ޣައްޒާގައި އިސްރާއީލުން ހިންގާ ޖަރީމާތައް ދިފާއުކުރެވޭނެ އެއްވެސް ހުއްޖަތެއް ނެތް: ގަތަރުގެ ބޮޑުވަޒީރު

ކޮންމެ ބަހަނާއެއް ދެއްކި ނަމަވެސް، ޣައްޒާގެ ހޮސްޕިޓަލްތަކާއި ސްކޫލްތަކަށް ހަމަލާދީ އިސްރާއީލުން ހިންގާ ޖަރީމާތައް ދިފާއުކުރެވޭނެ އެއްވެސް ހުއްޖަތެއް ނެތް ކަމަށް ގަތަރުގެ ބޮޑުވަޒީރު އަދި ފޮރިން މިނިސްޓަރު ޝައިޚް މުހައްމަދު ބިން އަބްދުއްރަހްމާން ބިން ޖާސިމް އަލް ސާނީ ވިދާޅުވެއްޖެއެވެ.

އަންގާރަ ދުވަހު "ޕިއާސް މޯގަން އަންސެންސާޑް" ޕްރޮގްރާމުގައި ވާހަކަދައްކަވަމުން ޝައިޚް މުހައްމަދު ވިދާޅުވީ، ޣައްޒާގައި އިސްރާއީލުން ހިންގަމުންދާ ނަސްލު ނައްތާލުމުގެ އުދުވާނު ކުށްވެރިކުރައްވައި، ހިސާރުކޮށްފައިވާ ފަލަސްތީނުގެ ބިމަށް ގެނައި ހަލާކުތަކުގެ ޒިންމާ އުފުލަންޖެހޭ ކޮންމެ ފަރާތަކީ "ހަނގުރާމައިގެ ކުށްވެރިއެއް" ކަމަށެވެ. 

އަދި އޮކްޓޯބަރު 2025 ގައި ފެށި ހަނގުރާމަ ހުއްޓާލުމަށްވެފައިވާ އެއްބަސްވުމާއި އިސްރާއީލުން ކޮންމެ ދުވަހަކު ކަހަލަ ގޮތަކަށް ޚިލާފުވަމުންދާ ކަމަށާއި، އޭގެ ފަހުން ވެސް 1,400 އަށް ވުރެ ގިނަ ފަލަސްތީނު ރައްޔިތުން ޝަހީދުކޮށްލާފައިވާ ކަމަށް އެމަނިކުފާނު ފާހަގަކުރެއްވިއެވެ.

އިތުރަށް ވާހަކަދައްކަވަމުން ޝައިޚް މުހައްމަދު ވިދާޅުވީ ޣައްޒާގެ ގާތްގަނޑަކަށް 70 އިންސައްތަ ސަރަހައްދު އިސްރާއީލުން ހިސޯރުކޮށްފައިވާ ކަމަށާއި، އިސްރާއީލުން އެއްބަސްވުމުގެ ޝަރުތުތަކަށް އަމަލުނުކުރާ ކަމަށެވެ. އަދި ހަނގުރާމަ ފެށުނު ފުރަތަމަ ދުވަހުން ފެށިގެން ވެސް ހަނގުރާމަ ހުއްޓުވުމަށް ގަތަރުން ކުރަމުންދިޔަ މަސައްކަތްތަކަށް އިސްރާއީލުން ހުރަސްއަޅަމުންދާ ކަމަށް އެމަނިކުފާނު ވިދާޅުވިއެވެ.

މީގެއިތުރުން، 2025 ވަނަ އަހަރު މަޝްވަރާތަކަށް އެއްވެ ތިބި ހަމާސްގެ އިސްވެރިންނަށް އަމާޒުކޮށް ގަތަރުގެ ވެރިރަށް ދޯހާއަށް އިސްރާއީލުން ދިން ހަމަލާ ވެސް ބޮޑުވަޒީރު ވަނީ ކުށްވެރިކުރައްވާފައެވެ. އެމަނިކުފާނު ވިދާޅުވީ އެއީ ގަތަރުގެ ސިޔާދަތަށް އަރައިގަތުން ކަމަށާއި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ "ރަތް ރޮނގު ފަހަނައަޅައި ގޮސްފައި" ކަމަށެވެ.

އެމެރިކާ އަދި އިސްރާއީލުން އީރާނާ ދެކޮޅަށް ފެށި ހަނގުރާމައާ ގުޅިގެން ވޮޝިންޓަނާއި ތެހެރާން ދެމެދު މެދުވެރިއެއްގެ ދައުރު ޕާކިސްތާނާ އެކު ގަތަރުން އަދާކުރަމުންދާކަން ވެސް ޝައިޚް މުހައްމަދު ފާހަގަކުރެއްވިއެވެ. މި ހަނގުރާމަ ނިމުމަކަށް ގެނައުމަށްޓަކައި، އީރާނުގެ ސުލްހަވެރި ނިއުކްލިއާ ހައްގުތަކާއި ދަތިކުރުމުގެ ފިޔަވަޅުތައް އުވާލުމުގެ އެއްބަސްވުމަކަށް އައުމާއި، ހޮރުމޫޒް ކަނޑުއޮޅީގެ މިނިވަން ދަތުރުފަތުރާއި، އަދި ޖީސީސީ ގައުމުތަކާއި އީރާނުގެ މެދުގައި މަޝްވަރާކޮށްގެން ސަރަހައްދީ ސަލާމަތީ ކަންކަން އިސްލާހުކުރަންޖެހޭ ކަމަށް އެމަނިކުފާނު ވިދާޅުވިއެވެ.