މޯލްޑިވްސް ޓީ10 ސްމޭޝްގެ ޗެމްޕިއަންކަން ސީބީއެލްއިން ހޯދައިފި

ކްރިކެޓް ބޯޑް އޮފް މޯލްޑިވްސް (ސީބީއެމް) އިން ބޭއްވި މޯލްޑިވްސް ޓީ10 ސްމޭޝްގެ ޗެމްޕިއަންކަން ސީބީއެލް ސްޕޯޓްސް ކްލަބުން ހޯދައިފިއެވެ. މި ކްލަބުން ވަނީ މިއަހަރު ބޭއްވި ޓީ20 ޕްރެޒިޑެންޓްސް ކަޕްގެ ޗެމްޕިއަންކަން ވެސް ހޯދައިފައެވެ. 

ކުޅިވަރު އެކުވެނި ކްރިކެޓް ދަނޑުގައި ކުޅުނު މި މުބާރާތުގެ ފައިނަލް މެޗުގައި ސީބީއެލްއިން ފުރަތަމަ އެރީ ކުޅޭށެވެ. އަދި 3 ކުޅުންތެރިން ނުބައިވެ، 10 އޯވަރު ހަމަވިއިރު، އެ ކްލަބުން 123 ލަނޑު ހެދިއެވެ. އެ ޓީމަށް އެންމެ ގިނަ ލަނޑު ހަދާދިނީ 82 ލަނޑު ހެދި ރުވާން ތާރަކައެވެ. 

ފައިނަލު މެޗުގައި އަނެއް ކޮޅުން ބައްދަލުކުރި އެމްއެސް ހެލްޕިން ހޭންޑް ސްޕޯޓްސް އެކަޑަމީއިން ޖަވާބުގައި ކުޅެން އަރައި 10 އޯވަރު ހަމަވިއިރު 5 ކުޅުންތެރިން ނުބައި ވެގެން ހެދިފައިވަނީ 66 ލަނޑެވެ. މި އިނިންގްސްގައި ވެސް ސީބީއެލްގެ ތާރަކަ ވަނީ މޮޅު ކުޅުމެއް ދާއްކާފައެވެ. އެގޮތުން އޭނާ ވަނީ 7 ލަނޑަށް 2 ވިކެޓު ނަގާފައެވެ. އަދި މެޗުގެ އެންމެ މޮޅު ކުޅުންތެރިޔާއަކަށް ހޮވުނީ ވެސް އޭނާއެވެ.

މީގެ އިތުރުން، މުބާރާތުގެ އެންމެ ގިނަ ޓްރޮފީ ގެންދިޔަ ކުޅުންތެރިއަކީ ވެސް ތާރަކައެވެ. އޭނާ ވަނީ މުބާރާތުގެ އެންމެ މޮޅު ކުޅުންތެރިޔާއާއި މުބާރާތުގެ އެންމެ ގިނަ ލަނޑު، އެންމެ ގިނަ ވިކެޓް، އެންމެ ގިނަ ކެޗްގެ އިތުރުން ހުރިހާ ގޮތަކުން އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ. 

މުބާރާތުގައި އެންމެ ގިނަ ވިކެޓު ނަގާފައިވަނީ އަހުމަދު އަމީލާއި، ތަރިންދުއެވެ. އަދި އެންމެ ގިނަ ކެޗް ހިފާފައިވަނީ އޮފްއެފްސީގެ ޒިޔާއުލްއެވެ.