ރަސްމާލޭގައި ބިނާކުރާ މެރީނާ ވެގެންދާނީ ދުނިޔޭގައި އެންމެ ފުރިހަމަ ހިދުމަތްތަކެއް ލިބޭ ތަނަށް: އަލައްބާރު

ރަސްމާލޭގައި ތަރައްޤީކުރާ ވޯޓާފްރަންޓް އަދި މެރީނާ ވެގެންދާނީ ދުނިޔޭގެ ފެންވަރުގައި އެންމެ ފުރިހަމަ ޚިދުމަތްތަކެއް ލިބިގެންދާނެ އެންމެ ހިތްގައިމު އެއް މަންޒިލަށް ކަމަށް، ރަސްމާލޭގައި 20 ބިލިއަން ޑޮލަރު އިންވެސްޓްކުރަން ނިންމާފައިވާ ދުނިޔޭގެ މަޝްހޫރު ވިޔަފާރިވެރިޔާ މުޙައްމަދު އަލައްބާރު ވިދާޅުވެއްޖެއެވެ.

ޔޫއޭއީގެ މަޝްހޫރު ބުރްޖު ޚަލީފާ އާއި ދުބާއީ މޯލް ފަދަ ބިޔަ މަޝްރޫޢުތައް ތަރައްޤީކުރި އެމާރ ޕްރޮޕަޓީސްގެ ބާނީ އަދި އަބޫދާބީގެ އީގަލް ހިލްސް ކުންފުނީގެ ޗެއާމަން މުޙައްމަދު އަލައްބާރު މިހެން ވިދާޅުވީ އިންސްޓަގްރާމްގައި ހިއްސާކުރެއްވި ވީޑިއޯ މެސެޖެއްގައެވެ. ދިވެހި ސަރުކާރުން ވަނީ ރަސްމާލޭގައި "މޯލްޑިވްސް ވޯޓާފްރަންޓް އެންޑް މެރީނާ" ތަރައްޤީކުރުމަށް އީގަލް ހިލްސް ކުންފުންޏާ އެކު ދާދިފަހުން ބައިވެރިވެފައެވެ.

އަލައްބާރު ވިދާޅުވީ، ދުނިޔޭގައި ރާއްޖެ ފަދަ ދެވަނަ އެހެން ޤައުމެއް ނެތް ކަމަށާއި، ވަރުބަލިވެ ހިތްހަމަޖައްސާލަން ބޭނުންވާ ކޮންމެ މީހަކުވެސް ޒިޔާރަތްކުރަން އެދެނީ ރާއްޖެއަށް ކަމަށެވެ. އެންމެ އުފާވެރި އަދި އެންމެ ފުރިހަމަ ޗުއްޓީއެއް ހޭދަކުރެވެން އޮތް ތަނަކީ ރާއްޖެ ކަމަށްވާއިރު، އެތަނަކީ ދިރިއުޅެން ވެސް އެންމެ އެކަށޭނަ އެންމެ ފުރިހަމަ ތަނަށް ނުވާންވީ އެއްވެސް ސަބަބެއް ނެތް ކަމަށް އޭނާ ފާހަގަކުރެއްވިއެވެ.

ރަސްމާލޭގެ މަޝްރޫޢުގެ ކޮންސެޕްޓާ ގުޅޭގޮތުން ވާހަކަދައްކަވަމުން އަލައްބާރު ވިދާޅުވީ، އެތަނުގައި ބިނާކުރަނީ މީހުންނަށް މަހެއްހާ ދުވަހު ނުވަތަ ހަފްތާއަކު ވިޔަސް ހިތްހަމަޖެހިގެން ދިރިއުޅެވޭނެ ފަދަ ދިރިއުޅުމުގެ ވައްޓަފާޅިއެއް ކަމަށެވެ. އެގޮތުން އެ ސަރަޙައްދުގައި ރީތި ގޮނޑުދޮށްތަކާއި، ފެންވަރު ރަނގަޅު ރެސްޓޯރެންޓްތަކާއި، ހޮޓާތަކުގެ އިތުރުން ކުޅިވަރު ކުޅޭނެ ތަންތަނާއި ކުޑަކުދިންގެ ޕާކުތައް ހިމެނޭނެ ކަމަށް އޭނާ ވިދާޅުވިއެވެ.

