އިސްރާއީލުން މިއަދު އެކަނިވެސް ޣައްޒާގެ 6 މީހުން ޝަހީދުކޮށްލައިފި

ހަމަލާތައް ހުއްޓާލުމަށް އެމެރިކާ މެދުވެރިވެގެން ވެފައިވާ އެއްބަސްވުމާ ޚިލާފަށް އިސްރާއީލުން ބުދަ ދުވަހު ޣައްޒާއަށް ދިން ވައިގެ ހަމަލާތަކެއްގައި މަދުވެގެން ފަލަސްތީނުގެ ހަ މީހުން ޝަހީދުވެއްޖެއެވެ.

ޣައްޒާގެ ސިވިލް ޑިފެންސް އެޖެންސީ އާއި ހޮސްޕިޓަލުން ބުނި ގޮތުގައި، ޣައްޒާ ސިޓީގައި ދަތުރުކުރަމުންދިޔަ މިނީ ބަހަކަށް އިސްރާއީލުން ދިން ވައިގެ ހަމަލާއެއްގައި ފަސް މީހުން ޝަހީދުވެ، އިތުރު 14 މީހުން ޒަޚަމްވެފައިވެއެވެ. މީގެ އިތުރުން އެ ސިޓީގެ އެހެން ސަރަހައްދެއްގެ އެޕާޓްމަންޓަކަށް ދިން ހަމަލާއެއްގައި އަންހެނަކު ވަނީ ޝަހީދުވެފައެވެ.

ސިވިލް ޑިފެންސްގެ ތަރުޖަމާނު މަޙްމޫދު ބައްސާލް ވިދާޅުވީ، ތަލް އަލްހަވާ ސަރަހައްދުގައި ދަތުރުކުރި ފަސިންޖަރު ބަހަކަށް އިސްރާއީލުގެ ޑްރޯނަކުން ދެ މިސައިލް ހަމަލާ ދީފައިވާ ކަމަށެވެ. އެ ހަމަލާގައި ފަސް މީހުން ޝަހީދުވެ، ކުޑަކުދިންނާއި އަންހެނުން ހިމެނޭހެން 20 މީހުން ޒަޚަމްވި ކަމަށް އޭނާ ވިދާޅުވިއެވެ. އަދި ބަހުގެ ކުރީކޮޅު ހަލާކުވެ އެއްކޮށް އަނދައިގެން ގޮސްފައިވާ ކަމަށްވެސް އޭނާ ހާމަކުރެއްވިއެވެ.

ޣައްޒާ ސިޓީގެ އަލްޝިފާ ހޮސްޕިޓަލުން ވަނީ މި ހަމަލާގައި ޝަހީދުވި މީހުންނާއި ޒަޚަމްވި މީހުން ހޮސްޕިޓަލަށް ގެނެސްފައިވާކަން ކަށަވަރުކޮށްދީފައެވެ. ނަމަވެސް، އިސްރާއީލުގެ އަސްކަރިއްޔާއިން މި ހަމަލާތަކާ ގުޅިގެން އަދި ވަކި އެއްޗެއް ބުނެފައެއް ނުވެއެވެ.

ހަމާސްއިން ހަމަލާތައް ހުއްޓާލުމުގެ އެއްބަސްވުމާ ޚިލާފުވެފައިވާ ކަމަށް ބުނެ އިސްރާއީލުން ހަމަލާތައް ވަރުގަދަކުރަމުންދާއިރު، ހަމާސްއިން ވަނީ އެ ތުހުމަތުތައް ދޮގުކޮށްފައެވެ. އެއްބަސްވުމަށް ފަހުވެސް އިސްރާއީލުން ދިން ހަމަލާތަކުގައި ފަލަސްތީނުގެ 1،400 އަށްވުރެ ގިނަ މީހުން ޝަހީދުވެފައިވާ ކަމަށް ސިއްހީ އޮފިޝަލުން މައުލޫމާތު ދެއެވެ.