ޣައްޒާ: ސިއްހީ ވަސީލަތްތައް ހުސްވެ ޑޮކްޓަރުން ބޮޑު ތަކުލީފެއްގައި

އިސްރާއީލުން ޣައްޒާއަށް ދެމުންގެންދާ ހަމަލާތަކާއި އަޅާފައިވާ ހިސާރުގެ ސަބަބުން ސިއްހީ އުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބި، ބަލިތައް ދެނެގަތުމަށް ބޭނުންވާ މެޑިކަލް ސާމާނު އިންތިހާއަށް މަދުވުމުގެ ސަބަބުން ޑޮކްޓަރުން ބޮޑެތި ނިންމުންތައް ނިންމަން ޖެހިފައިވާ ކަމަށް ރިޕޯޓުތައް ބުނެފިއެވެ.

 ޣައްޒާގެ މެދުތެރޭގައި ހުންނަ އަލްއަޤްޞާ މާޓިއާސް ހޮސްޕިޓަލްގެ ލެބޯޓްރީ ޑިޕާޓްމަންޓުގެ ޑިރެކްޓަރު ބާސިމް ޙަސަން ވިދާޅުވީ، ލިމިޓެޑް ވަސީލަތްތަކާއެކު ޓެސްޓުތައް ހަދަން ޖެހެނީ ބަލީގެ ހާލަތު އެންމެ ސީރިއަސް މީހުންނަށް އިސްކަންދީގެން ކަމަށެވެ.

ޣައްޒާގެ ހޮސްޕިޓަލްތަކުގައި ލޭގެ ގޭސް ޓެސްޓުތައް ހެދުން ހުއްޓިފައިވާއިރު، ލޭ އަޅާ ޓިއުބުތައް ވަނީ ހުސްވާން ކައިރިވެފައެވެ. އަދި ލެބޯޓްރީތަކުގައި %60 އަށް ވުރެ ގިނަ ޓެސްޓު ހެދުމަށް ބޭނުންކުރާ އޮޓޮމޭޓެޑް ކްލިނިކަލް ކެމިސްޓްރީ އެނަލައިޒަރުތަކާއި، ސްޓެރިލައިޒްކުރާ ސާމާނާއި، ލެޔާއި ޕްލާޒްމާ ރައްކާކުރާ ފްރިޖްތައް ވެސް ވަނީ މަސައްކަތް ކުރުން ހުއްޓިފައެވެ. ޣައްޒާގެ ސިއްހަތާ ބެހޭ ވުޒާރާއިން ހާމަކޮށްފައިވާ ގޮތުގައި މެޑިކަލް އިމޭޖިންގ އިކުއިޕްމަންޓްތަކުގެ ހަތަރުބައިކުޅަ ތިންބައި ހަލާކުވެފައިވާއިރު، ލެބޯޓްރީ ޓެސްޓިންގ ސާމާނުގެ %87 ވަނީ ހުސްވެފައެވެ.

މީގެ އިތުރުން ޣައްޒާގައި ހުރި 18 ސީޓީ ސްކޭނަރުގެ ތެރެއިން މިހާރު މަސައްކަތް ކުރަނީ އެންމެ ފަސް މެޝިނެވެ. އަދި އިސްރާއީލުގެ ހަމަލާތަކުގައި ނުވަ އެމްއާރްއައި މެޝިން ހަލާކުވުމާ ގުޅިގެން ޣައްޒާގައި އެމްއާރްއައިގެ އެއްވެސް ހިދުމަތެއް މިހާރު ނުލިބެއެވެ. ޝިފާ ހޮސްޕިޓަލުގެ ޑިރެކްޓަރު މުޙައްމަދު އަބޫ ސަލްމިޔާ ވިދާޅުވީ، ވަސީލަތްތައް ނެތުމުގެ ސަބަބުން ކޮންމެހެން ހަދަންޖެހޭ އަވަސް ޓެސްޓުތައް ފިޔަވައި އެހެން ޓެސްޓުތައް ފަސްކުރަން މަޖުބޫރުވެފައިވާ ކަމަށެވެ.

އަލްއަޤްޞާ މާޓިއާސް ހޮސްޕިޓަލްގެ ތަރުޖަމާނު ޚަލީލް އަލް-ދަޤްރާން ވިދާޅުވީ، ކެންސަރު ބައްޔަށް ފަރުވާދޭ ހަމައެކަނި ހޮސްޕިޓަލް ހަލާކުކޮށްލުމާއި ކީމޯތެރަޕީ ބޭސްތައް ލިބުން ދަތިވުމުގެ ސަބަބުން ކެންސަރު ބަލީގެ މީހުންނަށް ބޮޑެތި ތަކުލީފުތަކެއް އުފުލަން ޖެހިފައިވާ ކަމަށެވެ. މީގެ އިތުރުން ހަކުރު ބައްޔާއި ލޭމައްޗަށް ދިއުން ފަދަ ދާއިމީ ބަލިތައް ތަހައްމަލު ކުރަމުންދާ 350،000 އެއްހާ މީހުންނަށް ބޭސް ލިބުމުގައި ދަތިތައް ކުރިމަތިވެފައިވާ ކަމަށް އޭނާ ފާހަގަކުރެއްވިއެވެ.