ރާއްޖޭގެ ތާރީޚުގައި ވެސް ހިންގޭ މިފަދަ އެންމެ ބޮޑު އެއް އިންވެސްޓްމަންޓް އީގަލް ހިލްސްއާ ހަވާލުކޮށް، ދިވެހި ރައްޔިތުން އެ ކުންފުންޏަށް ކުރި އިތުބާރަކީ އެ ކުންފުންޏަށް ލިބުނު ވަރަށް ބޮޑު ޝަރަފެއްގެ ގޮތުގައި އަލައްބާރު ވަނީ ސިފަކުރައްވާފައެވެ.

_{ރަސްމާލެ މެރީނާ ތަރައްގީ ކުރަން ރާވާފައިވާ ގޮތް ދައްކުވައިދޭ މަންޒަރެއް---}

މި ބިޔަ މަޝްރޫޢުގެ ސަބަބުން ދިވެހި ރައްޔިތުންނަށާއި ޤައުމުގެ އިޤްތިޞާދަށް އިންޤިލާބީ ބޮޑެތި މަންފާތަކެއް ލިބިގެންދާނެ ކަމަށް ވަނީ ފާހަގަކުރެވިފައެވެ. އެގޮތުން، މި މަޝްރޫޢުގެ އެޑްވާންސެއްގެ ގޮތުގައި، ޑިވެލޮޕަރުގެ އަމިއްލަ ޚަރަދުގައި ގާތްގަނޑަކަށް 7.7 ބިލިއަން ދިވެހި ރުފިޔާގެ އަގުހުރި، 3 ކޮޓަރީގެ 5،000 ހައުސިންގ ޔުނިޓް ހުޅުމާލޭގައި އަޅައިދިނުމަށް ވަނީ ހަމަޖެހިފައެވެ. މި ފްލެޓްތަކުގެ ކުލި ނެގުމާއި ރައްޔިތުންނާ ޙަވާލުކުރުމުގެ ފުރިހަމަ ބާރާއި އިޚްތިޔާރު އޮންނާނީ ހަމައެކަނި ދިވެހި ސަރުކާރަށެވެ. މީގެއިތުރުން، މި މަޝްރޫޢުގެ ދަށުން ޕްރޮޕަޓީތައް ވިއްކާ ކޮންމެ ފަހަރަކު ލިބޭ އަގުގެ %10 ގެ އިތުރުން %4 ގެ ރަޖިސްޓްރޭޝަން ފީ ސީދާ ދަޢުލަތަށް ލިބިގެންދާނެއެވެ. އަދި ކުރިއަށް އޮތް 10 އަހަރު ދުވަހުގެ ތެރޭގައި 3 ބިލިއަން ޑޮލަރު ދަޢުލަތުގެ ޚަޒާނާއަށް ވަންނާނެ ކަމަށް ވެސް ވަނީ ލަފާކުރެވިފައެވެ.

މާލީ ވަޒީރު ޙަސަން ޒަރީރު ވިދާޅުވި ގޮތުގައި، މި މަޝްރޫޢުގެ އެންމެހައި މާލީ މުޢާމަލާތްތައް ހިންގުމަށް ހަމަޖެހިފައިވަނީ ރާއްޖޭގެ ބޭންކިންގ ނިޒާމުގެ ތެރޭގައި ހުޅުވޭ ޚާއްޞަ އެސްކްރޯ އެކައުންޓުތައް މެދުވެރިކޮށެވެ. މީގެ ސަބަބުން ރާއްޖޭގެ އިޤްތިޞާދުގައި ބޭރު ފައިސާ ހިފެހެއްޓި، އާންމު ރައްޔިތުންނަށް ދިމާވެފައިވާ ޑޮލަރުގެ ތާށިކަމަށް ދާއިމީ ޙައްލެއް ލިބިގެންދާނެއެވެ.

ހަމައެއާއެކު، ރަސްމާލެއިން ހިއްކުމަށް ހަމަޖެހިފައިވާ 1،150 ހެކްޓަރުގެ ބިމުގެ ތެރެއިން އީގަލް ހިލްސްއަށް ކުއްޔަށް ދޫކުރުމަށް ހަމަޖެހިފައިވަނީ 500 ހެކްޓަރެވެ. ބާކީ އޮތް 600 އަށްވުރެ ގިނަ ހެކްޓަރަކީ ދިވެހި ރައްޔިތުންގެ ގެދޮރުވެރިކަމަށް ޚާއްޞަ ކުރެވިފައިވާ ބިމެއް ކަމަށްވާއިރު، މިއީ ޖުމްލަ 65،000 ހައުސިންގ ޔުނިޓު ތަރައްޤީކުރެވޭނެ ބޮޑު ސަރަޙައްދެކެވެ.