ބޭރުގެ ބުކިންގ ޕްލެޓްފޯމްތަކުން ޓެކްސް ނަގަން ފަށައިފި

ރާއްޖެއިން ބޭރުގައި ރަޖިސްޓްރީވެގެން މަސައްކަތްކުރާ ފަތުރުވެރިކަމުގެ އެކި ޕްލެޓްފޯމްތަކުން ޖީއެސްޓީ ނެގުމަށްޓަކައި، މުދަލާއި ޚިދުމަތުން ޓެކްސް ނެގުމުގެ ޤާނޫނަށް ގެނައި 8 ވަނަ އިސްލާހަށް ޢަމަލުކުރަން ފަށައިފިއެވެ. މި ޤާނޫނަށް ޢަމަލުކުރަން ފަށާފައިވަނީ އެއާ ގުޅިގެން ހަދަންޖެހޭ ޤަވާއިދުތައް އެކުލަވާލައި، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) މެދުވެރިކޮށް އެފަދަ ވިޔަފާރިތަކަށް ރަޖިސްޓްރީވުމުގެ ފުރުސަތު ހުޅުވާލުމަށްފަހުގައެވެ.

ރާއްޖޭގެ ޓެކްސް ނިޒާމު އިތުރަށް ހަރުދަނާކުރުމަށް ސަރުކާރުން ގެނައި މި އިސްލާހުގެ ދަށުން، ރާއްޖޭގައި 'ޑެސްޓިނޭޝަން ޕްރިންސިޕަލް' ތަންފީޒުކުރަން ވަނީ ފަށާފައެވެ. މިގޮތުން އޮފްޝޯ ބުކިންގ ޕްލެޓްފޯމުތަކާއި ބޭރުގެ ޓުއަރ އޮޕަރޭޓަރުންނާއި ޓްރެވަލް އެޖެންޓުންނަށް ދޭ މުދަލާއި ޚިދުމަތުގެ އަގުން ޖީއެސްޓީ ނެގުމުގެ އުސޫލުތައް މިހާރު ވަނީ ކަނޑައަޅާފައެވެ. އަދި އެއްވެސް ފަރާތަކުން ރާއްޖޭގައި ހުރި އެ ފަރާތެއްގެ ވިޔަފާރި ހިންގާ ތަނަކުން ޚިދުމަތް ދީފިނަމަ ނުވަތަ ރާއްޖޭގައި ރަޖިސްޓްރީކޮށްފައި ނުވިނަމަވެސް، ޚިދުމަތް ފޯރުވައިދިން ވަގުތު ރާއްޖޭގައި ހުރެ އެ ޚިދުމަތުގެ އަމަލީ މަސައްކަތް ރާއްޖޭގައި ކޮށްފިނަމަ ނުވަތަ ރާއްޖޭގައި ހުރި ނުއުފުލޭ މުދަލަކާ ގުޅޭ ޚިދުމަތެއް ދީފިނަމަ، އެއީ ރާއްޖޭގައި ދިން ޚިދުމަތެއްގެ ގޮތުގައި ބެލެވޭނެއެވެ.

މީގެ އިތުރުން، ޓެކްސް ނެގޭ ހަރަކާތް ހިންގާ ދާއިމީ ތަނެއް ރާއްޖޭގައި ނެތް ނަމަވެސް، އިންބައުންޑް ޓޫރިޒަމް ޕްރޮޑަކްޓެއް ރާއްޖޭގައި ފޯރުވައިދޭނަމަ ޖީއެސްޓީ ނެގުން ލާޒިމުވާނެ ކަމަށް ޤާނޫނުގައި ބަޔާންކޮށްފައިވެއެވެ. އިންބައުންޑް ޓޫރިޒަމް ޕްރޮޑަކްޓުތަކުގެ ގޮތުގައި ކަނޑައަޅާފައިވަނީ ރާއްޖޭގައި ހިންގާ އެކޮމޮޑޭޝަނާއި، ކެއުމާއި، ދަތުރުފަތުރު ފަދަ ފަތުރުވެރިކަމާ ގުޅުންހުރި ހަރަކާތްތަކެވެ. މި ބަދަލުގެ ސަބަބުން މުދަލާއި ޚިދުމަތުން ޓެކްސް ނެގުމުގެ ނިޒާމު ތަންފީޒު ކުރުމުގައި ދިމާވާ ދަތިތަކަށް ހައްލު ލިބިގެންދާނެއެވެ.

މި އިސްލާހުގެ ދަށުން ރާއްޖެއިން ބޭރުގައި ރަޖިސްޓްރީކޮށްގެން ރާއްޖޭގައި ފަތުރުވެރިކަމުގެ ޚިދުމަތްދޭ ފަރާތްތަކުން ޖީއެސްޓީ ދައްކަން ޖެހޭނީ ފަތުރުވެރިކަމުގެ ޖީއެސްޓީ (ޓީ-ޖީއެސްޓީ) ރޭޓު ކަމަށްވާ 17 އިންސައްތައިގައެވެ. މީރާއިން މިހާރު ވަނީ މިފަދަ ފަރާތްތަކަށް ރަޖިސްޓްރީވުމުގެ ފުރުސަތު ހުޅުވާލައި، ޖީއެސްޓީ ބަޔާން ހުށަހެޅުމާއި ފައިސާ ދެއްކުމުގެ އުސޫލުތައް އާންމުކޮށްފައެވެ. މީރާގެ އޮންލައިން ޕްލެޓްފޯމް މެދުވެރިކޮށް މި ކަންކަން ކުރިއަށް ގެންދެވޭނެ އިންތިޒާމު ހަމަޖައްސާފައިވާއިރު، މައުލޫމާތު ފޯރުކޮށްދިނުމަށް ޚާއްސަ އީމެއިލް އެޑްރެހަކާއި ވަޓްސްއެޕް ނަންބަރެއްވެސް ވަނީ ތައާރަފުކޮށްފައެވެ.

މީރާއިން ހާމަކުރި ގޮތުގައި މި އިސްލާހުގެ ސަބަބުން މިހާރު ޓެކްސް ދައްކަމުންދާ ފަރާތްތަކުން އަމަލުކުރަންޖެހޭ އުސޫލަކަށް އަދި ޓެކްސް ދައްކާ މިންވަރަކަށް ބަދަލެއް ނާންނާނެއެވެ. ސަރުކާރުން އަންދާޒާކުރާ ގޮތުގައި، ރާއްޖޭގައި ދާއިމީ ތަނެއް ނެތް އޮފްޝޯ ބުކިންގ ޕްލެޓްފޯމުތަކާއި ޓުއަރ އޮޕަރޭޓަރުން އަދި ޓްރެވަލް އެޖެންޓުންގެ އަތުން ޓެކްސް ނަގަން ފެށުމުން ދައުލަތުގެ އާމްދަނީއަށް އަހަރަކު 1.6 ބިލިޔަން ރުފިޔާ އިތުރުވެގެންދާނެއެވެ.