ހުޅަނގު އައްސޭރީގެ ޖާލޫދަށް ވަޒަންވެރިން ހަމަލާދީފި

ހިފާފައިވާ ހުޅަނގު އައްސޭރީގެ އުތުރުގައި އޮންނަ ފަލަސްތީނުގެ އަވަށެއް ކަމަށްވާ ޖާލޫދަށް އިސްރާއީލުގެ ވަޒަންވެރިން ވަދެގަނެ، ގޭގެތަކުގައްޔާއި ވެހިކަލްތަކުގައި ރޯކޮށް ބޮޑެތި ގެއްލުންތަކެއް ދީފިއެވެ.

 މި ހަމަލާއަކީ ހުޅަނގު އައްސޭރީގައި ފަލަސްތީނު މީހުންނާ ދެކޮޅަށް ހިންގަމުންދާ ނުރައްކާތެރި އަނިޔާވެރި އަމަލުތަކުގެ ތެރެއިން ހިންގި އާ ހަމަލާއެކެވެ.

ތުރުކީގެ އަނަދޯލު ނޫސް އެޖެންސީއަށް މައުލޫމާތު ދިން މަސްދަރުތަކުން ބުނި ގޮތުގައި، އިސްރާއީލުގެ ވަޒަންވެރިން ރޯކޮށްލާފައިވަނީ ޖާލޫދް އަވަށުގެ ތޫބާސީ އާއިލާއަށް ނިސްބަތްވާ ދެ ގެއެއްގައެވެ. މިއީ ވަޒަންވެރިންގެ ފުރައްސާރައާއި އަނިޔާވެރިކަމާ ހެދި ގާތްގަނޑަކަށް ދެ މަސް ދުވަހު ގެދޮރު ދޫކޮށް ދާން މަޖުބޫރުވުމަށްފަހު، އިސްރާއީލުގެ ކޯޓު އަމުރެއްގެ ދަށުން އެ އާއިލާ އެނބުރި އެ ގެއަށް އައިތާ މަދު ގަޑިއިރުތަކެއްގެ ތެރޭގައެވެ.

ގެއަށް ލިބުނު ގެއްލުންތަކާ ގުޅޭގޮތުން ގޭގެ ވެރިޔާ މަޙްމޫދު ތޫބާސީ ބުނީ، ކޯޓު އަމުރާއެކު އެނބުރި އައިއިރު އެ ގޭ ހިސާރުކޮށްގެން ތިބި ވަޒަންވެރިން ވަނީ ބޮޑެތި ގެއްލުންތަކެއް ދީފައި ކަމަށެވެ. އަދި ރޭގަނޑުގެ ވަގުތުގައި ވަޒަންވެރިން އަލުން އެނބުރި އައިސް މުޅި ގޭގައި ރޯކޮށް، ދިރިނޫޅެވޭ ވަރަށް ހަލާކުކޮށްލާފައިވާ ކަމަށް އޭނާ ބުންޏެވެ. މި ހަމަލާއާއެކު އިސްރާއީލު ސިފައިން ވަނީ ބަޑި ދައްކައިގެން ތޫބާސީ އާއިލާ އަނެއްކާވެސް ގެއިން ނެރެ ބޭރުކޮށްފައެވެ.

މީގެ އިތުރުން ނާބުލުސްގެ ދެކުނުގައި އޮންނަ ޤަރްޔޫތު އަވަށުގައި އިސްރާއީލުގެ ވަޒަންވެރިން ވަނީ މުސްކުޅި އަންހެނެއްގެ ގެއަށް ގަދަކަމުން ވަދެގަނެ އޭނާއަށް ހަމަލާދީ ޒަޚަމްކޮށްލާފައެވެ. އަދި ރާމަﷲ ކައިރީގައި އޮންނަ އަލް-މުޣައްޔިރު އަވަށުގައިވެސް ވަޒަންވެރިން ވަނީ ފަލަސްތީނުގެ ގެދޮރަށާއި މުދަލަށް ހަމަލާދީ، ގައިދީއެއްގެ ގޭގައި ރޯކޮށްލާފައެވެ.

އދ. ގެ އޮފީސް ފޮރ ދަ ކޯޑިނޭޝަން އޮފް ހިއުމަނިޓޭރިއަން އެފެއާޒް (އޮޗާ) އިން ހާމަކޮށްފައިވާ ގޮތުގައި މިއަހަރުގެ ޖެނުއަރީން ފެށިގެން ޖުލައި މަހުގެ ނިޔަލަށް ހުޅަނގު އައްސޭރީގައި ފަލަސްތީނު މީހުންނާ ދެކޮޅަށް ވަޒަންވެރިން ދިން 1،330 އަށްވުރެ ގިނަ ހަމަލާ ރެކޯޑުކުރެވިފައިވެއެވެ. މިއީ ފާއިތުވި 20 އަހަރުގެ ތެރޭގައި މިފަދަ ހަމަލާތައް މިހާ ހަލުވި ދުވެއްޔެއްގައި އިތުރުވި ފުރަތަމަ ފަހަރެވެ.