 ޑޮލަރަށް އެރިއެވެ. މެންދުރުފަހު އަގުތައް ކޮންމެވެސް ވަރަކަށް ދަށްވި ނަމަވެސް، ނޮވެމްބަރު މަހުގެ ބްރެންޓް ފިއުޗާސްގެ އަގު ހުރީ ފީފާއެއް 107.35 ޑޮލަރުގައެވެ.

މި ބަދަލާއެކު އޭޝިއާ ޕެސިފިކް ސަރަހައްދުގެ ހިއްސާގެ ބާޒާރުތަކަށް ވަނީ އެކިވަރުގެ އަސަރުތައް ކޮށްފައެވެ. އެގޮތުން ޖަޕާނުގެ ނިކޭ 225 އިންޑެކްސް 0.73 އިންސައްތަ އަދި ދެކުނު ކޮރެއާގެ ކޮސްޕީ އިންޑެކްސް 2.70 އިންސައްތަ ދަށަށް ދިޔައިރު، ހޮންގކޮންގްގެ ހޭންގް ސެންގް އިންޑެކްސް ވަނީ 0.54 އިންސައްތަ މައްޗަށް ގޮސްފައެވެ. އަދި އޮސްޓްރޭލިއާގެ އެސް އެންޑް ޕީ/އޭއެސްއެކްސް 200 ވަނީ 0.17 އިންސައްތަ މައްޗަށް ޖެހިލާފައެވެ.

ބާޒާރަށް މި ލޮޅުން އައިސްފައިވަނީ އެމެރިކާ އަދި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ނިމުމަކަށް ގެނައުމަށް އީރާނުން ހުށަހެޅި އެންމެ ފަހުގެ ހުށަހެޅުން ބަލައިނުގަނެވޭނެ ކަމަށް ޓްރަމްޕް ވިދާޅުވުމާ ގުޅިގެންނެވެ. އދ. ގެ އާންމު މަޖިލީހުގައި އީރާނުން ހުށަހެޅި މި ހުށަހެޅުމުގައި ބުނެފައިވަނީ، ހިފަހައްޓާފައިވާ އީރާނުގެ ފައިސާ ދޫކޮށްލުމަށާއި، ދަތިކުރުމުގެ ފިޔަވަޅުތައް އުވާލައި، ބަނދަރުތަކުގެ ބްލޮކޭޑް ނިމުމަކަށް ގެނައުމުން، ހަފްތާއެއްގެ ތެރޭގައި ކަނޑުއޮޅި ހުޅުވާލައި ނިއުކްލިއާ މަޝްވަރާތަކަށް އެނބުރި އަންނާނެ ކަމަށެވެ.

ފެބްރުއަރީ މަހުގެ ފަހުކޮޅު ހަނގުރާމަ ފެށުމުގެ ކުރިން ދުނިޔޭގެ ތެލުގެ ފަސްބައިކުޅަ އެއްބައި ދަތުރުކުރަމުން ދިޔައީ މި ކަނޑުއޮޅިންނެވެ. ހަނގުރާމައިގެ ކުރިން ދުވާލަކު ގާތްގަނޑަކަށް 130 އުޅަނދު މި ސަރަހައްދު ހުރަސްކުރި ނަމަވެސް، ހަމަލާތަކާ ގުޅިގެން ވިޔަފާރި އުޅަނދުތަކުގެ ދަތުރުތައް ވަނީ ބޮޑުތަނުން ދަށަށް ގޮސްފައެވެ. ނަމަވެސް ސެޕްޓެމްބަރު 21 އިން 27 އަށް 132 އުޅަނދު މި ކަނޑުއޮޅިން ދަތުރުކޮށްފައިވާ ކަމަށް މެރިންޓްރެފިކްގެ ހިސާބުތަކުން ދައްކައެވެ.

ދުނިޔޭގެ ބާޒާރުތަކުގައި ތެލުގެ އަގުތަށް އުފުލެމުންގޮސް އާންމުރައްޔިތުންނަށް ތެޔޮ ގަތުމަށް ބުރައަކަށް ވެފައިވާއިރު ދިވެހި ސަރުކާރުން ދަނީ ތެލުގެ އަގު އުފުލުނަނުދީ ރައްޔިތުންނަށް އެންމެ ހެޔޮ އަގުގައި ތެޔޮ ފޯރުކޮށްދިނުމަށް ފިޔަވަޅުތައް އަޅައި އެކަމުގައި ސާބިތުވަމުންނެވެ.