އެސްއެމްއީ ޑިޖިޓަލް އިން ކުޅުދުއްފުށީ "އައިލެންޑް ކާނިވަލް" ގައި ބައިވެރިވަނީ

މި މަހުގެ 30 އިން އަންނަ އޮކްޓޯބަރު 4 އަށް ހދ. ކުޅުދުއްފުށީގައި  ބޭއްވުމަށް ހަމަޖެހިފައިވާ "އައިލެންޑް ކާނިވަލް" ގައި ބައިވެރިވުމަށް އެސްއެމްއީ ޑިޖިޓަލް އިން ނިންމައިފިއެވެ.

މި ކާނިވަލަކީ ކުޅުދުއްފުށި ސިޓީ ކައުންސިލާއި އެޑްވެންޗަރ އަޕް ގުޅިގެން، ތިލަދުންމައްޗާއި މިލަދުންމަޑުލު ގެ ކުދި އަދި މެދުފަންތީގެ ވިޔަފާރިތަކުގެ އުފެއްދުންތައް އިސްތިހާރުކޮށް، ވިޔަފާރި ފުޅާކުރުމުގެ ފުރުސަތު ފަހިކޮށްދިނުމުގެ މަގްސަދުގައި އިންތިޒާމުކުރާ ހަރަކާތެއް ކަމަށް އެސްއެމްއީ ޑިޖިޓަލްއިން ވިދާޅުވެއެވެ. މީގެއިތުރުން އިޖުތިމާއީ ގުޅުން ބަދަހިކުރުމަށްޓަކައި އާއިލީ ހަވީރަކާއި، ތަފާތު ގިނަ ކުޅިވަރު ހަރަކާތްތައް ވެސް މި ކާނިވަލުގެ ތެރޭގައި ކުރިއަށްދާނެ ކަމަށްވެސް ވަނީ ވިދާޅުވެފައެވެ.

އެސްއެމްއީ ޑިޖިޓަލްއިން ވިދާޅުވީ، މި ކާނިވަލުގައި އެސްއެމްއީ ޑިޖިޓަލްގެ މައިގަނޑު އަމާޒަކީ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް އެހީތެރިވެދީ ހާއްސަކޮށް އަންހެނުންނާއި ޒުވާނުން ވިޔަފާރީގެ ދާއިރާއަށް ނެރުމަށް ހިތްވަރުދިނުންކަމަށެވެ. އަދި ރާއްޖޭގެ އިގްތިސާދުގެ މައިގަނޑު ސިނާއަތްތައް ކަމުގައިވާ މަސްވެރިކަމާއި، ފަތުރުވެރިކަން އަދި ދަނޑުވެރިކަން ފަދަ ދާއިރާތަކަށް އެސްއެމްއީ ޑިޖިޓަލް މެދުވެރިކޮށް ލިބެންހުރި މާލީ އެހީތެރިކަމާ ގުޅޭ މައުލޫމާތު ފޯރުކޮށްދީ، މި ހިދުމަތްތަކަށް އާންމުން ހޭލުންތެރިކުރުވުން ވެސް މި ކާނިވަލުގެ ތެރެއިން ކުރިއަށްދާނެކަމަށް އެ ކުންފުނިން ހާމަކުރެއެވެ.

ކާނިވަލް ކުރިއަށްދާ ދުވަސްވަރު އެސްއެމްއީ ޑިޖިޓަލްގެ ހިދުމަތްތަކަށް އެދި ހުށަހަޅަން ބޭނުންވާ ފަރާތްތަކަށް ލިޔެކިޔުންތައް ފުރިހަމަކުރުމުގައި އެހީތެރިވެދިނުމަށް، އެ ކުންފުނީގެ މުވައްޒަފުން ކުޅުދުއްފުށީގައި ހަރަކާތްތެރިވާނެ ކަމަށް އެ ކުންފުނިން ވިދާޅުވެއެވެ. މީގެއިތުރުން، މީގެކުރިން އެސްއެމްއީ ޑިޖިޓަލް މެދުވެރިކޮށް ދޫކޮށްފައިވާ ކޮންވެންޝަނަލް ލޯނުތައް، އިސްލާމިކް ފައިނޭންސިންގ ފެސިލިޓީތަކަށް ބަދަލުކުރަން އެދޭ އުތުރުގެ ތިން އަތޮޅުގެ ކަސްޓަމަރުންނަށް އެހީތެރިކަން ފޯރުކޮށްދިނުމުގެ މަސައްކަތް ވެސް މި ދަތުރުގެ ތެރެއިން އެ ކުންފުނިން ކުރިއަށް ގެންދާނެ ކަމަށް ވަނީ ވިދާޅުވެފައެވެ.

މި ކާނިވަލުގެ ސްޕޮންސަރެއްގެ ގޮތުގައިވެސް ހިމެނޭ އެސްއެމްއީ ޑިޖިޓަލްއިން ހާމަކުރި ގޮތުގައި، "އައިލެންޑް ކާނިވަލް" އަކީ އިޖުތިމާޢީ އެއްބައިވަންތަކަން އާލާކޮށް، ކުޑަކުދިންނަށް އުފާވެރި މާހައުލެއް ހޯދައިދިނުމުގެ އިތުރުން ކުދި ވިޔަފާރިތަކަށް އަގުހުރި ފުރުޞަތުތަކެއް ފަހިކޮށްދޭ ހަރަކާތެކެވެ. އެހެންކަމުން، މިފަދަ ހަރަކާތްތަކުގައި އެ ކުންފުނިން ބައިވެރިވަނީ މުޖުތަމަޢުގެ ކުރިއެރުމާއި ލާބައަށް އިސްކަންދީގެންނެވެ.