ދުނިޔެ
އާރްއޭއެފް މަރުކަޒަށް ހަމަލާދޭން އުޅުނު މައްސަލައިގައި އީރާނުގެ އަތެއްވާ ކަމަށް ޔޫކޭއިން ތުހުމަތުކޮށްފި
އާރްއޭއެފް މަރުކަޒަށް ހަމަލާދޭން އުޅުނު މައްސަލައިގައި އިރާނުގެ އަތެއް ވާކަމަށް ޝައްކުކުރަނީ.
އެމެރިކާގެ އަސްކަރިއްޔާއިން ވެސް ބޭނުންކުރަމުން އަންނަ އިނގިރޭސިވިލާތުގެ ރޯޔަލް އެއާ ފޯސް (އާރްއޭއެފް) ފެއާފޯޑް މަރުކަޒަށް އަމާޒުކޮށް ހިންގަން އުޅުނު ސަލާމަތީ ހާދިސާއެއްގައި އީރާނުގެ އަތެއް ވާކަމަށް ބެލެވޭ “ވަރުގަދަ ނިޝާންތަކެއް” ފެންނަން ހުރި ކަމަށް ޔޫކޭގެ ބޮޑުވަޒީރު އެންޑީ ބާންހަމް ވިދާޅުވެއްޖެއެވެ. ނަމަވެސް އީރާނުން ވަނީ މި ތުހުމަތުތައް ވަގުތުން ދޮގުކޮށްފައެވެ.
ބުދަ ދުވަހު ބީބީސީއަށް ދެއްވި އިންޓަވިއުއެއްގައި ބޮޑުވަޒީރު ބާންހަމް ވިދާޅުވީ، ވޭތުވެދިޔަ އާދީއްތަ ދުވަހު ފެއާފޯޑް ބޭސް ކައިރިން ޓެރަރިޒަމާއި ގޮވާތަކެތީގެ ތުހުމަތުގައި ހައްޔަރުކުރި އުމުރުން 20 އަހަރުގެ އިނގިރޭސި ފަސް ފިރިހެނުންގެ މައްސަލަ އަދިވެސް ފުލުހުން ތަހުގީގު ކުރަމުން އަންނަ ކަމަށެވެ. އެ މީހުން ހައްޔަރުކުރިތާ އަނެއް ދުވަހު ވަނީ ކަފާލާތުގެ ދަށުން ދޫކޮށްލާފައެވެ. ބާންހަމް ފާހަގަކުރެއްވި ގޮތުގައި މި މައްސަލައިގައި އިނގިރޭސިވިލާތުން ދަނީ އެމެރިކާގެ ކަމާބެހޭ ފަރާތްތަކާ ގާތުން ގުޅިގެން މަސައްކަތް ކުރަމުންނެވެ.
މި ތުހުމަތުތަކާ ގުޅިގެން އީރާނުގެ ފޮރިން މިނިސްޓަރު އައްބާސް އަރަގްޗީ ވަނީ އެކްސްގައި ހިއްސާކުރެއްވި މެސެޖެއްގައި ޔޫކޭގެ ވާހަކަތަކަށް ރައްދު ދެއްވާފައެވެ. އޭނާ ވިދާޅުވީ ބޭރުގެ ގައުމަކަށް މަސައްކަތްކުރާ ކަމަށް ބުނާ ޓެރަރިސްޓުން ކަފާލާތުގެ ދަށުން ދޫކޮށްލުމުން، ހަގީގަތް އެނގިގެންދާ ކަމަށާއި އިނގިރޭސިވިލާތުން ކުރަނީ އަސްލެއް ނެތް ތުހުމަތުތަކެއް ކަމަށެވެ.
ތިން ދުވަހުގެ ތަހުގީގަށްފަހު ފުލުހުން ބުނެފައިވަނީ ތުހުމަތުކުރެވޭ މީހުން ދަތުރުކުރި އުޅަނދުތަކުން އެއްވެސް ގޮވާތަކެއްޗެއް ފެނިފައިނުވާ ކަމަށާއި ނަމަވެސް ބައެއް ޕެޓްރޯލް ފެނިފައިވާ ކަމަށެވެ. ތުހުމަތުކުރެވޭ މީހުން ކަފާލާތުގެ ދަށުން ދޫކޮށްލުމުން އެމެރިކާގެ ރައީސް ޑޮނަލްޑް ޓްރަމްޕާއި ސެކްރެޓަރީ އޮފް ސްޓޭޓް މާކޯ ރޫބިއޯ ފަދަ އިސް ވެރިން ވަނީ އެ ނިންމުމަށް ފާޑުވިދާޅުވެފައެވެ.
ބްރިޓިޝް ކައުންޓަ-ޓެރަރިޒަމް ޕޮލިސިންގެ އިސްވެރިޔާ ލޯރެންސް ޓޭލާ ވިދާޅުވީ، ކަފާލާތުގެ ދަށުން ދޫކުރި ނަމަވެސް އެ މީހުންގެ ތަހުގީގު ކުރިއަށްދާ ކަމަށާއި އެ އަމަލަކީ ބޭރު ގައުމެއްގެ ފަރާތުން ހިންގަން އުޅުނު އަމަލެއްތޯ ބަލަމުން އަންނަ ކަމަށެވެ. ލަންޑަންގެ ހުޅަނގުން 160 ކިލޯމީޓަރު ދުރުގައި އޮންނަ މި އެއާބޭސްއަކީ މެދުއިރުމަތީގެ ހަނގުރާމަތަކުގައި އެމެރިކާގެ ބޮންއަޅާ މަތިންދާބޯޓުތައް ގިނަ ދުވަސްތަކެއް ވަންދެން ބޭނުންކޮށްފައިވާ މަރުކަޒެކެވެ.
Ads by MSS
