ސެޓެލައިޓް ފޮޓޯތަކުން ފެންނަނީ ސުންނާފަތިވެފައިވާ ޣައްޒާ

އިސްރާއީލުން ފަލަސްތީނުގެ ޣައްޒާއާ ދެކޮޅަށް ހިންގަމުންދާ ގަތުލުއާންމަށް ގާތްގަނޑަކަށް ތިން އަހަރު ފުރެން ކައިރިވެފައިވާއިރު، އަލަށް އަޕްޑޭޓްކުރި ގޫގުލް މެޕްސްގެ ސެޓެލައިޓް ފޮޓޯތަކުން ޣައްޒާއަށް ލިބިފައިވާ ބޮޑެތި ގެއްލުންތަކާއި ސުންނާފަތިވުން ހާމަވެއްޖެއެވެ.

 ސެޓެލައިޓް ފޮޓޯތަކުން ފެންނަ ގޮތުގައި ޣައްޒާގެ އަވަށްތައް އެއްކޮށް ބިމާ ހަމަވެ، އެއް ސަރަހައްދު އަނެއް ސަރަހައްދާ ވަކިކުރަން ނޭނގޭ މިންވަރަށް ވަނީ ހަލާކުވެފައެވެ. އަދި ދަނޑުބިންތަކާއި ޒަމާންވީ އަޅުކަންކުރާ ތަންތަން ވަނީ އެއްކޮށް ނެތިކޮށްލާފައެވެ.

އދ. ގެ ސެޓެލައިޓް ސެންޓަރު (ޔޫއެންއޯސެޓް) އިން ހެދި ދިރާސާއަކުން ދައްކާ ގޮތުގައި، ގާތްގަނޑަކަށް އަހަރެއްހާ ދުވަސް ކުރިން އިއުލާނުކުރި "ހަނގުރާމަ ހުއްޓާލުމުގެ" ފަހުން ވެސް ޣައްޒާގައި ސުންނާފަތިވި އިމާރާތްތަކުގެ އަދަދު ވަނީ 9 އިންސައްތަ އިތުރުވެފައެވެ. އދ. ގެ ރެފިއުޖީ އެޖެންސީ (އުންރުވާ) އިން ހާމަކުރި ގޮތުގައި، ޣައްޒާގެ އިމާރާތްތަކުގެ ގާތްގަނޑަކަށް 82 އިންސައްތަ (ދެލައްކައެއްހާ އިމާރާތް) އަށް ވަނީ އެކިވަރުގެ ގެއްލުންތައް ލިބިފައެވެ. އަދި އޭގެ ތެރެއިން ތިންބައިކުޅަ ދެބައި އިމާރާތް ވަނީ އެއްކޮށް ހަލާކުވެ ބިމާ ހަމަވެފައެވެ.

ދެކުނުގެ ރަފަހާއި މުވާސީގެ ހާލަތު
ޣައްޒާގެ އެންމެ ދެކުނުގައި އޮންނަ ރަފަހަށް އެކި ސަރަހައްދުތަކުން އެތައް މިލިއަން ބަޔަކު ހިޖުރަކުރި ނަމަވެސް، 2024 ވަނަ އަހަރުގެ މޭ މަހު އިސްރާއީލުން އެ ސަރަހައްދަށް ދިން ހަމަލާތަކާ ގުޅިގެން ގާތްގަނޑަކަށް އެއް މިލިއަން މީހުން ވަނީ އަނެއްކާވެސް ޚާން ޔޫނިސް އަދި ދައިރުލް ބަލަހް އަށް ފިލައިގެން ދާން މަޖުބޫރުވެފައެވެ. ރަފަހްގެ ހުޅަނގުގައި އޮންނަ ތަލް އަލް ސުލްތާން އަވަށް އެއްކޮށް ފުނޑުފުނޑުވެފައިވާއިރު، ސެޓެލައިޓް ފޮޓޯތަކުން ފެންނަނީ ކުރިން ގޭދޮރު ހުރި ތަންތަނުގައި ހަމައެކަނި ވެލިގަނޑެވެ.

