ގައުމީ ސަލާމަތަށް ބުރޫއަރާ އެއްވެސް ކަމަކަށް ސައޫދީން ދުލެއް ނުދޭނެ: ވަލީއަހުދު

ހޫޘީ ހަނގުރާމަވެރިންގެ ހަމަލާތަކާ ގުޅިގެން ސައޫދީ އަރަބިއްޔާގެ ސަލާމަތާއި ރައްކާތެރިކަމަށް ބުރޫއަރާނެ އެއްވެސް ކަމަކަށް އެ ގައުމުން ދުލެއް ނުދޭނެ ކަމަށް ވަލީއަހުދު މުހައްމަދު ބިން ސަލްމާން ވިދާޅުވެއްޖެއެވެ.

ވަލީއަހުދު ވިދާޅުވީ، ޔަމަނުގެ ރައްޔިތުންނަށާއި މުޅި ސަރަހައްދަށް ނުރައްކާވާ ފަދައިން ހޫޘީން އިޚްތިޔާރުކޮށްފައިވަނީ ހަމަނުޖެހުމާއި ހަލާކު ކަމަށެވެ.

ސައޫދީ ޝޫރާ ކައުންސިލްގެ ނުވަވަނަ ދައުރުގެ ތިންވަނަ އަހަރުގެ ޖަލްސާތައް ފެށުމުގެ ރަސްމިއްޔާތުގައި، ރަސްގެފާނު ސަލްމާން ބިން އަބްދުލްއަޒީޒް އަލް ސައޫދުގެ ނަންފުޅުގައި ތަގުރީރު ކުރައްވަމުން ވަލީއަހުދު ވިދާޅުވީ، ގައުމުގެ ސަލާމަތަށް ނުރައްކާވާ ކޮންމެ ކަމަކަށް އަދި ދެވޭ ކޮންމެ ހަމަލާއަކަށް ފަސްޖެހުމެއްނެތި ސާބިތުކަމާއެކު ރައްދުދޭނެ ކަމަށެވެ. އަދި ހަމަނުޖެހުންތައް ކުޑަކޮށް، ޑިޕްލޮމެޓިކް ހައްލުތަކަށް ސައޫދީން މަސައްކަތް ކުރަމުންދާ ނަމަވެސް، ސަލާމަތީ ކަންކަމުގައި އެއްވެސް ދުލެއް ނުދޭނެ ކަމަށްވެސް އެމަނިކުފާނު ވިދާޅުވިއެވެ.

ސަރަހައްދީ ހަމަޖެހުން ގާއިމުކުރުމަށް ސައޫދީން އަޅަމުންދާ ހަރުދަނާ ފިޔަވަޅުތަކަށް އަލިއަޅުއްވާލައްވަމުން ވަލީއަހުދު ވަނީ މިދިޔަ އޮގަސްޓް މަހު ތުރުކީ އަދި ޕާކިސްތާނާއެކު ސޮއިކުރެވުނު މައްކާ ޖޮއިންޓް ޑިފެންސް އެގްރީމަންޓްގެ މުހިންމުކަން ފާހަގަކުރައްވާފައެވެ. މި އެއްބަސްވުމުގެ ސަބަބުން ސަރަހައްދީ ހަމަޖެހުން ވަރުގަދަވެ، ނުރައްކާތަކުން ސަލާމަތްވުމަށް ބާރަކަށް ވެގެންދާނެ ކަމަށް ވިދާޅުވިއެވެ.

ރަތްކަނޑުގެ ބާބުލް މަންދަބް ސަރަހައްދުން ދަތުރުކުރާ އުޅަނދުފަހަރަށް އަމާޒުކޮށް ހޫޘީން ދެމުންދާ ހަމަލާތައް ކުށްވެރިކުރައްވަމުން، ބައިނަލްއަގުވާމީ ކަނޑުގެ ދަތުރުފަތުރަށް ހުރަސްއަޅައި ސިޔާސީ ނުވަތަ އިގްތިސާދީ ޕްރެޝަރު ކުރުމަށް ކުރާ މަސައްކަތްތައް ބަލައިނުގަނެވޭނެ ކަމަށް ވަލީއަހުދު ވިދާޅުވިއެވެ. އަދި ބައިނަލްއަގުވާމީ މަސްލަހަތުތައް ހިމާޔަތްކުރުމަށްޓަކައި ގިނަ ގައުމުތައް އެކުލެވޭ ކަނޑުގެ ދިފާއީ އިއްތިހާދެއް އުފައްދާފައިވާ ކަންވެސް އެމަނިކުފާނު ހާމަކުރެއްވިއެވެ.

ފަހަކަށް އައިސް ހޫޘީންގެ ހަމަލާތައް އިތުރުކޮށްފައިވީ ނަމަވެސް، ސައޫދީގެ ދިފާއީ ބާރުތަކުން ވަނީ އެ ހަމަލާތައް ވަރަށް ކާމިޔާބުކަމާއެކު ހުއްޓުވާފައެވެ. އެގޮތުން ޠާއިފާއި ޔަންބުއު ސަރަހައްދަށް އަމާޒުކޮށް ފޮނުވާލި ބެލިސްޓިކް ހަ މިސައިލެއް ސައޫދީ އަސްކަރިއްޔާއިން ވަނީ ވައިގެ ތެރޭގައި ކާމިޔާބުކަމާއެކު ނައްތާލާފައެވެ.

ސައޫދީ އަރަބިއްޔާއަށް އަމާޒުވާ ހަމަލާތައް ހުއްޓުވުމަށް އެކުވެރި ގައުމުތަކުގެ އެއްބާރުލުންވެސް ވަނީ އިތުރުވެފައެވެ. އެގޮތުން، ދިފާއީ އެއްބަސްވުމުގެ ދަށުން ސައޫދީ އަރަބިއްޔާގެ ދިފާއުގައި ޕާކިސްތާނުން ވެދެވެން އޮތް ހުރިހާ އެހީތެރިކަމެއް ފޯރުކޮށްދޭނެ ކަމަށް ޕާކިސްތާނުގެ ދިފާއީ ވަޒީރު ޚަވާޖާ މުހައްމަދު އާސިފް ވަނީ ވިދާޅުވެފައެވެ.