އިސްރާއީލުން "އިންސާނީ ރައްކާތެރި ސަރަހައްދެއް" ކަމަށް ކަނޑައެޅި އަލް މަވާސީ ސަރަހައްދަށް އެތައް ލައްކަ ރައްޔިތުން ޖަމާވެފައިވާއިރު، އިސްރާއީލުން ދަނީ އެ ސަރަހައްދަށް ވެސް ތަކުރާރުކޮށް ބޮން އަޅަމުންނެވެ. އާ ސެޓެލައިޓް ފޮޓޯތަކުން ފެންނަނީ ކުރިން ހުސްކޮށް އޮތް މި ސަރަހައްދުގައި ފުރިބާރުވެފައިވާ ފޭލިގެތަކެވެ.

ޚާން ޔޫނިސް، ޣައްޒާ ސިޓީ އަދި އުތުރުގެ ސަރަހައްދުތައް
ޔޫއެންއޯސެޓްގެ ރިޕޯޓްތައް ދައްކާ ގޮތުގައި އެންމެ ގިނަ އިމާރާތްތައް ހަލާކުވެފައިވަނީ ޚާން ޔޫނިސްގައެވެ. އެއީ 51،885 އިމާރާތެވެ. އަދި ޚާން ޔޫނިސްގައި އަލުން ހުޅުވިތާ ދެ އަހަރު ނުވަނީސް އިންޑޮނޭޝިއަން އިސްތިގްލާލް މިސްކިތް ވެސް ވަނީ ބިމާ ހަމަކޮށްފައެވެ. ދެވަނައަށް އެންމެ ބޮޑު ގެއްލުމެއް ލިބުނު ޣައްޒާ ސިޓީގައި 110،000 މަސްވެރިންގެ ދިރިއުޅުމާ ގުޅިފައިވާ ޣައްޒާ ސިޓީގެ ބަނދަރު ވަނީ ބޮޑެތި ގެއްލުންތަކެއް ލިބި، މަސް ބޯޓުފަހަރުތައް ސުންނާފަތިވެފައެވެ.

މީގެއިތުރުން، އުތުރު ޣައްޒާގެ ޖަބަލިއާ ރެފިއުޖީ ކޭމްޕް އެއްކޮށް ހަލާކުވެ، އެ ސަރަހައްދުގެ ދަނޑުބިންތަކުގެ 94 އިންސައްތަ ވަނީ ބޭނުންނުކުރެވޭ ވަރަށް ހަލާކުވެފައެވެ.

އޮކްޓޫބަރު 7، 2023 ގައި އިސްރާއީލުން ޣައްޒާއާ ދެކޮޅަށް ފެށި ހަނގުރާމައިގައި މިހާތަނަށް 74،000 އަށް ވުރެ ގިނަ ފަލަސްތީނު ރައްޔިތުން ޝަހީދުވެ، 175،000 އަށް ވުރެ ގިނަ މީހުން ވަނީ ޒަޚަމްވެފައެވެ.

 ވެއްޓިފައިވާ އިމާރާތްތަކުގެ ދަށުގައި ގިނަ އަދަދެއްގެ ބަޔަކު ވުމާއެކު މި އަދަދުތައް މިއަށްވުރެ މަތިވާނެ ކަމަށް ބެލެވެއެވެ. އަދި ވޭތުވެދިޔަ އަހަރުގެ އޮކްޓޫބަރު މަހު އިއުލާނުކުރި "ހަނގުރާމަ ހުއްޓާލުމުގެ" ފަހުން ވެސް އިސްރާއީލުގެ ހަމަލާތަކުގައި 1،400 އަށް ވުރެ ގިނަ މީހުން ޝަހީދުވެ، 5،000 އެއްހާ މީހުން ވަނީ ޒަޚަމްވެފައެވެ.